1
1 Mamara Thãgbaa bobonaa nɔ Thãgba kɔɔ gba bɔɔ dɩɩdɩɩra na thɩmɩɩ ƴɩɛ dɩɩdɩɩ a mɩɩna asɩ mama thɩ kɔ̃tɩ̃sɔ,
2 sɩ pɩpɩɩ bɔɔraakɛ Bikuun a gba a mɩɩna sɩ, kɛ dɔnɩ ʋrɛɛkɛ a pɛrnɩ dɩ do thɩ̃ɛ fɛʋʋ hɩ̃hɩ̃, ɔrra dakha a gba a tinə thɩɩ na ƴũ.
3 Ɔɔ pa Thãgbaa i dʋbɩɩkɛ kɔ̃tɩnanɩ n yɩr; ɔɔ pa tibil na yɩ gbelẽ gbelẽ mɔ̃ Thãgba dʋʋr hanɩ; ɔɔ nɔ thɩmɩɩkɛ hananɩ fãga ka a fʋna thɩ̃ɛ fɛʋ dɩɩ jɩɩl. Ɔr kɔɔ cʋɛ sopugo hɛl thɔma sa too gɩrɛ Thãgba dawabʋʋ nyɔ̃bɔra le ƴũ pər.
4 Mɛ̃ Bikuun kɔ̃tɩ̃ a jɔ thɔ̃thɔ̃daar thusɔ fĩi, mɔ̃ a 'lɛnɩ ireekɛ kɔ̃tɩnanɩ dɩɩ jɔ awɩda.
5 Gɩdonɩ ʋmɔ̃ɔ thɔ̃thɔ̃daar thu Thãgba kɔɔ sor ayɩ: «Fɛr dʋɔn ɩ̃ Bikuun, mɛr Thãgba kɔna fɩ nĩ gɩrɛ.» Wo: «Ma dʋʋraarɛ Thɩrɛ a do mar Bikuun.»
6 Dɩ ɔbɔɔkɛ a birni thɔ̃ ɔɔ caca Bikuun thɩɩraakɛ a sor ayɩ: «Dɔ Thãgbaa thɔ̃thɔ̃daar thusɔ fɛʋ n gburõku wa-n fʋɔrʋʋ.»
7 Sɩ thɔ̃thɔ̃daar thusɔɔdara wer a sor ayɩ: «A-n cʋʋrɛ ɔɔ thɔ̃thɔ̃daar thusɔ dɩ wɩ do jɩɛ, dɩ cʋʋ dakha ɔɔ thɔ̃dara dɩ wɩ do dɔlɩnanɛ.»
8 Sɩ Bikuunida wer a sor ayɩ: «Afɩ fãga too pa ya Thãgba, khorrdaa gɩ waa vʋ̃ʋ. Afɩ fãgadaar do, fɩl sar fãgadaar dʋʋr gɩ.
9 Fɩ nar fɩl sarʋ sa laar fɩl gõgolõ, gɛr gɩ Thãgbaakɛ dɔnɩ afɩ Thãgba phiir fi, mɔ̃ a bʋl fɩnɩ niin, kɛ dɔnɩ da niin, dɩ fɩ jɔr gɩrɛ afɩ kuunsɔ fɛʋ.»
10 Wo: «Fɛr Kɔ̃tɩn, kɛkɛkɛra fɛr kɔɔ te thɩɩ, dɩ thãgbara ƴũ dɔ thɩ̃ɛɛkɛ fɩ cʋʋnɩ na afɩ nyɛ̃.
11 Gelesɔ ga kʋɛrɛ, sɩ fe wer fɩ toonɩ fɩ toore, ga tɩnɛsɔ fɛʋ kẽkẽ khaa.
12 Fa pur gersɔ kʋla kʋla dɛbɛ khaa, dɩ ga debire kẽkẽ khaa. Sɩ fe wer ɔmɛna fer toorakɛ a ha, afɩ yɛ na hana ga pɩra'.»
13 Dɩ ʋmɔ̃ɔ thɔ̃thɔ̃daar thu Thãgba kɔɔ sor ayɩ: «Tɔɔ ɩ̃ nyɔ̃bɔra phaphapha ɩ̃ cʋʋ afɩ lãlaardara wɩ do afɩ nɛ jəəda.»
14 Ga do thuesɔ wɩ do fɛʋ a ha Thãgbaa thɔna, dɩ thɔ̃ wɩ wa-n bulo wɩrɛ teananɩ wɩ 'lɛ taaraa?