3
1 Nɛrɛɛkɛ mɩ-n nanɩ, ʋrɛ dʋɔn balanyɔ sɛbɛɛkɛ mɩ khere narnɩ gɩrɛ. Sɛbɛ yenyɔraakɛ fɛʋ mɩ khe narɛ gɩ cʋʋ kpɩɛrɛ gɩ jaa nar;
2 dɩ mɛ̃ na jɩna gɩrɛɛkɛ Thãgbaa bobon phuusɔ kɔɔ maanɩ mɩɩrɛ, na Kɔ̃tɩnɩkɛ dɔnɩ Taadaarɩ jɔfʋʋkɛ anɩ thɔ̃thɔna kɔɔ 'laanɩ.
3 Cacaca nɩ jɛna dɩ pɩpɩɩ wiresɔra ɓoɓorodara na ɩɩrɛ na maanɛ jɔɔ. Wɛr dɔ wɩrɛ n ɩrɛnɩ mɔ̃kɛ awɩ thɩ̃ puu ƴaal n kʋ wɩnɩ thue.
4 Wa sor nayɩ: Ɩɩnkɛra a kɔɔ yɩnɩ ɩna bire na ɩ̃, kana gɩ ha? Gɩdonɩ a fʋna wireekɛ asɩ thɩthɩsɔ kɔɔ khiirni, oti thɩ̃ɛ fɛʋ too mɔnanakɛ Thãgba kɔɔ ti gini.
5 Sɩɩ do wɩ-n jɩrɛ gbobi, sɩ dɩ wɩ diinə, dɩ mamara nʋɔ Thãgba kɔɔ sona dɩ ƴũ na thɩɩkɛ hale gɩrɛ. Nyʋɔn a kɔɔ gba a cʋʋna thɩɩ dɩ nyʋɔnnana thɩɩ kɔɔ the.
6 Dɩ nyʋɔnna kɔɔ the thɩɩraakɛ kɔɔ hanɩle mamara dɩɩ kʋɛ.
7 Sɩ ƴũ na thɩɩkɛ hanɩkɛ nɛnɛ̃, thɩmɩɩ nɔ ca bɩɛlɩlera thɩnɛ gɩ, dɔɔ n kʋɛa gɩ wireekɛ dɔnɩ kɩɩl wire, kɛ wɩrɛ na-n therananɩ Thãgba ga na bũburoni.
8 Nɛrɛɛkɛ mɩ-n nanɩ, thɩ̃ bɩɛl hale na-n diinə ga, gɛr dʋɔn, Kɔ̃tɩnna wi bɩɛl hor yɛna gbɩlanɩ, dɩ yɛna gbɩlanɩ ho wi bɩɛl.
9 Kɔ̃tɩn na-n pʋɔr sɩ dɩ cʋʋ gɩrɛɛkɛ a-n yɩnɩ ɩna cʋʋra', mɔ̃kɛ ɩkhasɔ n kpɩɛrnɩ gɩra', sɩ haar a-n fʋ nɛrɛra aa-n ƴaal tibil bɩɛl n buə', sɩ a-n ƴaalɛ tɩbɩla fɛʋ n deba haar.
10 Kɔ̃tɩnɩ wi na daan mɔ̃ yu n ɩnɩ, ga Wiile thãgbara ƴũ na phor na ka na helle, dɩ ƴepələ̃be na mar dɔɔ a na hɩ̃ fɛʋ, dɩ thɩɩ na thɔmaakɛ n dʋɔnnɩ kɛ na thiire fɛʋ.
11 Dɩ gɩdonɩ thɩ̃ɛɛle fɛʋ thale ga kʋɛ, ʋmɔ̃ɔ tibil ca teana nɩ dɔ? Gɩ teenanɛ nɩ hanana fɩl phuu na Thãgba maar.
12 Na-n pɩɛrɛ sɩ nɩ phana dakha Thãgbaa wi gɩ dã, kɛ thãgbara ƴũ na donɩ dɔ haar a na hɩ̃ fɛʋ, ƴepələ̃be dakha n ma dɔɔ ga-n hɩl.
13 Ƴũ phaa na thɩ phaakɛ fɩl sarʋ na harɔnɩ sɩ-n pɩɛr, mɔ̃kɛ Thãgba kɔɔ ʋlfɛna sɩnɩ ɩna ha sɛr.
14 Gɛr gɩ, nɛrɛɛkɛ mɩ-n nanɩ, mɔ̃ nɩ hanɩ pɩɛrɔ gɩrɛ, na-n bãbanɛ na-n do a yɩ nɩ na jiine na dɩ paara', sɩ nɩ dɔ a yɩ nɩ na ha ɩɩ.
15 Na-n jɛna dɩ asɩ Kɔ̃tɩ̃ɩ ha fʋ dʋɔn anɩ taa, mɔ̃kɛ Pol asɩ omiikɛ sɩ-n nanɩ kɔɔ khere narnɩ na kpɛsɛrɛɛkɛ Thãgba kɔɔ haanɩ.
16 Mɛ̃ a-n so ɔɔ sɛbɛsɔra fɛʋ ka a-n mɩɩnɩ ga thɩmɩɩ. Paar hale a khɩɩr jɩɩrra, dɩ jɩ 'leedara na wɩrɛ na tɩɛnna' n fi gi mɔ̃kɛ wɩ-n cʋʋnɩ na gɩ̃ Thãgbaa sɛbɛsɔ dakha, sɩ dɩɩ do awɩ thɛthɛɛ kʋɛ gɩ.
17 Gɛr gɩ nɛrkɛ mɩ-n nanɩ, ne wer 'lire jɩɩr ga thɩ̃sɔɔle; na-n jɩɛ hɩɩn dɩ tɩɩ khabaasɔɔ fɩl puu na-n cʋʋ nɩ nɩ lɛ̃ hʋɛra sɩ nɩ faa anɩ kɩbɩ jɩɩla'.
18 Nɩ jɛ asɩ Kɔ̃tɩ̃ Jeju Kirisitiikɛ kɔɔ taa sɩnɩ ga-n pɛr, dɩ dɔ nɩ jɩ dakha bɔ jɩɩrɩkɛ a kɔɔ jɩ sɩnɩ ga-n pɛr. Ɔr hɩna i dʋbɩrɛ nɛnɛ̃ waa, gɩ jalna khorr.