1
1 Mɛr Pɩɛrɩkɛ dɔnɩ Jeju Kirisitii thɔ̃thɔn thɔna sɛbɛɛkɛ a ha nɛrɛɛkɛ Thãgba phiirni, kɛ bɩ̃bɩlanɛnɩ gɩrɛ a do kpakpala Pɔ̃, na Galasɩ, na Kapadɔsɩ, na Ajɩ, na Bitini.
2 Thãgba Thɩrɛ kɔɔ phire ni dɩɩ do ɔɔ thɩ̃ mãa jɩra gɩ ɩhe, Thu Phuu n lee nɩ kpɩɩ, na-n nɩ Jeju Kirisiti nũu, ɔɔ tɔmɩ̃ dakha na-n jɛbɩ nar. Thãgba na-n jɛ nɩ bʋɔra jɔɔ, a na-n hana nɩ dakha ha ɩɩ jɔɔ.
3 Thãgba asɩ Kɔ̃tɩ̃ Jeju Kirisitii Thɩ hɩna khɩɩrɛ, ɔɔ bɔ dona kɔ̃tɩnaakɛ a bironi kɔ̃ sɩ wo dɩɩ do Jeju Kirisitii khi ɩɩrra gɩ the, dɩ sa hana nũ pɛ yire,
4 dɩ sa 'lɛ dakha thɩ̃ɛɛkɛ na punoneni na kʋɛa', ga puno dakha na bisə', bɔɔkɛ gɩ bɔrnɩ ga puno wo a na deba', dɩ Thãgbaa dʋɔ gɩ thɩɩn anɩ thɩɩn,
5 nɛrɛɛkɛ pɩɛrnɩ haar dɩ Thãgba na-n bɛr nɩ na ɔɔ fãga nɩ puno nɩ 'lɛ taarɛɛkɛ na yɩranɩ dɩphã pɩpɩɩ bɔɔ.
6 Dɩ nɩ hana garɛ kãkar sɩrakɛ gɩ teenanɛ bɔɔ gbe nɩ yɛ bɔ gaar caar dɩɩdɩɩkɛ n hana nɩnɩ gbobire,
7 gɩ mɩɛ anɩ ha pɛ gɩ hɩɩn, kɛ ɔɔ the nɔ khɩɩrnɩ a jɔ dɛɛkɛ n kʋɛanɩ, kɛ wɩ-n gbanɩ dɔɔ dɩ wɩ mɩɛna hɩɩn, thale anɩ ha pɛ na hana khɩɩrɛ, a na do i dʋbɩ thɩ̃ɛ, na cʋ thɩ̃ɛ bɔɔraakɛ Jeju Kirisiti na-n mɩ.
8 Nɩ-n naarɛ sɩrakɛ na kɔɔ yɩa', na yɩɩnɩ gɩra', sɩ nɩ pɩɛrɛ haar, dɩ daʋʋkɛ na hanɩ mɩɛrɛra ga a kɔ̃tɩ̃ dakha ka n fʋ nɛr;
9 gɩdonɩ gɩrɛ na 'lɛnɩ anɩ ha pɛra pɩpɩɩ paar dʋɔn anɩ thɛthɛɛ taa.
10 Thãgbaa bobonaakɛ kɔɔ mɩanɩ bɔ jɩɩrɩdaakɛ Thãgba na jɩ nɩnɩ, kɔɔ ƴaalɛ ka a 'lo wɩ jɩ mɔ̃ taarɛɛdaalera hanɩ.
11 Kirisitii Thuukɛ hanɩ awɩ bɩnɔ kɔɔ mãa mɩɩrɛ Kirisitii bɔ gaarda na i dʋbɩrɛɛkɛ na kpa garnɩ, a mɩɩ wɛr dɩ wa-n 'lo wɩ jɩ bɔ ca dɔɔkɛ gelela na danɩ na mɔ̃ ga hanɩ.
12 Thãgba kɔɔ nɩ warɛ dɩ ga do wɛr na 'lɛ ga thɩ̃ɩlera wɩ-n mɩɩna', sɩ anɩda gɩ. Dɩ nɛnɛ̃, wɩrɛ n mɩanɩ tutugo bʋɔ na Thu Phuu fãgaakɛ thɛnɩ ƴũ kɔɔ mɩa nɩ ga thɩ̃ɩle. Dɩ Thãgbaa thɔ̃thɔ̃daar thusɔ yɛrɛrakɛ n ƴaalɛ wɩ kpu wa-n hɩɩn ga thɩ̃ɩlera.
