10
1 Jɔfʋ na do thɩ̃ biree thɛtha', sɩ thɩ̃ ɓʋ̃ɔɔkɛ na ɩnanɩɩ jəər gɩ, dɩ a na puno kpɩɩrakɛ na bonɩ ji ca bɩɛlɩlera n jenɩsɔ wire wire yɩɛr koo, a na cʋʋ wɩrɛ n pɔnɩ Thãgbara dɩ wa bɔr na dã thuə'.
2 Gɩdonɩ ado wɩrɛ n fʋɔrɛnɩ Thãgba thale awɩ sopugosɔ kɔɔ hɛl warɛ sobɔr, ga dor sopugoo so heen fɩɩʋrakɛ na bo na too awɩ hara bã, dɩ wa sɩrɔrɛrakɛ dakha bonɩ jir.
3 Sɩ ga bonɩ jiile n ka cʋʋrɛ tɩbɩla yɩɛr koo dɩ wa-n jɩna awɩ sopugosɔ.
4 Gɩdonɩ nake tɔmɩn na bʋ tɔmɩn na puno na hɛl sopugosɔ kpɩɩraka'.
5 Gɛr dɔ kɩrʋ mɔ̃ Kirisiti n lonɩ kɛ thɩɩra a sor Thãgbara ayɩ: «Ga do bonɩ jir fɩ-n ƴaal dɩ khaardaa ga, sɩ tomɩr fɩ mɩ mɩ.
6 Nʋ̃ thii bonɩ jir, na sopugo hɛl bonɩ jir na-n da fara';
7 dɩ gɛr gɩ dɩ ɩ̃ so: Hɩnɛ mɛr ha ʋ, ɩ̃ cʋʋ afɩ tuur ya Thãgba, gɩ ha mɔ̃kɛ ɩ̃dara kherenɩ lo sɛbɛra.»
8 Gɩrɛ a sonɩ caca dʋɔn: «Ga do bonɩ jir fɩ-n ƴaal, dɩ khaardaa gɩ, dɩ nʋ̃ thii bonɩ jir gɩ, dɩ sopugo hɛl bonɩ jir ga, ga-n da fara'.» Sɩɩ do mɔ̃ jɔfʋ pɛrnɩ ga bonɩɩle n ji.
9 Agɩpɩ a sor wo: «Hɩnɛ mɛr ha ʋ ɩ̃ cʋʋ afɩ tuur.» Mɛ̃ a hɛllɔ caca bonɩ jir sɩ Kirisitii bonɩ ji lõ ga kara.
10 Gɩdonɩ Jeju Kirisiti cʋʋrɛ gɩrɛ Thãgba kɔɔ ƴaalnɩ a cʋɛ a 'laa ɔɔ tomɩ babɩɛl khorr, sɩ phu sɩ lee kpɩɩ.
11 Bonɩ jidara fɛʋ bɩɛlbɩɛl ƴũ jɩɩlɔ wɩ-n jɩɩl dɩ wa-n do awɩ thɔ̃ dɩ wa-n ji bonɩ ji ca bɩɛlsɔra wire wire, kɛ na-n punoneni na ti sopugo kpɩɩraka'.
12 Sɩ o wer bonɩ ji bɩɛl a kɔɔ ji sopugora sa too gɩrɛ khorr Thãgbaa nyɔ̃bɔra,
13 da-n pɩɛr dɩphã phaphapha Thãgba n cʋʋ ɔɔ lãlaardara wɩ dʋʋraa ɔɔ nɛ jəəda.
14 Gɩdonɩ bonɩ ji bɩɛl a cʋʋna wɩrɛ phonɩ a lee kpɩɩ dɩ wɩ bɔr ka khorr a dã thu.
15 Dɩ Thu Phuu cʋʋ sɛr dakha dɩ sɩ jɩ tue. Cacara a sor ayɩ:
16 «Kɔ̃tɩn sɔ ayɩwɔɔ: A ga wiile dã, nɔ bɩɛl ʋlfɛrɛɛkɛ ma ʋlfɛna wɩnɩ thakɛ ga ha: Ma pɛrɛ ɩ̃ jɔfʋsɔ awɩ hara, ma khere ger awɩ kpɩɛrra.»
17 Dɩ a sor wo: «Ma jɩna awɩ sopugosɔ dɩ awɩ thɩ̃ gõgolõ gɩ kpɩɩ bã.»
18 Dɩ ka sopugo faarɛ n hanɩ bonɩɛ na-n ji sopugora bã.
19 Mɛ̃ gɩ omɩna, sɩ jɩrɛ tue dɩ hʋɛ phɩnɛ dɩphã waa dɩ sa-n lona sãsɩ pa phuurə, dɩɩ do Jeju Kirisitii tɔmɩ̃ dɔ nɔɔ.
20 Hʋɛɛlera a kɔɔ phɛl sarnɩ hʋ phaa gɩ, a dona yi hʋɛ, a kpãsɛ kɩ̃kɩɩnna, a thɩɛna gaa ɔɔ tomɩ gɩ.
21 Dɩ wo sɩ hananɛ gbõdaarɩkɛ Thãgba pɛrnɩ dɩ do yʋʋ ɔɔ cɔ.
22 Mɛ̃ gɩ sɩ jɩɛ tɔ na wɔrɔ̃ Thãgba na ha bʋɔ, na ha pɛrɛɛkɛ dananɩ thu, na haarɩkɛ Thãgba phʋɔlnɩ a ti kpɩɛrnɔ puu a faa, a na wɔrɔnaa dakha na tomɩrɩkɛ cɔcɔɔnɛnɩ na yɔ hɩrɛ.
