2
1 Gɛr gɩ nɩ dɔna bɩ̃ kpallɛ fɛʋ a faa, na fɩɩlɛ fɛʋ, na bɩnɛ yenyɔ fɩlɛ, na gbugi, na tɩɩ kuere ɓibi;
2 sɩ na-n ƴaalɛ na gbɛ̃gbɛrɛnɛ ilẽ bʋɔɔkɛ dɔnɩ Thãgbaa thɩmɩɩ mɔ̃ bibɔrɔsɔ n ƴaalnɩ ɩlɛ̃, gɛr na khɔnɔ na dana taarɛ,
3 gɩdonɩ «nɩ jɩrɛ Kɔ̃tɩnɩ bɔɔkɛ a bɔrnɩ.»
4 Na-n wɔrɔnɛ ɔr thɛthɛɛkɛ dɔnɩ boka yireekɛ tɩbɩla kɔɔ bonɩ, sɩɩ do thɩ̃ɛ a do waa gel Thãgbara dɩ phiiruu.
5 Dɩ nɛrɛ dakha mɔ̃ nɩ donɩ boka ye, nɩ dɔ Thãgba n gba nɩ a na-n mɩna cʋɔrɩkɛ dɔnɩ ɔɔ Thuuda, nɩ doro bonɩ jida phuusɔ na-n ji bonɩɛɛkɛ dɔnɩ Thudaa, kɛ n danɩ Thãgba haar, gɩ do Jeju Kirisiti dɔ nɔɔ.
6 Gɩdonɩ gɩ kherere Thãgbaa sɛbɛra ayɩ: «Hɩnɛ, mɩ thɩɩnɛ Sɩyɔna go tɩ bokaar, kɛ dɔ marnɩ thɩ̃ɛ waa gel dɩ ɩ̃ phiir. Dɩ ʋrɛ pɩɛrnɩ haar ɔrra, ga ɩ̃ kpɩɩrakɛ a na dʋʋraa yicuruə'.»
7 Nɛrkɛ wer pɩɛrnɩ haar, a do narɛ daɓʋ̃ɔ ka, sɩ ado wɩrɛraakɛ na-n pɩɛrnɩ haara gɩ, Thãgbaa sɛbɛ sor ayɩ: «Bokaarɩkɛ cɔ mɛ kɔɔ bonɩ a do, sɩɩ do ɔr deba a do go tɩ bokaar.»
8 Wo: «Nɛ bara bokaar gɩ a dona nɛ bara gbãgbaan.» Wɩ-n berore nɔɔ gɩdonɩ wɩ nʋʋrɛ Thãgbaa thɩmɩɩra nũu dɩ ga thɩɩn wɩ kɔɔ thɩɩn wɩrakɛ.
9 Sɩ ne wer, nɛr dɔ caarɩkɛ Thãgba phiirni, a dona Fãgadaarɩ bonɩ jidara, nɩ dor ɔɔ tibilsɔɔkɛ phonɩ, na ɔɔ tookɛ a hɩnɩ, gɩ do nɔɔ na-n mɩɩ ɔɔ nɔ kpaa thɩ̃ cʋʋ, ɔrkɛ wɛ nɩnɩ dɩ nɩ the dabirəra a lõ ɔɔ nɔ kpaa dahɩrɛra.
10 Nɛrkɛ mamara na kɔɔ dɔnɩ ɔɔ toa', nɩ dor nɛnɛ̃ Thãgbaa too; nɛrɛɛkɛ na-n kɔɔ yɛnɩ bɔ jɩɩra', sɩ nɛnɛ̃ Thãgba jɩ nɛr bʋɔra.
11 Nɛrkɛ mɩ-n nanɩ, nɩ jɛna kpakpala ha nɩ dɩ nɩ dona kpãkpara, gɛr gɩ mɩ-n kpãkpãa narɛ nɩ faa thɩ̃ puu ƴaalɛɛkɛ n kɔ nɩnɩ thue, kɛ n kɛ̃kɛrɛnanɩ thudaa.