13 Gɛr gɩ nɩ fɔ dɩbara anɩ kpɩɛrra, a na jʋrɛna, a na pɩɛrna bɔɔbɔɔ bɔ jɩ khaardaakɛ na 'lɛnɩ bɔɔraakɛ Jeju Kirisiti na ɩnɩ.
14 Mɔ̃kɛ nũ nɩdara n hanɩ, nɩ hana ɔmɛ̃. Na-n bir na hana thɩ̃ puu ƴaalɛɛkɛ n kɔɔ kɔ nɩnɩ thuee fɩl, mɔ̃kɛ nɩ kɔɔ hana gɩnɩ mamara bɔɔraakɛ nɩ kɔɔ donɩ yʋ 'leedara ga.
15 Sɩ mɔ̃kɛ ʋrɛɛkɛ kɔɔ wɛ nɩnɩ donɩ Tɩɩ phuu, nɛrɛ dakha nɩ deba a dɔ tɩɩ phuusɔ anɩ fɩlla fɛʋ.
16 Gɩdonɩ gɩ kherere Thãgbaa sɛbɛra ayɩ: «Nɩ pho gɩdonɩ mɛrɛ Tɩɩ phuu ha mɩ.»
17 Ado nɩ-n wer ʋrɛɛkɛ na-n hɩnɛnɩ tɩbɩla dɩɩdɩa' Thɩrɛ, kɛ dɔnɩ ʋrɛ na kɩlɛnanɩ tɩbɩla fɛʋ bɩɛlbɩɛl mɔ̃ awɩ thɔ̃ hanɩ, a nɩ jɩ na-n jɩɛ ɩɩr na maar anɩ yi hanana kɛ thɩɩra.
18 Gɩdonɩ nɩ jɩrɛ dɩɩ do, ga do thɩ̃ kʋɛnaakɛ dɔnɩ war na dɛ Thãgba kɔɔ birsena nɩ anɩ thɩthɩsɔɔ də̃bəəl fɩllaakɛ nɩ hanana',
19 sɩ Kirisitii tɔmɩ̃ɩkɛ dɔnɩ thɩ̃ kʋkʋʋ tə̃ə gɩ, mɔ̃kɛ a donɩ bana biikɛ na hananɩ taana', aa hana dakha jiinə'.
20 Thãgba kɔɔ mãa phiirəə kɛkɛkɛ sɩ thɩɩkɛ na fʋ tir pa', sɩ pɩpɩɩ bɔɔkɛ a gbaarɛ nɩna dɩphã dɩɩ do anɩda dɔ nɔɔ.
21 Ɔr dɔ nɔɔ nɩ pɛrɔnɩ gɩrɛ Thãgba haar, kɛ kɔɔ cʋgɛɛnɩ dɩ ɩɩr a the khirera, a cʋʋnaa dakha dɩ 'lɛ i dʋbɩrɛ, dɩ mɛ̃ anɩ ha pɛ na anɩ nũ pɛ na ha Thãgbara.
22 Anɩ nũukɛ nɩ-n nɩnɩ sobɔr, gɩ cʋʋ nɛr dɩ nɩ phu na-n jɩɩ na anɩ omisɔɔkɛ nɩ donanɩ kha ha pɛdara na naʋʋkɛ huloneni; na-n jɩɛ na kha bɩɛlbɩɛl sobɔr na haar fɛʋ,
23 nɛrkɛ Thãgba birni kɔ̃ kɔ̃ phaa sɩ ga do thɩ̃ diir kʋɛsʋ kɔna na', sɩ thɩ̃ diireekɛ na dɔnɩ dakʋɛnaa gaa gɩ, kɛ dɔnɩ Thãgbaa thɩmɩɩkɛ hananɩ yire, a dona dakha khorrdaa.
24 Gɩdonɩ gɩ kherere Thãgbaa sɛbɛra ayɩ: «Tibil hʋrɛ hʋɔn, dɩ ɔɔ ɓɔ̃ ɓibi ho hɔ̃ phɩ̃ɩ. Hʋɔn n khɩrɛ dɩ phɩ̃ɩ n jɛ,
25 sɩ Kɔ̃tɩnɩ thɩmɩɩ khorr gɩ ha.» Dɩ ga thɩmɩɩlera dɔ tutugo bʋɔɔkɛ kɔɔ mɩa nɩnɩ.