12
1 Gɛr gɩ sɛrɛ dakha mɔ̃ sɩ hananɩ yi tordara dɩ wɩ jɔr tə̃tə̃tə̃ a jɛ kpala sar, dɔ sɩ faa gɩrɛ fɛʋʋkɛ dɔ sarnɩ heendaa na sopugookɛ na-n pʋɔrɛnɩ sɩ dɩɩ barã sa', sɩ sa-n ca na yɩrrɛ kɔlɔ̃kɔɔkɛra phɩnanɩ asɩ ƴɛ thɩ̃thɩɩn,
2 sa-n hɩɩnna Jeju kirkirkir, kɛ ha pɛrɛ n thernɩ, kɛ dɔnɩ dakha ʋrɛ n cʋɛnɩ ha pɛrɛ dɩɩ jɩɩ do ha pɛrɛ. Daʋʋkɛ Thãgba kɔɔ thɩɩnaanɩ dɔ nɔɔ dɩ kɔɔ gaar bʋɔ na ha fʋrɛ kʋkʋ thɩrʋra, sɩ aa kɔɔ therna yicuruukɛ gɩ-n hanana', dɩ nɛnɛ̃ a toore Thãgbaa fãga too pa nyɔ̃bɔɔra.
3 Na-n jɩɛ kpɩɛrna ʋrɛɛkɛ kɔɔ fʋɔnnɩ haar bo ca olela ɓoɓo sopugodara kɔɔ bʋʋnɩ, dɩ mɛ̃ na vɔa', dɩ nyɛ̃ɛ na khiir ni dakha ga.
4 Anɩ kɛ̃kɛrɛ̃ na sopugo ga jalna nɩ pɩ dɩ tɔmɩn thʋ̃ tha'.
5 Nɩ diinəne fɩl dɩɩr thɩmɩɩrɩle ya? Mee bikũu dʋʋrra Thãgba so nar ayɩ: «Ɩ̃ bikuun, na pərə Kɔ̃tɩnɩ wɛbɩra; ado a na naar fɩ, fa-n do haar n kʋɛ fa'.
6 Gɩdonɩ ʋrɛ Kɔ̃tɩn nanɩ, ɔr a-n wɛbɩ, ʋrɛ a-n wenɩ bikuun ɔr a-n ciil.»
7 Anɩ wɛbɩ dɔ nɔɔ dɩɩ teena nɩ to gaarɛ. Thãgba n hɩɩn nɛr mɔ̃ nɩ donɩ ɔɔ bikuunsɔ; gɩdonɩ ʋmɔ̃ɔ bikuun haanle dɩ thɩrɛ na wɛbʋa?
8 Ado Thãgba na-n wɛbɩ nɩ bikona fɛʋʋ kha ga, ga dor khɛ pɔɩɩ bɩsãsɔ nɩ do, ga do bikũu bɔ nɩ doa'.
9 Dɩrakɛ asɩ thɩsɔ kɛ thɩɩraakɛ n kɔɔ wɛbɩ sɛr, sɩ sɩ-n kɔɔ cʋ wɛr, dɩ ga ka teena sɩ wuro jɔ ƴũ Thɩrɛra a 'lɛ yirəə?
10 Bɔɔ gbe asɩ thɩsɔ kɔɔ wɛbɩ sɩ mɔ̃kɛ wɩ yɩɛnɩ dɩɩ bɔr, sɩ Thãgba n wɛbɩ sɛr thɩ̃ɛ n bɔ sar sɩ puno sɩ phu mɔ̃kɛ a phuni.
11 Sobɔr gɩ wer, wɛbɩrɛ fɛʋ ga-n do daʋ fʋ paara', gbobire gɩ-n do, sɩ pɩpɩɩ paar ha ɩɩ gɩ-n do dɩɩ ɩna dakha fɩlɛɛkɛ saranɩ wɩrɛraakɛ lonanɩ wɛbɩrɛraalera.
12 Gɛr gɩ nɩ dɔ anɩ nyɛ̃ɛkɛ ƴʋɔlɛnɩ n hɩl nar, anɩ nɛkhilikɛ taanɛnɩ n bir gɩ sar.
13 Nɩ dɔ anɩ nɛ na-n gba hʋ telẽe dɩ mɛ̃ gbãgbarʋʋ nɔ na ɓɔra', sɩ gɩ ka gɩ kpɛɛ.
14 Na-n ƴaalɛ ha ie toore na tɩbɩla fɛʋ na kpɩɩ leere, gɩdonɩ ado kpɩɩ leere na hala', tibil bɩɛllakɛ na yɩ Kɔ̃tɩna'.
15 Na-n jɩɛ dʋ bʋrɛ dɩ tibil bɩɛl na-n 'lee Thãgbaa bɔ ja', thɩr nɛ khaa na-n phu dakha a na pɛ nyanyaanɛ anɩ thɩ̃thɩɩn gɩ ho ga mar tibil jɔjʋɔa'.
