4
1 Nɛnɛ̃ gɩrɛ, ʋlfɛrɛɛkɛ Thãgba kɔɔ ʋlfɛna sɩnɩ sɩ lona ɩnɩ hɩɩrra, gɩ hale 'lo, gɛr gɩ dɔ maar na-n fʋ sɩ tibil bɩɛl nɛrɛra na-n 'lee ga hɩɩrɩla'.
2 Gɩdonɩ wɩ kɔɔ mɩɩ sɛr tutugo bʋɔɔ thɩmɩɩ mɔ̃kɛ wɩ kɔɔ mɩɩ wɩnɩ, sɩ thɩmɩɩrɩlera wɩ kɔɔ nɩɛnɩ ga kɔɔ cʋʋ wɩ thɩ̃a', gɩdonɩ ga kɔɔ caanna ha pɛrɛ wɩrɛraakɛ kɔɔ nɩɛnɛna'.
3 Sɩ ado sɛrkɛ pɩɛrnɩ haar gɩ, sɩ lʋʋn ɔɔ hɩɩrra, mɔ̃kɛra a sonɩ ayɩ: «Gɛr gɩ dɩ ɩ̃ kɔɔ ʋlfɛ mɔ̃ nĩkhii fʋ mɩnɩ ayɩ: Wa lõ ɩ̃ hɩɩrra kpɩɩraka'.» Sɩɩ dorakɛ a fʋna bɔɔkɛ a kɔɔ tini thɩɩ ɔɔ thɔ̃ kɔɔ mãa pɩrɛ.
4 Gɩdonɩ gɩ mɩɩrɛ pa bɩɛl ɔɔ sɛbɛra wire makonyɔɔda ayɩ: «Wire makonyɔra Thãgba kɔɔ hɩɩr ɔɔ thɔnaakɛra fɛʋ a kɔɔ cʋʋnɩ.»
5 Dɩ a bire so ga thɩmɩɩra ayɩ: «Wa lõ ɩ̃ hɩɩrra kpɩɩraka'.»
6 Hʋɛ phɩnɛ dɩphã casɩ ɩkhasɔra dɩ wa puno na lõ ga hɩɩrraale, dɩ gɩdonɩ wɩrɛ kɔɔ dɔnɩ cacadaraakɛ kɔɔ nɩɛnɛnɩ tutugo bʋɔɔ thɩmɩɩ, nũ nʋʋrɛ kɔɔ dor nɔɔ dɩ wa lõa',
7 Thãgba bire gɩrɛ dɩphã a pɛr wi kpɩɩ wo, kɛ ɔɔ i n donɩ «Nĩkɛ», dɩ gɩ ɩnɩ na pʋɔr a cʋʋrɛ Davɩdɩ dɩ mɩɩ ga thɩmɩɩkɛ kɔɔ sɔnɩ ayɩ: «Nĩ, ado nɩ nɩɛ ɔɔ wi, na-n do anɩda n khɩɩra'.»
8 Gɩdonɩ ado Jojue kɔɔ ha wɛr hɩɩrɛ, gele pɩrɔnɩ Thãgba na bir na mɩɩ wi kpɩɩda bã.
9 Sɩ hɩɩrɛ hale wire makonyɔ wire Thãgba thɩɩnnɩ ɔɔ toora.
10 Gɩdonɩ ʋrɛ lonanɩ Thãgbaa hɩɩrra, a-n hɩɩrɛ dakha ɔɔ thɔna mɔ̃kɛ Thãgba hɩɩrnɩ ɔɔdara.
11 Gɛr gɩ sɩ yɩra a lona hɩɩrɛraale, dɩ tibil bɩɛl na-n lõ ga nũ nʋʋr caraale a 'lea'.
12 Gɩdonɩ Thãgbaa so hananɛ yire, gɩ-n cʋʋrɛ dakha thɩ̃ɛ, gɩ-n kher a jɔ bajɩna wo bajɩnaakɛ n khɛnɩ ƴɩɛ yenyɔ, gɩ-n gɔr phaphapha dɩɩ tɩnɛ haar na thue, dɩɩ tɩnɛ ƴɔɔ pa na khuu niin, gɩ-n pəlle tibili bɩ̃ na ɔɔ ha kpɩɛr.
13 Thɩ̃ bɩɛl na hale a ker dɩ aa yɩ gaaga, sɩ thɩ̃ɛ fɛʋ toore gbelẽ gbelẽ a yɩr casɩ ɔɔ ƴɛra, kɛ dɔnɩ ʋrɛ sa mɩɩrɔnɩ asɩda.
14 Mɛ̃ gɩ gɩdonɩ sɩ hananɛ gbõdaar kɔ̃tɩ̃ bɩɛlɩkɛ kɔɔ kpãsɛnɛnɩ thãgbara ƴũ, kɛ dɔnɩ Jeju Thãgbaa Bikuun, sɩ jɩɛ jɩɩl kɩbɩ ha pɛrɛraakɛ sɩ canɩ.
15 Gɩdonɩ gbõdaarɩkɛ sɩ hananɩ, ga do gbõdaar gɩɩkɛ na-n punoneni a na-n pər asɩ yɔɔra gaaga, sɩ ɔr, a kɔɔ yɩrɛ fifiləle asɩ kha thɩ̃ɛ fɛʋra, sɩ aa cʋʋ sopugoə'.
16 Gɛr gɩ sa-n wɔrɔnɛ na tu jɩɩr Thãgbaa fãga too pa, ka bɔ jɩɩr hanɩ, mɛ̃ sa 'lɛ bɔ donanɛ, sa-n 'lɛna dakha bulle thɩ̃ ɓɔr bɔɔ ga-n the ɔɔ bɔ jɩra.