11
1 Ha pɛ hananɛ dʋɔn tu jɩɩr dɩ gɩrɛ sɩ-n pɛnɩ nũu sa 'lɛr, na thɩ̃ɛɛkɛ na dɔnɩnakɛ dayɩnana', sɩ sɩ jɩrɔ tue dɩ gɩ hale.
2 Ha pɛrɛɛkɛra kɔɔ cʋɛ dɩ kɔ̃tɩna mamara kɔɔ hana i bʋɔ Thãgbara.
3 Ha pɛrɛra sɩ jɩ dɩ nʋɔ Thãgba kɔɔ sona dɩ thɩɩ na ƴũ kɔɔ ti, dɩ mɛ̃ gɩrɛ sɩ-n yɩnɩ the gɩrɛraakɛ na dɔnɩ dayɩnana'.
4 Ha pɛrɛra Abɛl kɔɔ ji bonɩɛ Thãgbara dɩɩ thʋ̃ bɔr ka a jɔ Kayɛ̃ɛda, dɩ gɛrra a kɔɔ 'lɛr i bʋɔ dɩ tɩɩ sarʋ a do mɔ̃ Thãgbara kɔɔ teenɩ ɔɔ khaarda, dɩ ha pɛrɛrara Abɛlɩda hale gɩrɛ 'lo dɩ ga-n mɩɩ sɩɩ dorakɛ a kɔɔ khire.
5 Ha pɛrɛra dɔ nɔɔ Enɔkɩ na kɔɔ khinə sa jʋʋn Thãgbaa dʋɔ, dɩ tibil na kɔɔ puno a yɩɩ bã, gɩdonɩ Thãgbaa kɔɔ gbaanɛɛ a jʋʋnna. Dɩ Thãgbaa sɛbɛ sor ayɩ ɔbɔɔkɛ aa kɔɔ jʋʋnnɩ Thãgbaa dʋɔ pa', ɔɔda kɔɔ dar Thãgba haar.
6 Dɩ ado ha pɛrɛ na hala', tibil na puno na da Thãgba haar kpɩɩraka'; gɩdonɩ ʋrɛɛkɛ n wɔrɔnɛnɩ Thãgba dɔ a pɛr haar dɩ Thãgba hale, dɩ ɔr dʋɔn ʋrɛ n 'laanɛnɩ khor wɩrɛraakɛ n ƴaalɛɛnɩ.
7 Ha pɛrɛra Noe kɔɔ pɛ nũu thɩɛnaakɛ Thãgba kɔɔ kpãkpaanaanɩ sɩ dɩ ga do a yɩ gɛr pa'. A kɔɔ pər garɛ a gbɛbɩrɔ bato gɩ taa ɔɔ cɔdara. Dɩ gɛrra a kɔɔ heenna tɩbɩla thɩɩra sor, dɩ a 'lɛr Thãgbara fɩl sarʋʋkɛ n thɛnɩ ha pɛrɛra.
8 Ha pɛrɛra Abɩraham ɔbɔɔkɛ Thãgba kɔɔ wɩɩnɩ, a kɔɔ nɩrɛ nũu a the jal paarɩkɛ a na 'lɛnɩ na hɩ̃; dɩ a kɔɔ ther da-n jal sɩ aa jɩ ka a na jalna'.
9 Ha pɛrɛra a kɔɔ jal too dɩɩraakɛ Thãgba kɔɔ ʋlfɛnɩ ɩna haarɛ, dɩ a toorore kpakpal togʋʋ da-n cɔ kẽkẽ waʋ na Ɩjakɩ na Jakɔbɩ, wɛrkɛ dɔnɩ ʋlfɛ bɩɛlɩlee hɩ̃hɩ̃sɔra.
10 Gɩdonɩ dɩɩkɛ hananɩ go kpɛɛrɛ dɩɩ tɩ a-n pɩɛr, kɛ Thãgba donɩ ʋrɛ kheranɩ mɔ̃ ga mɩnɩ a dona wa mɩmɩ.
11 Ha pɛrɛra Saraa thɛthɛrakɛ 'lini tɩɩn sɩ a kɔɔ 'lɛr punone a kɔ̃ bi, gɩdonɩ a hananɛ ha pɛrɛ dɩ ʋrɛ kɔɔ ʋlfɛnɛnɩ ʋlfɛrɛɛle, sobɔ tibil a do.