16 Na-n jɩɛ dʋ bʋrɛ tibil na-n do bɔdɛl cʋʋdaara', dɩ dakhabaa gɩ Ejayʋʋ kha ga, kɛ wi bɩɛl dɩkor donɩ nɔɔ dɩ faarɔ ɔɔ hʋ hana mɔ̃ a donɩ caca bikuuna'.
17 Nɩ jɩrɛ a gɩ pɩrɔ ɔbɔɔkɛ a ƴaalnɩ a bir a 'lɛ ɔɔ thɩɩ bɔna, a kɔɔ bʋʋrɛ sɩrakɛ a kɔɔ ƴaal gɛr na yilẽbe, sɩ ga do thɩ̃ɛ na punone na debi bã.
18 Ga do gɔ̃gʋ̃ɔɔkɛ tibil na punoni na thar nɩ wɔrɔ̃a', kɛ dɔnɩ dɔ haara', kɛ hanɩ kukukulə', dɩ dabirə ga, dɩ thãgba jɛ kɔ̃tɩ̃ɩ ga,
19 dɩ tutuu ʋʋn ga, dɩ nɔ khena ga, mɔ̃kɛ wɛkɛ kɔɔ nɩɛnɛnɩ kɔɔ bɩɛlnɩ dɩ ɩna-n bir a nɩ gɩrakɛ bã;
20 gɩdonɩ wa mar ga thɩmɩɩlera sɔnɩ thaka', gɩ yɩ: «Ado nʋm gɩrakɛ sa thar gɔ̃gʋɔnaale bokana wa dʋʋrnaa a na kʋ.»
21 Dɩ thɩ̃ɛɛlera wɩ garnɩ yire n kɔɔ kʋrɛ maar ka, dɩ Mʋɩjɩ ba sona ayɩ, maar hor ga tɔ nɛr na kpɛɛ dɩ ɩna-n jẽ.
22 Sɩ ne wer Sɩyɔ̃ gɔ̃gʋ̃ɔ nɩ wɔrɔ̃, kɛ dɔnɩ Thãgba yidaarɩ dɩ, kɛ dɔnɩ ƴũ Jerujalɛm, ka thɔ̃thɔ̃daar thusɔ tə̃tə̃tə̃ hanɩ,
23 a wɔrɔna wɩrɛ gbɛbanɩ kha dɩ wa-n kãka, kɛ dɔnɩ Thãgbaa caca bikuunsɔɔ kpa jɛ pa, kɛ awɩ i kherenɩ Thãgbaa dʋɔ; nɩ wɔrɔnɛ dakha kɩɩldaarɩkɛ dɔnɩ tɩbɩla fɛʋʋ Thãgba, a wɔrɔna tɩɩ saraakɛ Thãgba cʋʋnɩ dɩphã dɩ wɩ bɔr a dã thu,
24 a wɔrɔna Jejuukɛ dɔnɩ ƴɛƴɛɛ dɩɩ do nɔɔ dɩ nɔ bɩɛl ʋlfɛ phaa hale, a wɔrɔna tɔmɩ̃ jɛbɩrɛɛkɛ n jɩɛnnɩ khe a ba Abɛlɩda.
25 Na-n jɩɛ hɩɩn, na-n bo ʋrɛɛkɛ n mɩana', gɩdonɩ ado wɛkɛ kɔɔ bɔnɩ Thãgbaadaakɛ ʋrɛ kɔɔ hanɩ thɩɩra n mɩɩ wɩnɩ na kɔɔ puno a fuə', mɔ̃ ser na fʋ sɩ na fuu ado sɩ bo ʋrɛɛkɛ tɔɔnɩ ƴũ sɩ da-n mɩɩ.
26 Ɔɔ nɔ kɔɔ jɩɩn thɩɩkɛra dabɔɔlera; dɩ nɛnɛ̃ a ʋlfɛrɛ gɩrɛ wo ayɩ, ɩna bire na jẽ thɩɩ babɩɛl wo, sɩ ga do thɩɩ gɩ dɩphã dɩbara ga sɩ na thãgbara ƴũ.
27 Dɩ thɩmɩɩrɩkɛ sɔnɩ ayɩ: «Babɩɛl wo» n nɩnanɛ dɩ thɩ̃ tinəne na jɩɩn a na hɛllɔ, sɩɩ do gɩrɛ na dɔnɩ dajenana' gɛr jɩlɛ.
28 Gɛr gɩ mɔ̃kɛ sɩ hanɩ gɩrɛ dɩ sa-n 'lɛ fãga dɩɩkɛ na dɔnɩ datutugonaa ga, dɔ sɩ hana fɔfʋɔr haar sa-n fʋɔrna Thãgba gɩ do fʋɔrɛɛkɛ na daaraanɩ haar, na cʋrɛ nakha maar.
29 Gɩdonɩ asɩ Thãgba dor dakha dɔɔkɛ dɔnɩ thɩ̃ kʋɛ dɔɔ.