2
1 Ɩ̃ bɩsã bi mɩ-n khere narɛ ga thɩ̃sɔɔkɛ dɩ na-n cʋʋ sopugoə', sɩ ado tibil cʋʋ sopugo, sɩ hananɛ so ƴɛɛdaar Thɩrɛɛ pa, Jeju Kirisiti fɩl sardaar gɩ.
2 Dɩ ɔɔ thɛthɛra dʋɔn bonɩ jirikɛ hɛlanɩ asɩ sopugosɔ, ga do asɩ sopugosɔ dɩbara ga, sɩ tɩbɩla fɛʋ thɩɩraada dakha.
3 Ado sɩ-n hɩɩnɛ ɔɔ jɔfʋ, liir sa jɩɩ jɩna dɩ sɩ jɩɩrɛ.
4 Tibilikɛ sɔnɩ ayɩ, ɩnɩ jɩɩrɛ sɩ aa-n hɩɩn ɔɔ jɔfʋa', sõsodaar gɩ, dɩ dakha sobɔr na haaraa ga.
5 Ado tibil na hɩɩn ɔɔ so, ga dor Thãgba naʋ daan waa vʋ̃ʋ ntɛɛ pa, gɛr na cʋɛ sɩ dɩ sa jɩ tue dɩ sɩ haaraarɛ.
6 Dɩ tibilikɛ sɔnɩ ayɩ, ɔrra ɩnɩ too, gɩ teenanɛ ntɛ na-n ɩrɛ mɔ̃kɛ ɔɔ thɛthɛ kɔɔ ɩɩrnɩ.
7 Nɛrɛɛkɛ mɩ-n nanɩ, ga do jɔfʋ phaa mɩ-n khere nara', sɩ jɔfʋ tɩ̃ɩ gɩɩkɛ nɩ kɔɔ 'lɛnɩ kɛkɛkɛ fʋ paar, dɩ jɔfʋ tɩ̃ɩkɛra dʋɔn thɩmɩɩrɩkɛ nɩ kɔɔ nɩɛnɩ.
8 Sɩrakɛ jɔfʋ phaa gɩ dɩ ɩ̃ khere nar, dɩ sobɔr gɩ do ɔrra na nɛrɛra, gɩdonɩ dabirə n kar sɩ dɩ dahɩrɛ bɔ 'li yɩrrɛ.
9 Tibilikɛ sɔnɩ ayɩ, ɩnɩ har dahɩrɛra, sɩ da-n laar ɔɔ omi, dabirəra a ha 'lo.
10 Tibilikɛ n naannɩ ɔɔ omi dahɩrɛra a too, dɩ nɛ baradaa na haaraa ga.
11 Sɩ tibilikɛ n laarɛnɩ ɔɔ omi dabirəra a ha, dɩ dabirərara a-n ɩɩr, dɩ aa jɩ kãkɛ a-n jalna', gɩdonɩ dabirə tɔnaa yɩr.
12 Mɩ khere narɛ bɩsã bii, gɩdonɩ ɔɔ i dɔ nɔɔ dɩ nɩ 'lɛ sopugo faarɛ.
13 Mɩ khere narɛ thɛ, gɩdonɩ nɩ jɩrɛ ʋrɛ kɔɔ hanɩle kɛkɛkɛ fʋ paar. Mɩ khere narɛ daɓola, gɩdonɩ nɩ punone puu cʋʋ hɩ̃daar. Mɩ kɔɔ khere narɛ bɩsana, gɩdonɩ nɩ jɩrɛ Thɩrɛ.
14 Mɩ kɔɔ khere narɛ thɛ, gɩdonɩ nɩ jɩrɛ ʋrɛ kɔɔ hanɩle kɛkɛkɛ fʋ paar. Mɩ kɔɔ khere narɛ daɓola, gɩdonɩ nɩ hananɛ fãga, dɩ dakha Thãgbaa thɩmɩɩ too nɛrɛra, dɩ nɩ puno puu cʋʋ hɩ̃daar.
