3
1 Gɛr gɩ, omi phuusɔ, nɛrɛɛkɛ dakha Thãgba wenɩ, na-n hɩnɛ Jejuukɛ a thɔnɩ dɩ do gbõdaar asɩ ha pɛdara,
2 kɛ dɔnɩ sobɔ cʋʋ tibil Thãgbaraakɛ kɔɔ pɩɛraanɩ mɔ̃kɛ Mʋɩjɩ dakha kɔɔ donɩ sobɔ cʋʋ tibil Thãgbaa cɔra fɛʋ.
3 Gɩdonɩ gɩ teenaanɛ mɔ̃ a 'lɛnɩ i dʋbɩrɛ a jɔ Mʋɩjɩ mɔ̃kɛ cɔ mɩ n 'lɛnɩ ire dɩ jɔ cʋɔr thɛthɛ.
4 Cʋɔr wo cʋɔr sɩ mɩmɩ n hale, dɩ ʋrɛ mɛnɩ thɩ̃ɛ fɛʋ Thãgba gɩ.
5 Sɩ Mʋɩjɩ wer mɔ̃ a donɩ thɔ̃ don, a dor sobɔ cʋʋ tibil Thãgbaa cɔra fɛʋ, gɩ do gɩrɛ n nɛnanɩ gɩrɛ teananɩ gɩ mɩa.
6 Mɛ̃ Kirisiti ha dakha ɔɔ cɔ, sɩ Bikuun or do; dɩ ɔɔ cɔra sɛr gɩ, ado sɩ jɩɛ fʋrɔ tu jɩɩrɩkɛ sɩ hananɩ dɩɩ ma, na nũ pɛrɛɛkɛ sɩ-n kãkarɔnɩ.
7 Gɛr gɩ, gɩ har mɔ̃kɛ Thu Phuu sonɩ ayɩ: «Nĩ, ado nɩ nɩɛ ɔɔ wi,
8 na-n do anɩda n khɩɩr mɔ̃kɛ gɩ kɔɔ hanɩ bɔɔraakɛ nɩ kɔɔ ɩɩrnanaanɩ cɩ̃cɩmanɛ, na bɔɔraalera nɩ kɔɔ fifiləəni bəənnə a hɩɩna'.
9 Liir anɩ mama thɩ kɔ̃tɩ̃sɔ kɔɔ fifilə mi a hɩɩn, wɩ kɔɔ jʋʋr mer a hɩɩn, sɩ wɩ kɔɔ yɩrɛ mɔ̃ ɩ̃ thɔ̃ hanɩ a cʋʋna yɛna kpalanyɔ.
10 Gɛr gɩ dɩ nĩkhii kɔɔ fʋ mɩ wa bɔɔ tibil casɔraale, dɩ ɩ̃ so ayɩ: Kpɩɛrɛ lɛ̃ wɛr waa khorr; wa kɔɔ jɩ ɩ̃ hʋa'.
11 Gɛr gɩ dɩ ɩ̃ kɔɔ ʋlfɛ mɔ̃ nĩkhii fʋ mɩnɩ ayɩ: Wa lõ ĩ hɩɩrra kpɩɩraka'.»
12 Omɩna, na-n jɩɛ hɩɩn dɩ tibil anɩ thɩ̃thɩɩn na-n hana ha puukɛ dɔnɩ so bo haar, a ba kɛr a bir sa faa Thãgba yidaara'.
13 Sɩ na-n kpãkpaanɛ kha bɩɛlbɩɛl wire wire, mɔ̃ na punoni na so nayɩ: «Nĩkɛ», gɩ do mɛ̃ tibil na ha anɩ thɩ̃thɩɩn sopugo n fɩɩlʋʋ ɔɔda n khɩɩra'.
14 Gɩdonɩ sɩ debire a do wɩrɛ hɩnanɩ kha na Kirisiti gɩrɛ a hananɩ, ado sɩ jɩɛ fʋ kĩkĩ a dana khu paar tu jɩɩrɩkɛ sɩ kɔɔ hananɩ caca fʋ paar,
15 mɔ̃kɛra gɩ kherenɩ Thãgbaa sɛbɛra ayɩ: «Nĩ, ado nɩ nɩɛ ɔɔ wi, na-n do anɩda n khɩɩr mɔ̃kɛ gɩ kɔɔ hanɩ bɔɔraakɛ nɩ kɔɔ ɩɩrnanaanɩ cɩ̃cɩmana'.»
16 Gɩdonɩ ana dɔ wɩrɛɛkɛra kɔɔ nɩɛnɛnɩ sa ɩɩrnanaa cɩ̃cɩmanɛ? Ga do wɩrɛ fɛʋʋkɛra Mʋɩjɩ kɔɔ kpanɩ dɩ wɩ the Ejipiti dɩɩra gaa?
17 Dɩ anara nĩkhii kɔɔ fʋ Thãgba yɛna kpalanyɔ saagado wɩrɛ kɔɔ cʋɛnɩ sopugo a thii le bəənnə ga?
18 Dɩ anara a kɔɔ ʋlfɛ ayɩ, wa lõ ɩnɩ hɩɩrra ga, ga do wɩrɛ kɔɔ nʋrɛnɩ nũu gaa?
19 Mɛ̃ sɩ yɩɛ dɩ wa kɔɔ puno a lõa' gɩdonɩ wɩ 'leere ha pɛrɛ.