2
1 Gɛr dɔ kɩrʋ gɩ teenanɛ sa-n bãbanɛ a jɩɛ mar yʋʋ gɩrɛraakɛ sɩ kɔɔ nɩɛnɩ, a ga ha mã', sa tɔr na khokhɩa gar.
2 Gɩdonɩ ado thɩmɩɩrɩkɛ thɔ̃thɔ̃daar thusɔ kɔɔ mɩɩnɩ gɩ kɔɔ nɩnanɛ dɩ sobɔr gɩ do, dɩ ado jɔfʋ kʋɛrɛ fɛʋ na nũ nʋʋrɛ fɛʋ kɔɔ 'lɛr sor dɩɩ tee kha,
3 sɛrɛ mɔ̃ sa fuu ado sa-n pər taarɛraakɛ kɔ̃tɩnanɩ thaka? Kɛ dɔnɩ gɩrɛ Kɔ̃tɩn kɔɔ ɩɩrnanɩ a mɩɩ, dɩ wɩrɛ kɔɔ nɩɛnɛnɩ bir gba a mɩɩ sɩ dɩ sobɔr gɩ do.
4 Thãgba kɔɔ gbaar jɩɩnsɔ, na ma kʋ thɩ̃ɛsɔ, na nɔ kpaa thɩ̃ɛsɔ dɩɩdɩɩ, na Thu Phuu khaardasɔɔkɛ a-n tɩnɛnɩ mɔ̃ a-n ƴaalnɩ, a gba gɛr a nɩnana dɩ gɩrɛra wɩ-n mɩɩnɩ sobɔr gɩ.
5 Gɩdonɩ ga do thɔ̃thɔ̃daar thusɔra Thãgba kɔɔ jo thɩɩkɛ na ɩnanɩ, kɛ sɩ-n mɩɩnɩ gɩra'.
6 Mee ʋkha ka kɔɔ mɩɩrɛ dɩkhãa pa Thãgbaa sɛbɛra ga thɩmɩɩ ayɩ: «Anye tibil do dɩ fɩ jɩnaa dɩ tibil bɩsaan gɩ dɩ fa hɩɩn?
7 Fɩ kɔɔ wuruure bɔɔ gbe dɩ 'lũ a jɔ thɔ̃thɔ̃daar thusɔ. Fɩ kɔɔ haarɛ i dʋbɩrɛ na cʋrɛ.
8 Fɩ cʋʋrɛ thɩ̃ɛ fɛʋ dɩɩ jʋʋraa dɩ jəəro nɛɛ.» Gɩdonɩ mɔ̃ Thãgbara cʋʋnɩ thɩ̃ɛ fɛʋ dɩɩ jʋʋraa, thɩ̃ɛ na hale kpɩɩrakɛ sɩɩ do ga jʋʋraa gaaga. Sɩrakɛ sa yɩɛ nɛnɛ̃ pɩ mɔ̃ thɩ̃ɛ fɛʋra jʋʋraana'.
9 Sɩ Jeju sɩ yɩ, kɛ dɔnɩ ʋrɛɛkɛra Thãgba kɔɔ wurni bɔɔ gbe dɩ 'lũ a jɔ thɔ̃thɔ̃daar thusɔ, dɩ mɛ̃ a na puno na khi tɩbɩla fɛʋʋ sora, gɩ do Thãgbaa bɔ jɩ dɔ nɔɔ, sɩ nɛnɛ̃ sɩ yɩɩrɛ mɔ̃ a 'lɛnɩ i dʋbɩrɛ na cʋrɛ, dɩɩ do khirikɛra a kɔɔ khini dɔ nɔɔ.
10 Mɔ̃ Thãgba na fʋnɩ sɩɩ do a cʋʋrɛ bikona jɔɔ dɩ wɩ 'lɛ i dʋbɩrɛ, gɛr gɩ dɩɩ tee kha dɩ ɔrkɛra tenɩ thɩ̃ɛ fɛʋ, kɛ fɔnɩ dakha thɩ̃ɛ fɛʋ dɩɩ jɩɩl, kɔɔ gba bɔ gaarɛ a leena khal khaa ʋrɛɛkɛ dɔnɩ kɔ̃tɩnɩkɛ wa 'lɛrɔnɩ taarɛ.
11 Gɩdonɩ ʋrɛɛkɛ n cʋɛnɩ tibil dɩ phu, na wɩrɛɛkɛ phonɩ, Thɩ bɩɛlla wɩ the fɛʋ, gɛr dɔ kɩrʋ dɩ yicuru na-n fʋ Jeju mɔ̃ a na we wɩnɩ õkona ga.
12 Dɩ gɩ har mɔna a sonɩ ayɩ: «Ma-n mɩɩrɛ ɩ̃ õkuunsɔ afɩda, ma-n khɩɩ fɛr kpa jɛdaraa thɩ̃thɩɩn.»
13 Wo: «Mɛrɛ ma faarɛ ɩ̃ ha a na ha Thãgba.» Wo: «Mɛr ha ʋ na bɩsanaakɛ Thãgba kɔɔ ha mɩnɩ.»
14 Gɛr gɩ gɩrɛ gɩdonɩ tɔmɩn na tomɩr bɩsana n hana, mɛ̃ Jeju kɔɔ hana gɩ dakha a puno a khi gɩ kʋkʋʋl ʋrɛ hɩnanɩ fãgaakɛ dɔnɩ khidaa, ɔr dɔ Satã;
15 dɩ mɛ̃ Jejura na-n taa wɩrɛ fɛʋʋkɛ khir n kʋnɩ maar dɩɩ do dee paar gɩ pɛ wɩ awɩ yi hanana fɛʋ.
16 Gɩdonɩ sobɔr gɩ, ga do thɔ̃thɔ̃daar thusɔ dɔ wɩrɛ a na-n bulnə', sɩ gɩ kherere Thãgbaa sɛbɛra ayɩ: «Abɩrahamɩ məlsɔ dɔ wɩrɛ a na-n bulni.»
17 Gɛr dɔ kɩrʋ dɩɩ tee kha dɩ kɔɔ debi a ho ɔɔ õkuunsɔ thɩ̃ɛ fɛʋra, dɩ mɛ̃ a do gbõdaarɩkɛ na-n jɩɛnnɩ tibil bʋɔra, kɛ dɔnɩ sobɔdaar Thãgbaa thɔna, a na-n do sopugo hɛl thɔma tɩbɩlala.
18 Gɩdonɩ mɔ̃kɛ a kɔɔ yɩnɩ gaarɛ fifiləlela fɛʋʋkɛ a kɔɔ yɩnɩ, a hananɛ punone a na-n bulnə wɩrɛ n yɛnɩ fifiləle.