15 Na-n do thɩɩkɛ na ɔɔda n bo ga-n too nɩ haara ga. A tibil na na thɩɩkɛɛ thɩ̃ aa-n hana naʋ Thɩrɛra ga.
16 Gɩdonɩ thɩ̃ɛ fɛʋʋkɛ hanɩ thɩɩra, kɛ dʋɔnnɩ thɩ̃ puukɛ n kɔnɩ tibil thue, na gɩrɛ n kɔnɩ yinə thue, na i ƴaalɛ thɩ̃ hananɛna, ga do Thɩrɛɛ pa gɩ tha', sɩ thɩɩra gɩ the.
17 Dɩ thɩɩra n kar na gɩrɛra n kɔnɩ tibil thue kɛ n thɩɛraanɩ, sɩ tibilikɛ n cʋɛnɩ Thãgba tuur n toore khorr.
18 Bɩsana, pɩpɩɩ bɔɔ ha gɩrɛ, dɩ mɔ̃ nɩ kɔɔ nɩɛnɩ dɩ Kirisitii vardaar n ɩnɛ, nɛnɛnakɛ Kirisitii vardarasɔra jɔɔ hale, gɛrra sɩ jɩ dɩ pɩpɩɩ bɔɔ gɩ.
19 Wɩ kɔɔ ther asɩ thɩ̃thɩɩn, dɩ asɩda wɩ kɔɔ doraka'; gɩdonɩ ado asɩda wɩ kɔɔ do ga dor wa kɔɔ toona sɛr. Sɩ gele daan dɩ mɛ̃ ga nɩna dɩ bɩɛl na kɔɔ do asɩda ga.
20 Sɩ nɛrɛ, ʋrɛɛkɛ dɔnɩ Daphuu, Thu Phuu a kɔɔ ha nɩ, dɩ nɛrɛ fɛʋ jɩɩr na 'lee na'.
21 Mɩ kɔɔ khere narɛ gɩdonɩ ga do na jɩ sobɔraa ga, sɩ gɩdonɩ nɩ jɩ gɛr, dɩ sõso bɩɛllakɛ na the sobɔrra ga.
22 Amɛ dʋɔn sõsodaar saagado ʋrɛ n bananɛnɩ dɩ yɩ Kirisiti Jeju doaa ga; dɩ olela dʋɔn Kirisitii vardaar, ɔr n bɔ Thɩrɛ na Bikuun.
23 Tibil wo tibilikɛ n bɔnɩ Bikuun aa hana dakha Thɩra', sɩ tibilikɛ n tuonni Bikuun a hananɛ dakha Thɩrɛ.
24 Ado ne wer gɩ, nɩ dɔ gɩrɛ nɩ kɔɔ nɩɛnɩ kɛkɛkɛ fʋ paar n too nɛrɛra; ado gɩrɛ nɩ kɔɔ nɩɛnɩ kɛkɛkɛ fʋ paar n toore nɛrɛra, ga dor nɛrɛ dakha na toore Bikuunna na Thɩrɛra.
25 Dɩ ʋlfɛrɛɛkɛ ɔɔ thɛthɛ kɔɔ ʋlfɛna sɩnɩ gɛr dʋɔn yire khorr.
26 Wɩrɛ n cʋɛ nɩnɩ dɩ na-n lɛ̃ hʋɛra dɔ kɩrʋ dɩ ɩ̃ khere nar ga thɩ̃ɩkɛ.
27 Ado nɛr gɩ, Thu Phuukɛ nɩ kɔɔ 'lɛnɩ ɔɔ pa toore nɛrɛra, dɩ na hana ƴaalɛ ʋkha na-n dɩrɛ nɩ thɩ̃a', sɩ mɔ̃kɛ ɔɔ Thu Phuu n dɩɩr nɩnɩ thɩ̃ɛ fɛʋ, na mɔ̃ a donɩ sobɔ sodaar ga do sõsodaar ga, nɩ tɔɔ ɔrra mɔ̃kɛra a kɔɔ dɩɩr nɩnɩ.
28 Dɩ nɛnɛ̃ bɩsã bii, nɩ tɔɔ ɔrra dɩ mɛ̃ wireekɛ a na phanɩ sa hananɛ 'lar, gɩ do ɔɔ bir ɩ̃ bɔɔ yicuru na fʋ sɩ sɩ hʋnɔnaa ga.
29 Ado nɩ jɩrɛ dɩɩ do fɩl sardaar a do, nɩ jɛ dɩ tibil wo tibilikɛ n cʋɛnɩ dasarʋ ɔr kɔna ntɛ.