5
1 Dɩ nɛnɛ̃, nɛr lɛ̃lɛ, nɩ pɛ nũu, na-n khɩa a na bɛna lɩɛrɛra puureraakɛ na dana nɩnɩ.
2 Anɩ lẽle thɩ̃ n hɩrɛ dɩ ophɛphɛlɛɛ n khor anɩ kẽkẽsɔ.
3 Anɩ dɛ na anɩ war dɩrɛ dʋʋn, dɩ awɩ do dɩɩle ɩɩrɛ dɩ ga-n pɛ nar sor, dɩ gɛr na kʋɛa anɩ tomɩ mɔ̃ dɔɔ n hɩnɩ thɩ̃ɛ. Pɩpɩɩ bɔɔ gɩ, sɩ nɩ khɩɩrɛ thɩ̃ɛ a thɩɩn.
4 Nɩ hɩnɛ thɔ̃daraakɛ kɔɔ khanɩ anɩ jʋ sɩ nɩ tɔ̃ wɩ lɩmɩnɛ n hulene, dɩ jʋ khaa hulẽbirə jʋʋnɛ a lõ Kɔ̃tɩnɩkɛ dɔnɩ fãga koo hɩ̃daarɩ nũ kaar.
5 Nɩ hananɛ nũfe thɩ̃ɛ kɛ thɩɩra a too kãkarra; nɩ hire phi a khɔ̃, sɩɩ do kʋkʋ togʋʋ nɩ too.
6 Nɩ kɔɔ heene tɩɩ sarʋ sor a kʋ, sɩ aa kɔɔ so thɩ̃a'.
7 Na-n fɔ haar omɩna phaphapharakɛ Kɔ̃tɩn na bire na ɩ̃. Nɩ hɩnɛ kokol n fʋrɛ haar sɩ da-n pɩɛr phaphapha lɩɛra n haa thĩ bʋɔ. A-n fʋ garɛ haar waa dɩ thãgba khaa na pɩpɩɩ thãgba n dana.
8 Nɛrɛ dakha na-n fɔ haar ɔmɛ̃ a jɩlɛ kɩbɩ, gɩdonɩ Kɔ̃tɩnɩ ɩ̃ bɔ wɔrɔnɛ.
9 Na-n hũhuun na pɛ khasɔa' omɩna, dɩ mɛ̃ na 'lɛ kɩɩlʋa'. Nɩ hɩnɛ kɩɩldaar har lõfonɔɔ a jɩɩl.
10 Ɩ̃ omisɔ, nɩ gba Thãgbaa bobonasɔɔkɛ kɔɔ mɩanɩ thɩ̃ɛ Kɔ̃tɩnɩ irəə bɔ gaar na awɩ ha fʋ, gɩ do nar thɩ̃ nɩrɔrɛ.
11 Nɩ hɩnɛ, sɩ-n sor dɩ sɩ yɩ: Gɩ da wɩrɛraakɛ kɔɔ gaarɛnɩ bʋɔ na ha fʋrɛ. Nɩ kɔɔ nɩɛrɛ mɔ̃ Jɔbɩ kɔɔ fʋnɩ haar, dɩ nɩ jɩrɛ dakha gɩrɛ Kɔ̃tɩn kɔɔ cʋʋraanɩ pɩpɩɩ paar, gɩdonɩ bɔ fʋdaar Kɔ̃tɩn do na bɔ jɩdaar.
12 Thɩ̃ kɔ̃tɩɩnakɛ ɩ̃ omisɔ dʋɔn, na-n ʋlfɛna thãgbara ƴũ dɩ thɩɩkɛ ga; na-n ʋlfɛna dɩkhaa thɩ̃ kpɩɩraka', sɩ nɩ dɔ anɩ «ɔɔ» n do «ɔɔ», anɩ «ooho» n do «ooho», dɩ mɛ̃ na 'lɛ kɩɩlʋa'.
13 Tibil ʋkha har anɩ thɩ̃thɩɩn da-n gaar bʋɔ ya? Ntɛ na-n bɩɛlnɛ Thãgba. Tibil ʋkha hale dɩ daʋ fʋʋ ya? Ntɛ na-n khɩna Thãgba nɩɛ.
14 Tibil ʋkha har anɩ thɩ̃thɩɩn dɩ ga-n khʋʋ ya? Dɔ ntɛ n we we gbɛbɩdaraa kɔ̃tɩ̃sɔ dɩ wa bɩɛl Thãgba na pɩɛraa wɩ pɛnanaa niin na Kɔ̃tɩnɩ i.
15 Ha pɛ bɩɛlɛ na taarɛ khodaar dɔɔ, dɩ Kɔ̃tɩn na cʋgʋʋrɛ dɩ na ɩɩr, dɩ ado a cʋʋrɛ sopugo Thãgba na faarɛ na haa.
16 Gɛr gɩ na-n cana kha sopugosɔ, sa bɩɛlnɛ Thãgba na pɛ khasɔ, mɛ̃ khoo na kpɛɛ nar. Tɩɩ sarʋʋ Thãgba bɩɛl hananɛ fãga ka dɩɩ cʋʋ thɩ̃ɛ.
17 Tibil Elɩ do dakha mɔ̃kɛ sɩ hanɩ, sɩ a kɔɔ bɩɛlɛ Thãgba na yɩrrɛ ƴɛrr thãgba nyʋɔn na-n ɩ̃a', dɩ thãgba na kɔɔ ɩ̃ ger dɩɩ cʋʋna yɛna yẽther na pora maadõa'.
18 Sɩ agɩpɩ a bire bɩɛl Thãgba dɩ thãgbara ƴũ 'laa nyʋɔn dɩphã dɩ thɩɩ bir phu thɩ̃ɛ.
19 Ɩ̃ omisɔ, ado tibil ha anɩ thɩ̃thɩɩn a lɛ̃ sa faa sobɔr dɩ tɩɩ kpɩɩ bir kpaa a pɛ hʋɛra,
20 nɩ jɛna dɩ ntɛɛle na kpanɩ sopugodaar dɔɔle ɔɔ bu pa a na birnə, tibil a taa khirrə, dɩ ga dor sopugo jɔjʋɔ thero.