12 Gɛr gɩ tɩɩ bɩɛl 'lẽ'lẽ'lẽekɛrakɛ wo 'lenɩ sɛlɛlɛ pɩ, 'lɛ məlle dɩ wɩ jɔr a ho ƴepələ̃be ƴũ, a hona gbalãkothɩnɩkɛ n hanɩ lanyɔ̃ nʋɔra, kɛ tibil na punoneni na thera'.
13 Ha pɛ hʋɛra wele fɛʋ khiir sɩ wa 'lɛrakɛ thɩ̃ɛɛkɛ Thãgba kɔɔ ʋlfɛna wɩna', sɩ wɩ yɩ gɛr ƴɔɔ a 'laa fʋɔr gɩ, dɩ wɩ ture dakha kpakpala ha nɩ dɩ ɩnɩ dona kpãkpara thɩɩraakɛ.
14 Wɩrɛ n mɩanɩ thakɛ nɩnanɛ casɩ dɩ wɩ-n ƴaalɛ dɩɩkɛ na dɔnɩ awɩda.
15 Ado dɩɩkɛ wɩ kɔɔ thernɩɩda n bor dɩ ga-n too awɩ kpɩɛrɛra, ga dor wa kɔɔ yɩrɛ hʋɛ a na kɛr na biro.
16 Sɩ dɩɩkɛ baannɩ dɩphã wɩ-n ƴaal ka, a thɩɛna gaa dɩɩkɛ hanɩ ƴũ gɩ. Gɛr gɩ yicuru na fʋ Thãgba wa-n we nɩ awɩ Thãgba gaaga, gɩdonɩ a gbɛbɩ warɛ dɩɩ.
17 Ha pɛrɛra Abɩraham kɔɔ jinə Ɩjakɩ bonɩɛ ɔbɔɔkɛ Thãgba kɔɔ bɩɩnɩ bɩnɛ a hɩɩn; ɔrkɛ Thãgba kɔɔ ʋlfɛnanɩ a kɔɔ gbaarra ɔɔ Bikũu bɩɛl 'lẽ'lẽ'lẽ a kɔɔ jinəna bonɩɛ,
18 sɩɩ dorakɛ Thãgba kɔɔ sʋʋraarɛ ɔɔdara ayɩ: «Ɩjakɩra fa 'lɛ məlle wa-n wena afɩ i.»
19 A hananɛ kpɩɛrɛ dɩ Thãgba hananɛ punone a na ɩɩrnaa khirera, dɩ a thɩɛna gaa gɩ hor khirerara a ɩɩr dɩ bir 'lɩɛ.
20 Ha pɛrɛra Ɩjakɩ kɔɔ bɔna Jakɔbɩ na Ejayʋ mɔ̃ thɩ̃ɛ na ha warnɩ ƴɛ kʋʋlɔ.
21 Ha pɛrɛra Jakɔbɩ n kɔɔ khi a bɔna Jojɛfɩɩ bikuunsɔ bɩɛlbɩɛl a gbuu gbʋʋl a wurõwuro sa fʋɔr Thãgba.
22 Ha pɛrɛra Jojɛfɩɩ khi bɔ n thɔɔ dɩ mɩɩ Ɩjɩrayɛl bɩsanaa theda a mɩɛna wɩ mɔ̃ wa cʋʋnɩ na ɔɔ khubusɔ.
23 Ha pɛrɛra Mʋɩjɩɩ thɩ na ɔɔ nɩ kɔɔ keruu pora yẽther bɔɔkɛ wɩ kɔɔ kʋɔnɩ, gɩdonɩ wɩ yɩrɛ mɔ̃kɛ bɩsaanna thʋnɩ ɓɔ̃, dɩ maar na kɔɔ fʋ wɩrakɛ fãgadaarɩ jɔfʋra ga.
24 Ha pɛrɛra ɔbɔɔkɛ Mʋɩjɩra kɔɔ khɔnɩ pɩ bo ayɩ, wa-n we nɩ Faarɔ̃ɔ bikhɛrɩ bikuuna';
25 a ka nar wa-n hʋɔlɛ nar nakha Thãgbaa too sa ka bo sopugo kãkarɩkɛ a na kãkanɩ bɔɔ gbe fɩɩʋ dɩbara.
26 A hɩɩnɛ beesire na Kirisiti dɩɩ dʋʋraa thɩ̃ ɓʋ̃ɔ a jɔ Ejipiti lẽle thɩ̃ɛ, gɩdonɩ khorɩkɛ a na 'lɛnɩ gɛr a-n hɩɩn kirkirkir.
