3
1 Mɛ̃ gɩ ha dakha na nɛr khɛra, na-n jɔ anɩbara anɩ kora, gɩ do nɔɔ a ɩkhasɔ halerakɛ a na nɩ Thãgbaa thɩmɩɩ nũə', sɩ fɩlɛɛkɛ awɩ khɛr hananɩ ga cʋʋ wɛr dɩ wa pɛr haar, sɩ ga dorakɛ khɛr mɩa thɩ̃a';
2 sɩ gɩdonɩ wɩ-n yɩrɛ mɔ̃kɛ nɩ hananɩ fɩl phuu na cʋʋr.
3 Na-n barana yʋ lɩɩr, na dɛ thɩ̃ tʋʋr, na kẽkẽ ɓɔ̃ tʋʋr mɔ̃ na bɔrnɩ hɩɩnɛna ga,
4 sɩ nɩ dɔ anɩ biir cʋʋ n do hadaa, kɛ dɔnɩ hɛlɛlɛ fɩlɛ, a ha jɔjɔjɔl ga do dakʋɛnaa ga, gɩdonɩ gɛr dɔ thɩ̃ kɔ̃tɩ̃ɩ Thãgbaa ƴɛra.
5 Mɛ̃ khɛ bɔɩɩkɛ mamara n kɔɔ pɛnɩ Thãgba nũu n kɔɔ gbɛbɩ awɩ biir, mɔ̃ wɩ-n jonɩ dɩbara awɩ kora.
6 Thale Sara kɔɔ ha. A kɔɔ nɩrɛ Abɩraham nũu a thʋ̃ da-n wɩɩ kɔ̃tɩn, dɩ ɔɔ bikhɛrsɔ nɩ debi do gɩrɛ ado nɩ-n cʋʋrɛ bɔɔ, ado dakha thɩ̃ bɩɛl na-n cʋʋ nɩ dɩ maar na-n fʋ na'.
7 Mɛ̃ gɩ dakha na nɛr kona, na-n jɩɛ too kha bɔɔbɔɔ na anɩ khɛr mɔ̃ a donɩ tibilikɛ yɔɔnɩ a jɔ nɩ, na-n cʋɔnɛɛ mɔ̃kɛ nɩ bulni kha khaardaakɛ dɔnɩ yireekɛ thɛnɩ Thãgbara, dɩ mɛ̃ thɩ̃ɛ na bãbarã anɩ Thãgba bɩɛla'.
8 Ɩ̃ thɩmɩɩ kpa pa dʋɔn: Na-n hana kpɩɛrnɔ bɩɛl, na-n hana pəpər haar, nɩ dɔ omi naar, na bɔ jɩɩr, na dɩbara jor n hi ni haarra.
9 Na-n gba puure a lɩmɩ puurə'; a tibil nɩɩr nɩ na-n bir nɩɩrʋa', sɩ nɩ ka na bɔnaa, gɩdonɩ gɛr Thãgba we nar dɩ mɛ̃ na 'lɛ dakha bɔnanɛ.
10 Dɩ Thãgbaa sɛbɛ sor ayɩ: «Ado tibil hale a na yi hananɛ, a ƴaal dakha wi bʋɔ na-n phana nar, dɔ ntɛ n fʋ ɔɔ delẽbi thɩmɩɩ puu mɩɩrɛra, na ɔɔ nɔfa fɩɩlɛla.
11 Dɔ a hʋnɔna puure, sɩ a na-n cʋʋ bɔɔ. Dɔ ha ii ƴaalɛ n do ɔɔda a na-n gbuuro yʋʋ.
12 Gɩdonɩ Kɔ̃tɩn n gar ɔɔ yi tɩɩ sarara, dɩ a-n pɛr dakha awɩ bɩɛl nũu, sɩ Kɔ̃tɩn n fire khiru di pɛ wɩrɛraakɛ n cʋɛnɩ puure.»
13 Amɛ na hʋɔlɛ nar ado na cʋʋ thɩ̃ bʋɔɔkɛ n kɔ nɩnɩ thue?
14 Adorakɛ na gaar bʋɔ gɩrɛraakɛ saranɩ, sɩ bɔnadaa gɩ do nar. Na-n ma gɩrɛɛkɛ tɩbɩla n mana'; na-n do haar na-n jẽ nɩ fɩɩʋraka'.
15 Sɩ na-n cɔ Kirisiti Kɔ̃tɩ̃ cʋʋr le anɩ hara. Nɩ tɔɔ ga too a na nɛna tibilikɛ n bulene nini kɩrʋ nũ pɛrɛraakɛra nɩ hananɩ, sɩ na-n cʋɛ na hɛlɛlɛ fɩlɛ na maar.
16 Na-n hanana dakha kpɩɛrnɔɔkɛ na heene nɩnɩ sora', dɩ thɩ̃ dooraakɛ wɩ-n kue nini dɩɩ ho puu cʋʋdara ha nɩ, anɩ fɩl bɔɔkɛ nɩ hananɩ Kirisitira na pɛ warɛ yicuru.
17 Gaarɛ thɩ̃ bɔ cʋʋrɛra, ado gɛr n da Thãgba haar, gɩ baar gaarɛ puu cʋʋrɛra.
18 Gɩdonɩ Kirisiti dakha kɔɔ khire asɩ sopugora babɩɛl, ɔrkɛ saranɩ khe sɛrɛraakɛ na sarana', dɩ a na kpa sɩ na ha Thãgba. Wɩ kɔɔ kʋrɛ ɔɔ tomɩ wer, sɩ Thue pallɛ ɩɩr na yire.
19 Thueelera a jalna a mɩɩ thuesɔɔkɛ hanɩ khaɩra mɔ̃ thɩ̃ɛ hanɩ,
20 kɛ dɔnɩ wɩrɛ kɔɔ nʋrɛnɩ nũu mamara bɔɔraakɛ Thãgba fʋnɩ haar ƴɛrr Noee bato cʋʋ bɔ, kɛ tɩbɩla fɩɩʋ kɔɔ lʋʋnnɩ, a thɩɛna gaa tɩbɩla makõther wɛ, a kɔɔ taa nyʋɔnna.
21 Gɛr n hʋɔn kha na yɔ kpɛɛrɛɛkɛ n taa nɩnɩ nɛnɛ̃, dɩɩ do Jeju Kirisitii khi ɩɩrra gɩ the, dɩ yɔ kpɛɛrɛɛle ga do tomɩ jiin yɔ hʋr ga, sɩɩ do kpɩɛr tir gɩ Thãgbaa ƴɛra, mɔ̃ sa hananɩ kpɩɛrnɔɔkɛ na heene sɩnɩ sora'.
22 Jeju Kirisitira kɔɔ jʋʋnɛ Thãgbaa dʋɔ a too Thãgbaa nyɔ̃bɔra, ɔr dɔ ʋrɛ punoneni thɔ̃thɔ̃daar thusɔ, na fãgadarasɔ, na punodara dɩ wɩ jʋʋraa.