2
1 Ɩ̃ omisɔ, nɛrkɛ pɛnɩ haar asɩ Kɔ̃tɩ̃ Jeju Kirisitiraakɛ dɔnɩ i dʋbɩdaar, na-n hana tibil hɩɩnɛ dɩɩdɩa'.
2 Ado tibilikɛ tɔnɩ dɛ nyɛ̃bi tʋʋ na kẽkẽ ɓʋ̃ɔ, kɛ dɔnɩ lẽledaar lõ anɩ gbɛbɩ pa, dɩ a bɔdaar dakha to ɔɔ kẽkẽ sɛlɛ a lona,
3 dɩ ado nɩ hɩɩnɛ ʋrɛ tɔnɩ kẽkẽ ɓʋ̃ɔɔle a sʋʋraa ayɩ: Tɔɔ kɩɛr too pa ɓʋɔnaakɛ lee; sa ka so bɔdaarra: Fer n jɩlɛ liir; agɩbo: Tɔɔ kɩɛr thʋnɔ ɩ̃ nɛ ballɔ.
4 Ga do gele n dɔ tibil hɩɩnɛ dɩɩdɩɩ anɩ thɩ̃thɩɩnaa? Dɩ ga do kɩɩl gõgolõ nɩ-n kɩɩlaa?
5 Ɩ̃ omisɔɔkɛ mɩ-n nanɩ, nɩ pɛ nũu: Thãgba na kɔɔ phiir wɩrɛ dɔnɩ bɔdara thɩɩraakɛ dɩ wa debi na do lɛ̃lɛ ha pɛdaara na wɩrɛ na lonanɩ Thãgba fãgadaarɩ dɩraakɛ a kɔɔ ʋlfɛnanɩ wɩrɛ n naanɛɛnaa?
6 Sɩ ner na-n beesi bɔdaarɩ. Ga do lɛ̃lɛ n hʋɔlɛ nar dɩ wɩ pɛ nar nyɛ̃ kheu a haal nɩ na jalna kɩɩl paarraa?
7 Ga do wɛr n kpɛ i ɓʋ̃ɔɔkɛ wɩ ha nɩnaa?
8 Ado ger nɩ-n cʋʋrɛ gɩrɛ Thãgba fãgadaar jɔfʋ sonɩ ɔɔ sɛbɛra ayɩ: «Fa-n na afɩ 'walãkha tibil mɔ̃kɛ fɩ-n nanɩ afɩbara», ga dor nɩ-n cʋʋrɛ bɔɔ.
9 Sɩ ado nɩ hananɛ tibil hɩɩnɛ dɩɩdɩɩ sopugo nɩ-n cʋʋ, dɩ jɔfʋ na heen ner sor anɩ nũ nʋʋrra.
10 Gɩdonɩ tibil wo tibilikɛ n hɩnɛnɩ jɔfʋ fɛʋ sɩ a a dɩ jɔfʋ bɩɛlla 'lẽ'lẽ'lẽ, jɔfʋ fɛʋ a dɩrɔ.
11 Gɩdonɩ ʋrɛɛkɛ sɔnɩ ayɩ: «Fa-n hana khɛ kpɩɩ ƴaala', fa-n hana kũu kpɩɩ ƴaala'», ɔrra sɔ dakha wo ayɩ: «Fa-n kʋ tibilə'.» Dɩ ado fa-n ƴaal khɛ kpɩa', fa-n ƴaal kũu kpɩa', sɩɩ do tibil fɩ kʋ, jɔfʋ kʋɛdaarra fɩ do.
12 Mɛ̃ gɩ na-n mɩa thɩmɩa a na cʋɛna thɩ̃ɛ mɔ̃kɛ nɩ donɩ tɩbɩlaakɛ wa do jɔfʋ na kɩɩlnanɩ.
13 Gɩdonɩ ʋrɛɛkɛ na hananɩ bɔ jɩɩra', ɔɔ kɩɩlɩkɛ a na 'lɛnɩ ga hana bɔ jɩɩr dakha ga, dɩ bɔ jɩɩr n punone kɩɩlʋ.
14 Ɩ̃ omisɔ, anyee bɔ ca ga taa tibil da so nayɩ, ɩnɩ hananɛ ha pɛrɛ, sɩ gɩ do thɩ̃ cʋʋrɛ na hala'. A na punone na 'lɛ taarɛ na ha pɛ ca ole ya?