27 Ha pɛrɛra a kɔɔ the Ejipiti dɩɩra sɩ maar na kɔɔ fʋʋrakɛ fãgadaarɩ nĩkhirə ga, gɩdonɩ a harrɛ kĩkĩkĩ a ho a yɩrɛ ʋrɛɛkɛ na dɔnɩ dayɩnana'.
28 Ha pɛrɛra a kɔɔ cʋʋ Pakɩ a jɛbɩna tɔmɩn dɩ mɛ̃ gbõgolõdaar na tha Ɩjɩrayɛldaraa caca birə ga.
29 Ha pɛrɛra Ɩjɩrayɛl bɩsana kɔɔ ɩɩr lanyɔ̃ sɩɛ dɩɩ ho pa khɩɩ gɩ, sɩ ɔbɔɔkɛ Ejipitidara kɔɔ pɛrnɩ haar ɩnɩ-n cʋɛ oti iner, wɩ kɔɔ khiire nyʋɔnɔ.
30 Ha pɛrɛra Jeriko gʋʋsɔ kɔɔ jiiro ɔbɔɔkɛ Ɩjɩrayɛl bɩsana kɔɔ fini diiro nyẽbe makonyɔ na pɩ.
31 Ha pɛrɛra Rahabɩ khɛ pɔɩ na kɔɔ khi na nũ nʋra ga, gɩdonɩ a kɔɔ teere gɩgɩla na ha bʋɔ.
32 Dɩ anye hale 'lo dɩ ma bir na so wo? Gɩdonɩ ma yɩ ƴɩɛ na mɩɩ nɩ Jedeyɔ̃ɔda, na Barakɩɩda, na Sãsɔ̃ɔda, na Jefɩtheeda, na Davɩdɩɩda, na Samʋɛlɩda, na Thãgbaa bobonaada ga.
33 Ha pɛrɛ dɔ nɔɔ dɩ wɩ kɔɔ puno fãgadarasɔɔ dɩ, wɩ cʋʋrɛ dakha gɩrɛ saranɩ, wɩ kɔɔ 'lɛr gɩrɛ Thãgba kɔɔ ʋlfɛna wɩnɩ, wɩ kɔɔ khaanɛ sidũ'ũ gbuokho,
34 wɩ kɔɔ kʋkʋʋlɛ dɔɔ fãga, wɩ forre bajɩna kʋrra, wɩ kɔɔ ther yɔɔrɛra a 'lɛ fãga, wɩ dor kũu khaa kʋʋrra, wɩ weelele sɔrasɩ kpala.
35 Khɛr ɩkha bire 'lɛ awɩ tibilsɔɔkɛ ɩrɛnɩ a the khirera. Tibil ɩkhasɔ n kɔɔ 'wãga dɩ wa-n khinə, sa bo fuure wɩ puno wɩ 'lɛ khi ɩɩrɛɛkɛ baannɩ.
36 Ɩkhasɔ hire maanɛ na ciile, na jɔrkɔ lir, na khaɩ tʋʋr.
37 Wɩ kɔɔ dʋʋrɛ ɩkhasɔ na bokana a kʋʋr, a vaar ɩkhasɔ na thɩr khaadaa, a kʋʋr ɩkhasɔ na bajɩna, bana lʋʋ na bʋ lʋʋ ɩkhasɔ n kɔɔ to dɩ wa-n finə bilili, a 'leena thɩ̃ɛ phuphuphul, wɩ-n kpoo warɛ dɩ wa-n ʋ̃ʋ war.
38 Tɩbɩlaalera na teena thɩɩka'. Wɩ-n kpaarɛ bəənnə, na gɔ̃gɔnana, wɩwɩl kanana na bi kpololo wɩ-n kɔɔ cɔ.
39 Wele fɛʋʋle wɩ kɔɔ 'lɛr i bʋɔ Thãgbara awɩ ha pɛ hanana, sɩ wa kɔɔ 'lɛ gɩrɛɛkɛ a kɔɔ ʋlfɛna wɩna'.
40 Thɩ̃ɛɛkɛ bʋɔnɔnɩ a ka Thãgba thɩɩn asɩ thɩɩn, dɩ ga do a-n ƴaalɛ gɩ dɔ wɛr bʋɔnɔ a dã thu sɩɩ do ser na halaa ga.