1
1 Mɛr Jakɩɩkɛ dɔnɩ Thãgbaa thɔ̃daar na Jeju Kirisiti Kɔ̃tɩnɩda, thɔna sɛbɛɛkɛ a fʋɔrna caar yʋɔr yenyɔɔkɛ bɩ̃bɩlanɛnɩ a ha paar fɛʋ.
2 Ɩ̃ omisɔ, bɔ gaar caar dɩɩdɩɩkɛ nɩ-n yɩnɩ, nɩ gba gɩ ga-n do nar da kɔ̃tɩ̃ɩ,
3 na-n jɩnana, ado anɩ ha pɛ bo jɩɩl ɔbɔɔkɛ nɩ 'lɛnɩ bɩ̃ ber pɩ, ga dor gɩrɛ na hana nɩhɩ ha fʋrɛ;
4 dɩ nɩ dɔ ha fʋrɛ n do ɔɔ thɔ̃ gɩ jɩɩ dã, nɩ jɩɩ bɔr nɩ ka nɩ dã, na thʋ̃ thɩɛna ga.
5 Dɩ ado tibil bɩɛl nɛrɛra 'lee kpɛsɛrɛ, dɔ ntɛ n bɩɛl Thãgbaraakɛ n 'laanɛnɩ na haar sɩ phaanɛ na-n hala', dɩ Thãgba na haarɛ.
6 Sɩ a bɩɛlnɛ gɩ na ha pɛrɛ sɩ a na-n baalɔ fɩɩʋraka', gɩdonɩ ʋrɛɛkɛ n baalɔnɩ a hʋrɛ lanyɔ̃ khɔrɔ̃ɔkɛ jɩɛ n benɩ dɩ ga-n phe bababa.
7 Tibil ca ole na-n kpɩɛr ɩna 'lɛr dɩkharakɛ Kɔ̃tɩnɩ pa ga.
8 Tibil gɩɩkɛ n ƴeƴerenenɩ, aa-n jɩɩl pa bɩɛla'.
9 Dɔ omineekɛ wa-n thernana' na-n kãka ɔɔ ɩɩrra,
10 dɩ lẽle dakha na-n kãkanɛ ɔɔ wurrə; lẽle dor ʋrɛ na phɔnɩ na ka hɔ̃ phɩ̃ khaa.
11 Wireekɛ n phananɩ na kporre phãphãphã a-n khɩrɛ hʋɔn, dɩ phɩ̃ɩ n jɛ dɩɩ do ɔɔ ɓɔ̃ kʋɛrɛ koo; mɛ̃ lẽle na ɔ̃'ɔɔlɔ̃ ɔɔ thɩ̃ cʋʋ pa a na jɛ.
12 Gɩ da tibilləəkɛ n fʋɔnnɩ haar fifiləlela, gɩdonr ado a 'lɛ bɩ̃ ber pɩ, a na 'lɛr khor cacadaar dʋʋrra, kɛ dɔnɩ yidaa, kɛ Kɔ̃tɩn kɔɔ ʋlfɛnɩ ɩna har wɩrɛ n naan nɩnɩ.
13 Sɩ ɔbɔɔkɛ tibil n yɩnɩ fifiləle a na-n yɩ, Thãgba n fifiləne na'; gɩdonɩ Thãgba na ha fifilə paar puure n dʋʋraa fifɩləla', dɩ ɔɔ thɛthɛrakɛ na-n fifɩlə tibilə'.
14 Tibil n 'lɛr fifiləle ɔbɔɔkɛ thɩ̃ puu ƴaalɛ n kʋʋnɩ thue dɩɩ fʋʋ a ɩɩrɔ.
15 Dɩ ado thɩ̃ puu ƴaalɛɛlera hana pɛmɛr sopugo a-n kɔ̃, dɩ a sopugo kɔ̃ pɩ dɩɩ do khir a kɔ̃.
16 Ɩ̃ omisɔɔkɛ mɩ-n nanɩ na-n dədəa koe;
17 thɩ̃ bɔɩ fɛʋʋkɛ sɩ-n 'lɛnɩ na khaarda ɓɔna fɛʋ ƴũ gɩ the dahɩrɛ Thɩrɛɛ pa, kɛ na dɔnɩ dadebinaa ga, aa-n file mɔ̃ jəəre n filena'.
18 Ɔɔ thɛthɛɛ ƴaalla gɩ the dɩ kɔ̃ sɩ dɩɩ do sobɔ thɩmɩɩrra gɩ the, dɩ mɛ̃ ga do sɛr hʋɔn cacadara ɔɔ thɩ̃ tinəsɔraakɛ a tini.
19 Gɛr gɩ ɩ̃ omisɔɔkɛ mɩ-n nanɩ, dɔ tɩbɩla fɛʋ bɩɛlbɩɛl na-n pɛ thɩmɩɩr nũu kɔrɔ, sɩ wa-n phana kɔrɔ a na mɩɩ thɩ̃a', wa-n phana kɔrɔ a na gba nĩkhiə'.
20 Gɩdonɩ tibil nĩkhii na-n cʋʋ dasarʋʋkɛ Thãgba n ƴaalnɩ ga-n cʋɛa'
21 Gɛr dɔ kɩrʋ, nɩ dɔna thɩ̃ bise fɛʋ na bɩ̃ kpallɛsɔ fɛʋ a faa, sɩ na tea na hɛlɛlɛ fɩlɛ sorɩkɛ n direni anɩ bɩnɔ, kɛ hananɩ fãga a na taa nɩ.
22 Na-n dɔ Thãgbaa so cʋʋdara, na-n do nũ pɛdara dɩbara gɩ ho dɩbara nɩ-n fɩɩla'.
23 Gɩdonɩ ado tibil na pɛ Thãgbaa so nũu sɩ aa-n cʋa', a hʋrɛ tibilikɛ n hɩnɛnɩ ɔɔ ƴɛ hɩɩnʋna dɩ jɩ mɔ̃ a hanɩ.
24 A a hɩɩn sɩ na tɔ gbe dɩɩ do a diinəne dapaara mɔ̃ a hanɩ.
25 Sɩ ʋrɛɛkɛ ganɩ ɔɔ yi jɔfʋ ɓʋɔna, kɛ dɔnɩ wa do jɔfʋ da-n yɩrrɔ, dɩ ga-n do aa-n pɛ nũu a bir a diinə ga, sɩ a na-n cʋʋ gɩrɛ gɩ-n sonɩ, wa tibil caale na 'lɛr bɔnanɛ ɔɔ cʋʋrara a-n cʋʋnɩ.
26 Ado tibil yɩ Thãgba fɔr ha nɩ, sɩ aa-n fʋ ɔɔ delẽbi bɔɔbɔa', ɔɔbara a-n fɩɩl, ntɛɛ Thãgba fʋɔrɩle mɔlɔ gɩ.
27 Thãgba fʋɔr bʋɔɔkɛ na hananɩ dɩ paar Thãgba Thɩrɛɛ ƴɛra ga dʋɔn khilə̃bi hɩɩnɛ na khikhɛra awɩ bɔ gaarra, fɩ fʋna dakha dɩbara fa bise na thɩɩkɛɛ thɩ̃ bisə'.