3
1 Ɩ̃ omisɔ, tibil jɔjʋɔ na-n ƴaal ɩnɩ-n dɔ dɩɩrdara ga, gɩdonɩ nɩ jɩrɛ dɩ sɛr dɩɩrdara na 'lɛr kɩɩlʋ dɩ ga khɩɩr na ka.
2 Sɛrɛ fɛʋ sɩ-n dɩrɛ thɩ̃ jɔjʋɔra ka. A tibil na-n dɩ thɩmɩɩ mɩɩrɛra ga ɔr dɔ tɩɩ bʋɔ ka, a na puno ɔɔ tomɩ na fʋ kĩkĩ.
3 A sɩ pɛ gãgʋʋ ther nɔɔ wa-n nɛ sɩ nũu, sɩ-n punone dɩ sɩ ma awɩ tomɩra koo.
4 Nɩ yɛ dakha mɔ̃ bato kɔ̃tɩna n hanɩ; gɩ-n kɔ̃tɩnɩnakɛ thale dɩ jɛ kʋkʋʋlʋ n cʋʋ gɩ dɩ ga-n ca, sɩ fɩɩʋ vɩrdaa n ha, kɛ vɩvɩr n vɩrnanɩ dɩ ga-n jal kãkɛ a-n ƴaalnɩ ga-n jala.
5 Mɛ̃ dakha delẽbire ha; tomɩ ɓã buu gɩ fɩɩʋ, sɩ a-n punone nɔ fa mɩɩrɛ ka. Nɩ hɩnɛ mɔ̃ dɔkpõbire n thiini bə̃ kʋkʋʋ tə̃ə.
6 Dɩ delẽbire dakha dɔɔ gɩ. Delẽbire hʋrɛ puureekɛ henɩ gɩrɛ thɩɩra; a har asɩ tomɩ ɓãsɔra da-n bise tomɩr koo. Ɔr n ləbire si asɩ yi hanana koo na dɔɔkɛ bu pa dɔɔ n ləbinaanɩ.
7 Hɔ̃ nʋ̃ caar ɓibi, na 'lomĩ caarsɔ, na thɩ̃ ƴɩrɛ n puulonenisɔ, na thɩ̃ ƴɩrɛ hanɩ lanyʋɔnna, thɩ̃ɛsɔ gɩɩkɛ tibil na punoni na jo dɩ wɩ 'lire puno wɩrakɛ dɩ wɩ jo.
8 Sɩ delẽbire tibil na-n puno dɩ maaraa dɩ joa', thɩ̃ puu gɩ aa ha ma paara', khi kpal haar a hinə koo.
9 Ɔrra sɩ-n khɩɩna Kɔ̃tɩn asɩ Thɩ, dɩ ɔrra wo sɩ-n nɩɩrna tɩbɩlaakɛ Thãgba tini dɩ wɩ hʋʋ.
10 Nɔ bɩɛllaalera khɩɩrɛ na nɩɩrɛ n the. Ɩ̃ omisɔ ga teena ga-n hana thala'.
11 Yɔ bu ka bɩɛlla na-n bure yɔ daa wo a bir a na-n bunə yɔ ƴʋ̃ɔ ya?
12 Barʋ punone se thɩn ya ɩ̃ omisɔ? Dɩ 'lʋɔ punone se baar ya? Mɛ̃ gɩ, yɔ bu kaarɩkɛ n bonɩ lanyʋɔn na puno na bu yɔ yɔnana'.
13 Ʋmɔ̃ɔ tibil anɩ thɩ̃thɩɩn hana kpɛsɛrɛ a dona thɩ̃ jɩn? Dɔ ɔɔ fɩl bɔ na ɔɔ thɔ̃ɔkɛ a-n cʋʋnɩ na hɛlɛlɛ fɩlɛ na-n nɩna dɩ tɩɩ kpɛsɛ haa.
14 Sɩ ado nɩ hananɛ gbugi tə̃tə̃tə̃ anɩ hara na dɩbara na kɛ̃kɛrɛnɛ, na-n too na məbi khaar a kuur sɔ̃sɔ na pɛ sobɔrra ga.
15 Kpɛsɛ ca gele ga do ƴũ gɩ tha', thɩdaa gɩ, a do tibilikɛ na hananɩ Thãgbaa Thuəəda, kɔ̃tɛɛbiisɔɔ pa gɩ the.
16 Gɩdonɩ kãkɛ gbugi n hanɩ na dɩbara na kɛ̃kɛrɛnɛ, liir nyanyaanɛ na puu cʋʋ caar fɛʋ n the.
17 Sɩ kpɛsɛrɛɛkɛ thɛnɩ ƴũ mɔ̃ a-n hanɩnakɛ dʋɔn: Aa-n hana dɩ paara', ha ie haar a do, a-n hananɛ bɩ̃ bʋɔ, ɔɔda na-n khɩɩra', bɔ jɩɩr jʋɔraarɛ, a-n hananɛ dakha bɔ cʋʋrɛ, datelẽ haar n thɛ ɔɔ pa, aa hana bɩnɛ yenyɔa'.
18 Wɩrɛ n cʋɛnɩ gɩrɛ n 'laanɛnɩ ha ɩɩ, ha ɩɩ wɩ-n diirnə, dɩɩ do gɩrɛ gɩ-n senɩ dʋɔn fɩl sarʋ.