12 Na-n hana fɩl bʋɔ thɩldaraa thɩ̃thɩɩn, dɩ thɩ̃ dooraakɛ wɩ-n kue nini dɩɩ ho puu cʋʋdara ha nɩ, wa ƴɩrɛ anɩ thɔ̃ bɔ wa-n khɩɩ Thãgba wireekɛ a na birni na kher nɩ.
13 Kɔ̃tɩn dɔ kɩrʋ, gɛr gɩ nɩ jɔ dɩbara ƴɛ kʋlasɔraakɛ fɛʋ tɩbɩla pɛrnɩ, a gobanɛrɩkɛ dɔnɩ yʋʋ gɩ,
14 ado fãgadara wɛɛkɛ a pɛrnɩ wa-n heene puu cʋʋdara sor sɩ na khɩa bɔ cʋʋdara;
15 gɩdonɩ gɩrɛ Thãgba n ƴaalnɩ dʋɔn na-n hana fɩl bʋɔ ga-n khaan dəbələəkɛ na-n jɛnɩ gɩrɛ wɩ-n mɩɩna' nʋɔ.
16 Na-n ɩrɛ mɔ̃ nɩ donɩ waɩa, sɩ na-n gba wa dʋʋrɩle a phiro sɩ na cʋʋ gɩrɛ puuronə', sɩ nɩ ka na ɩrɛ mɔ̃ nɩ donɩ Thãgbaa thɔ̃dara.
17 Na-n cɔ tɩbɩla fɛʋ; na-n na omɩna; na-n ma Thãgba; na-n cɔ fãgadaar.
18 Thɔ̃dara na-n jɔ anɩbara anɩ kɔ̃tɩ̃sɔra na maar, ga do kɔ̃tɩ̃ bɔɩra na hɛlɛlɛ fɩldarara dɩbara ga, sɩrakɛ na wɩrɛraakɛ awɩda khɩɩrnɩ.
19 Ha fʋʋr bɔ gaarɛraakɛ tibil n yɩnɩ sɩ ga-n do ɔɔ pa dɩɩ tha', sɩɩ do Thãgba a-n nana, gɛr n da Thãgba haar.
20 Gɩdonɩ anyee bɔ ca na yɩrɔ ado nɩ cʋʋ sopugo dɩ bɔ gaarɛ ɩ̃ a thʋ nɩ? Sɩ ado nɩ ka na cʋʋ bɔɔ dɩ ga ɩna nar bɔ gaarɛ dɩ nɩ fʋrɔ haar, gɛr n da Thãgba haar.
21 Gɩdonɩ gelela Thãgba ka we nar, gɩdonɩ Kirisitii thɛthɛ dakha kɔɔ gaarɛ bʋɔ anɩ sora a nɩ nar fɩlɛɛkɛ na phɛlnɩ gɩ do nɔɔ na-n 'loro ɔɔ nɛkara.
22 Ɔr dɔ ʋrɛɛkɛ na kɔɔ cʋɛnɩ sopugoə', dɩ fɩɩlɛ dakha na kɔɔ the ɔɔ nɔa'.
23 Ɔr dɔ ʋrɛ wɩ-n kɔɔ nɩɩrnɩ sɩ aa-n bir dɩ nɩɩra', a-n kɔɔ gaarnɩ bʋɔ sɩ aa kɔɔ so tibilə', sɩ a kɔɔ faa gɛr a ha ʋrɛ n kɩlɛnɩ kɩɩl sarʋ.
24 Ɔr thɛthɛ dɔ ʋrɛ kɔɔ heenenɩ asɩ sopugosɔ ɔɔ thɛthɛɛ tomɩra thɩrʋra, gɩ do nɔɔ gɩ do nɩ khire sopugo cʋʋrɛra sa hana yire dɩɩ do fɩl sardaa. Ɔɔ kho sɛɛkɛ a 'lɛnɩ dɔ asɩ kho kpɛɛda.
25 Gɩdonɩ nɩ kɔɔ hor banaakɛ bureni, sɩ nɛnɛ̃kɛ nɩ kɛrrɛ bir khekheraakɛ dɔnɩ ʋrɛ n bɛranɩ anɩ thu.