5
1 Mɩ sor wɩrɛraakɛ dɔnɩ we gbɛbɩdaraa kɔ̃tɩ̃sɔ anɩ pa, mɔ̃kɛ mɩ donɩ dakha kɔ̃tɩn awɩ kha, a tor yire Kirisitii bɔ gaarra, a dona dakha ʋrɛ na buloni kha na i dʋbɩrɛɛkɛ na yɩranɩ,
2 nɛrɛɛkɛ dɔnɩ kɔ̃tɩna mɩ so gɩrɛ ayɩ: Na-n khɛ Thãgbaa banaakɛ a pɛ narnɩ; na-n cʋʋ gɩ ho fɛrɛ pɛr ga, sɩ na-n cʋɛ na haar fɛʋ Thãgbara. Na-n khe wɩ warra ga, sɩ na-n khɛ wɩ na bɩ̃ bʋɔ.
3 Na-n cʋʋ thɩ̃ɛ na fãga wɩrɛraakɛ wɩ pɛ narnɩ na-n hɩna', sɩ nɩ dɔ thɩ̃ nɩrɔrɛ banaana.
4 Dɩ ɔbɔɔkɛ bana khedaar kɔ̃tɩn na ɩnɩ na 'lɛr khor cacadaar dʋʋrra, kɛ dɔnɩ i dʋbɩrɛɛkɛ na dɔnɩ dakʋɛnaa ga.
5 Mɛ̃ gɩ dakha na nɛr daɓola, nɩ jɔ dɩbara kɔ̃tɩnana. Nɛrɛ fɛʋ bɩɛlbɩɛl anɩ cʋʋ para nɩ hanana kha dɩbara jor, gɩdonɩ Thãgbaa sɛbɛ sor ayɩ: «Thãgba n bãbaranɛ i ƴaaldara, sɩ a-n jɩrɛ dɩbara jodara bʋɔra.»
6 Gɛr gɩ na-n jɔ dɩbara Thãgbaa fãga nyɔ̃kɔɔ dɩ ɔr, a bɔɔ dã, a na ɩɩr nɛr.
7 Nɩ gba anɩ dɛsɔ fɛʋ a na faaraa gɩdonɩ ɔr dɔ ʋrɛ n hɩnɛ nɩnɩ.
8 Na-n jʋrɛ a na jɩɛ dʋ bʋrɛ, anɩ lãlaardaar Satã a-n kpaarɛ a ho sidũ'ũukɛ n huoneni, da-n ƴaalna ʋrɛ a na khonɩ.
9 Nɩ pɩɛrɛɛ kĩkĩ mɔ̃ nɩ jɩɩlnɩ kɩbɩ ha pɛrɛra, dɩ na-n jɛna gɩ dɩ bɔ gaar ca bɩɛlla anɩ omisɔ thɩɩraakɛ n yɩ.
10 Thãgbaakɛ bɔ jɩɩr fɛʋ n thernɩ, kɛ kɔɔ wɛ nɩnɩ nɩ bulo kha na ɔɔ khorr i dʋbɩ, gɩ the anɩ bɩɛl dora na Kirisiti, ado nɩ pɩ bʋɔɔkɛ nɩ-n gaarnɩ gɩrɛ bɔɔ gbe, a na cʋʋ nɛr dɩ na bɔr na ka, a na tɩ, a na hana dakha fãga, na ha tutugo paara'.
11 Ɔr hɩna fãga bɔɔ fɛʋ waa khorr vʋ̃ʋ. Amɛn.
12 Sɩlvɛ̃ɛkɛ mɩ-n wenɩ sobɔ omine, ɔr bulo mi dɩ ɩ̃ khere sɛbɛ buukɛ gɩ cʋʋ nɩ nɩ faa haar, ɩ̃ mɩɩ nɩ dakha nɩ jɩɩ jɩ tue dɩ Thãgbaa bɔ jɩɩkɛra nɩ harɔnɩ bɔ jɩɩr gɩ gel, nɩ tɔɔ gar kɩbɩ.
13 We gbɛbɩdaraakɛ hanɩ Babɩlɔn, kɛ Thãgba phiirni anɩ kha, wɩ fʋɔr nɛr. Ɩ̃ bikuun Markɩ dakha fʋɔr nɛr.
14 Na-n fʋɔrɛ khasɔ na ha lõ fʋɔrɛ. Thãgba na-n hana nɛrɛ fɛʋʋkɛ hanɩ Kirisitira ha ɩɩ.