23 Sɩ fɔ asɩ nũ pɛɛkɛra sɩ yɩnɩ sɩ hananɛ kĩkĩ, gɩdonɩ sɩ jɩɛ jɩ tue dɩ gɩrɛ Thãgba ʋlfɛnɩ ɩna cʋʋrɛ, gɛrra a na cʋʋ.
24 Sa-n jɩɛ dʋ kha bʋrɛ gɩ tɔ naʋ ga-n pɛr na dakha thɔ̃ bɔ cʋʋrɛ.
25 Sa-n bo pa bɩɛl gbɛbɩra', mɔ̃kɛ ɩkhasɔ n cʋʋna', sɩ sa-n mɩa kha yɩr thɩmɩa, mɔ̃ nɩ taanɩ yɩ Wireele dɩ ga-n wɔrɔ̃.
26 Gɩdonɩ a sɩ jɩ gbobi sɩ na cʋʋ sopugo ɔbɔɔkɛ sɩ 'lini 'lɛr sobɔ jɩɩr pɩ, bonɩɛ na-n hale sopugora bã.
27 Sɩ gɩrɛ dɔnɩ ma kʋ thɩ̃ɛɛkɛ sɛnɩ dʋɔn kɩɩlʋ na Thãgbaa ha kpor nĩkhiikɛ na thiəni ɔɔ lãlaardara dɔ khaa.
28 Tibil wo tibilikɛ n kɔɔ kʋɛanɩ Mʋɩjɩɩ jɔfʋ, ado tɩbɩla yenyɔ yẽthersɔ so ɩnɩ torre yire, wɩ-n kɔɔ kʋʋrɛ sɩ wa-n jɩɩ bʋɔra ga.
29 Nɩ kpɩɛrɛ hɩnɛ mɔ̃ ga puuro na pɔna ʋrɛraakɛ na-n gbaannɩ Thãgbaa Bikuun dɩ dʋʋraa thɩ̃a', kɛ dɔnɩ ʋrɛ n hɩnɛnɩ nɔ bɩɛl ʋlfɛ tɔmɩnɩkɛ phʋɔlɛɛnɩ dɩɩ dʋʋraa mɔlɔ thɩ̃ɛ, da-n kpɛna dakha Thu Phuukɛ dɔnɩ bɔ jɩdaa.
30 Gɩdonɩ sɩ jɩrɛ ʋrɛ kɔɔ sɔnɩ ayɩ: «Hel tiire dɔ ɩnda, dɩ mɛr dɔ ʋrɛ na lɩmanɩ tibil gɩrɛ a cʋʋnɩ», wo, «Kɔ̃tɩn na kɩɩlnanɛ ɔɔ too.»
31 Thɩ̃ɛ gɩ dɩ ga-n kʋ maar ka ado fɩ təə ji Thãgba yidaarɩ nyɔ̃kɔɔ.
32 Na-n jɛna caca wiresɔ, ɔbɔɔkɛ nɩ kɔɔ 'lɛnɩ Thãgbaa dahɩrɛ pɩ, nɩ kɔɔ jɩɩlɛ kɩbɩ kɛ̃kɛrɛ̃ kɔ̃tɩɩna bʋɔraakɛ nɩ-n gaarnɩ.
33 Kho bɩɛl nɩ dor yɩ ga thɩ̃ɛ nɩɩrɛraakɛ wɩ-n nɩɩr nɩnɩ na nɩwɛraakɛ nɩ-n yɩnɩ, kho bɩɛl wo nɩ ture a lõ bɔ gaar bɩɛlla na wɩrɛɛkɛ n gaarɛnɩ thale.
34 Dɩ bʋɔ n kɔɔ fʋ nɛr wɩrɛraakɛ dɔnɩ khaɩdara, dɩ nɩ ture na daʋ tɩbɩla n taa nar thɩ̃ɛ, sɩ dɩ na-n jɩna dɩ nɩ hananɛ thɩ̃ ƴɩrɛ baannɩ a do thɩ̃ɛɛkɛ n pʋɔrɛnɩ khorr.
35 Gɛr gɩ na-n dʋna anɩ tu jɩra a fagaa koe, gɩ hananɛ khorɩkɛ kɔ̃tɩnanɩ tə̃ə.
36 Nɩ teenanɛ nɩ hanana yɩrrɛ ado nɩ-n ƴaalɛ na-n cʋɛ gɩrɛ Thãgba tuni, a 'lɛna gɩrɛ Thãgba kɔɔ ʋlfɛnɩ a ha nɩ.
37 Gɩdonɩ gɩ kherere Thãgbaa sɛbɛra ayɩ: «Kɩɛr na bɔɔ gbe fɩɩʋ, ʋrɛɛkɛra hanɩ ɩɩn da-n ɩ̃ a na daan a na pʋɔra';
38 sɩ ʋrɛ mɩ hɛllɔnɩ sor dɩɩ do ha pɛrɛ dɔ nɔɔ, ɔr na hana yire, sɩ ado a kɛr bir ɔɔda na da mar haara kpɩɩraka'.»
39 Sɩ se wer sa do wɛkɛ n kɛranɩ dɩ wɩ bir khiro a na buurə', sɩ sɛr dɔ wɛkɛ hananɩ ha pɛrɛ gɩ taa asɩ thu.