3
1 Nɩ yɛ naʋ caakɛ Thɩrɛ kɔɔ na sɩnɩ ɓoɓo dɩ wɩ thʋ̃ dɩ wa-n we sɩ Thãgbaa bɩsãsɔ, dɩ gɛrra sɩ do. Dɩ gɛrra dɔ kɩrʋ dɩ thɩdara na jɩ sa', gɩdonɩ wa kɔɔ jɩɩ dakha ga.
2 Nɛrɛɛkɛ mɩ-n nanɩ, Thãgbaa bɩsãsɔ sɩ do gɩrɛ, sɩ gɩrɛ sa donɩ ga yɩr pa'; sɩ sɩ jɩrɛ wireekɛ a na phanɩ sa hʋʋrɛ, gɩdonɩ sa yɩɩrɛ mɔ̃kɛ a hanɩ.
3 Dɩ tibil wo tibilikɛ hananɩ nũ pɛ caakɛ n cʋʋrɛ dɩbara a na-n phu mɔ̃kɛ ɔɔ thɛthɛ phuni.
4 Tibil wo tibilikɛ n cʋɛnɩ sopugo Thãgbaa jɔfʋ a-n kʋɛ, dɩ sopugo cʋʋrɛ dʋɔn jɔfʋ kʋɛrɛ.
5 Sɩ nɩ jɩrɛ dɩ Jeju kɔɔ ɩnɛ kɛ a ti asɩ sopugosɔ, dɩ ɔɔ thɛthɛra sopugo na haaraa ga.
6 Dɩ tibil wo tibilikɛ tɔɔnɩ ɔrra aa-n cʋʋ sopugoə'; tibilikɛ n cʋɛnɩ sopugo ntɛɛle na kɔɔ yɩa', aa kɔɔ jɩɩ dakha ga.
7 Bɩsã bii, na-n do tibil n fɩɩl na'; tibilikɛ n cʋɛnɩ dasarʋ, fɩl sardaar a do mɔ̃kɛ ɔɔ thɛthɛ donɩ fɩl sardaar.
8 Ʋrɛɛkɛ n cʋɛnɩ sopugo Satãa pa a the, gɩdonɩ Satã kɔɔ mãa fʋrɛ sopugo cʋʋrɛ kɛkɛkɛ fʋ paar, dɩ gɛr gɩ dɩ Thãgbaa Bikuun kɔɔ ɩ̃ a bũburõ Satãa thɔna.
9 Tibil wo tibilikɛ Thãgba kɔnɩ aa-n cʋʋ sopugoə', gɩdonɩ beekɛ Thãgba diirni har ɔɔ bɩnɔ, dɩ aa-n puno dɩ cʋʋ sopugoə', gɩdonɩ Thãgba kɔnaa.
10 Gɩrɛ wɩ-n jɩnanɩ Thãgbaa bɩsãsɔ na Satãa bɩsãsɔ ha gɩrɛ: Tibil wo tibilikɛ na-n cʋɛnɩ dasarʋa', ga do Thãgbaada a doa', mɛna gɩ na ʋrɛ na-n naannɩ ɔɔ oma'.
11 Thɩmɩɩrɩkɛ nɩ kɔɔ nɩɛnɩ kɛkɛkɛ fʋ paar gɛr ha gɩrɛ: Sa-n na kha fɛʋ bɩɛlbɩɛl.
12 Dɩ sa-n ho Kayɛ̃ɛkɛ kɔɔ dɔnɩ puu cʋʋ hɩ̃daarɩda, kɛ kɔɔ kɔnɩ ɔɔ õkuuna'. Dɩ mɔ̃gɩdo dɩ kʋʋ? Gɩdonɩ ɔɔ thɔ̃ puurore sɩ ɔɔ õkuunida sar.
13 Omɩna ado tɩbɩla thɩɩra na laar nɩ, na-n do nʋɔ n kpaa na'.
14 Sɛrɛ sɩ jɩrɛ dɩ sɩ ther khirrə a lõ yirera, gɩdonɩ sɩ-n nar omɩna; ʋrɛɛkɛ na hananɩ naʋa', khirrə a bo too.
15 Tibil wo tibilikɛ n laarɛnɩ ɔɔ omi tɩɩ kʋ haa, dɩ nɩ jɩrɛ dɩ tɩɩ kʋ bɩɛllakɛ na-n hana yire khorra'.
16 Sɩ jɩrɛ gɩrɛ n dɔnɩ naʋ, dɩ gɩ ther gɩrɛraakɛ Kirisiti kɔɔ faa sarnɩ ɔɔ yi, sɛrɛ dakha gɩ teenanɛ sa-n faa asɩ yi omɩnana.
17 Ado tibil hana thɩɩkɛɛ thɩ̃ sa yɩ ɔɔ omi thɩ̃ ɓɔrɛra sɩ aa ƴaal a kher a hɩɩnʋa', mɔ̃ dɔ Thãgba naʋ haaraarɛ?
18 Bɩsã bii, sa-n na kha na nʋɔ dɩbara dɩ delẽbire ga, sɩ sa-n na kha na thɩ̃ cʋʋrɛ nakha sobɔr.
19 Gɛr sa jɩna dɩ sɩ dor sobɔdara, dɩ sa faarɛ haar yala ɔɔ ƴɛra.
20 Gɩdonɩ ado asɩ ha na heen sɩ sor, Thãgba kɔ̃tɩnɛ a jɔ asɩ ha, dɩ a jɩrɛ thɩ̃ɛ fɛʋ.
21 Nɛrɛɛkɛ mɩ-n nanɩ, ado asɩ ha na-n heen sɩ sora', sɩ hananɛ tu jɩɩr Thãgbaa pa,
22 dɩ thɩ̃ɛ wo thɩ̃ɛɛkɛ sɩ-n bɩɛlnɩ a-n ha sɛr, gɩdonɩ sɩ-n hɩɩnɛ ɔɔ jɔfʋ dɩ sa-n cʋʋna gɩrɛ n daaraanɩ.
23 Dɩ gɩrɛ dɔ ɔɔ jɔfʋ ayɩ: Dɔ sɩ pɛr ɔɔ Bikuun Jeju Kirisitii i haar dɩ sa-n na kha fɛʋ bɩɛlbɩɛl mɔ̃kɛ jɔfʋʋkɛ a kɔɔ ha sɩnɩ n sonɩ.
24 Ʋrɛɛkɛ n hɩnɛnɩ Thãgbaa jɔfʋ ɔr n tɔɔraa dɩ Thãgba n haaraa; dɩ Thu Phuukɛ a kɔɔ ha sɩnɩ sɩ jɩna dɩ a-n hana sɛr.