1
1 Mɛr kɔ̃tɩn thɔna sɛbɛɛkɛ a ha Kɩrɩa, kɛ dʋɔnnɩ khɛrɩkɛ Thãgba phiirni, a hana dakha ɔɔ bɩsãsɔ, kɛ dɔnɩ nɛrkɛ mɩ-n nanɩ na sobɔr, sɩ ga do mɛr dɩbara n naan na', sɩ wɩrɛ fɛʋʋkɛ jɛnɩ sobɔr n naan nɩ,
2 dɩɩ the sobɔrraakɛ tɔɔnɩ sɛrɛra, kɛ na hanɩ kha na sɛrɛ na dana bɔɔ khorr.
3 Thãgba Thɩrɛ na Jeju Kirisitiikɛ dɔnɩ Thɩrɛɛ Bikuun na-n jɛ sɩ bʋɔra, a na-n dɔna sɩ dakha bʋɔ, a na-n hana sɩ dakha ha ɩɩ mɔ̃ sɩ donɩ wɩrɛ jɛnɩ sobɔr kɛ n naannɩ khasɔ.
4 Gɩ da marɛ haar ka dɩ ɩ̃ kɔɔ yɩ mɔ̃ afɩ bɩsã ɩkha n ɩɩrnɩ sobɔrra, mɔ̃kɛ jɔfʋʋkɛ sɩ kɔɔ 'lɛnɩ Thɩrɛɛ pa hanɩ.
5 Dɩ nɛnɛ̃kɛ gɩrɛ mɩ-n ƴaal farnɩ Kɩrɩa, ga do jɔfʋ phaa mɩ-n khere fara', Sɩ gɩrɛra sɩ kɔɔ 'lɛnɩ kɛkɛkɛ fʋ paar gɩ, gɛr dʋɔn sa-n na kha fɛʋ bɩɛlbɩɛl.
6 Dɩ naʋ dʋɔn wɔɔ, sa-n ɩrɛ mɔ̃kɛ ɔɔ jɔfʋ hanɩ; gɛr dʋɔn jɔfʋʋkɛ teananɩ na-n ɩrɛrɔ mɔ̃kɛra nɩ kɔɔ nɩɛnɩ kɛkɛkɛ fʋ paar.
7 Gɩdonɩ fɩfɩla jɔɔjɔɔ ɩɩrɛ a lõ thɩɩra, dɩ wa-n tu wɩ yɛ tomɩr Jeju Kirisiti kɔɔ hana a ɩna'. Ʋrɛ hanɩ thale ɔr dʋɔn fɩfɩl na Kirisitii vardaar.
8 Na-n jɩɛ hɩɩn dɩbara dɩ gɩrɛ na 'lɛnɩ anɩ thɔna na-n do dakʋɛsʋa', sɩ nɩ 'lɛrɔ khor waɩ.
9 Ʋrɛ n ɩrɛnɩ da-n kəəro si aa-n too Kirisitii dɩɩrra ga, aa hana Thãgba ga. Sɩ ʋrɛ tɔɔnɩ dɩɩrɛraakɛ, ɔr hana Thɩrɛ na Bikuun.
10 Ado tibil pɔ anɩ pa, sɩ ga do dɩɩr ca ʋrɛ a pɔna ga, na-n teguu a to cʋɔrɔa', na-n fʋɔrʋʋrakɛ dakha ga.
11 Gɩdonɩ ntɛɛkɛ na fʋɔrɛɛnɩ ɔɔ thɔ̃ puusɔ a tu.
12 Mɩ hananɛ thɩ̃ɛ jɔɔ a na khere nar gbobi, sɩ ma ƴaal ɩ̃ gba sɛbɛ na sɛbɛ khere nyʋɔn ɩ̃ mɩɩna na', sɩ mɩ-n pɛrɛ haar ɩ̃ pɔ anɩ pa sɩ mɩɩ kha ƴɛ biro, dɩ mɛ̃ asɩ da na jɩɩ do daʋ na ka.
13 Afɩ õkhɛrɩkɛ Thãgba phiirni, ɔɔ bɩsãsɔ fʋɔr fɛr.