15 Ado õkona wɛ, a õkhɛna wɛ a 'lee kɩ̃kɩɩn, a 'leena wire fɛʋ dɩkɔ,
16 dɩ tibil bɩɛl nɛrɛra so war ayɩ: Nɩ kɔna bɔɔ, a tɔ kɩ̃kɩɩn gɩ kpor nar, a khɔna dakha dɩkɔ a he; sɩ na ha wɩ gɩrɛ teananɩ gɩ bul wa', anyee bɔ ca gele na taa?
17 Mɛ̃ gɩ ha na ha pɛrɛ, ado ga hana thɩ̃ cʋʋra', gɩ khire juu.
18 Sɩ ʋkha na sor: Fe wer fɛr hana ha pɛrɛ, sɩ mɛrɛ dɩ ɩ̃ hana thɩ̃ cʋʋrɛ. Sɩ ma birseere: Dɩ nɛ mar mɔ̃ afɩ ha pɛ fʋnɩ sa hale, sɩ ga hana thɩ̃ cʋʋra'. Sɩ mɛrɛ ma nɩna fɛr na ɩ̃ thɩ̃ cʋʋ mɔ̃ ɩ̃ ha pɛ hanɩ.
19 Fɩ pɛrɛ haar Thãgba bɩɛl haanlaa? Gɩ bɔrɛ. Kɔ̃tɛɛbiisɔ n pɛrɛ mɛ̃ haar wer sɩ dɩ wa-n jẽ.
20 Sɩ fɛr də̃bəəlu, fa-n ƴaal fɩ jɩ dɩ ado ha pɛrɛ na-n hana thɩ̃ cʋʋra', ga do bɔ taa ha pɛrɛ gaagaa?
21 Thãgba na kɔɔ we asɩ mama thɩ kɔ̃tɩ̃ Abɩraham tɩɩ sarʋ thɩ̃ cʋʋrɛra, dɩɩ do gɩrɛraakɛ a kɔɔ gbanɩ ɔɔ bikuun Ɩjakɩ a jinə bonɩɛ gɩ thaa?
22 Fa yɩ gaa, ɔɔ ha pɛ na thɩ̃ cʋʋrɛ fʋrɛ kha, dɩ dakha ɔɔ thɩ̃ cʋʋra dor nɔɔ dɩ ɔɔ ha pɛ thʋ̃ bɔr ka.
23 Mɛ̃ gɩrɛ kherenenɩ Thãgbaa sɛbɛra dã oti ayɩ: «Abɩraham kɔɔ pɛr Thãgba haar dɩɩ do gɛr Thãgba hɩɩn sa wɩɩ tɩɩ sarʋ» na Thãgbaa kuun.
24 Na yɩ gaa, thɩ̃ cʋʋrɛra Thãgba n hɩɩn tibil dɩ do tɩɩ sarʋ, ga do ha pɛrɛra gɩ dɩbara ga.
25 Rahabɩ khɛ pɔɩ, ga do ɔr dakha Thãgba hɩɩnʋʋnɛ dɩ do tɩɩ sarʋ gɩrɛraakɛ a kɔɔ cʋʋnɩ, kɛ dɔnɩ mɔ̃ a teenɩ thɔ̃thɔna a cʋʋ wɩ dɩ wɩ fuunə hʋ kpɩaa?
26 Gɩdonɩ mɔ̃ tomɩr na-n hananɩ thueə', dɩɩ do gɩ khire, mɛ̃ gɩ ha pɛrɛɛkɛ na-n hananɩ thɩ̃ cʋʋra', ha pɛ khire gɩ.