9
1 Dɩ caca nɔ bɩɛl ʋlfɛrɛra dakha kɔɔ hananɛ jɔfʋsɔ mɔ̃kɛ tɩbɩla na fʋɔrnɩ Thãgba, a hanana dakha Thãgba fʋɔr paar kɛ thɩɩra.
2 Gɩdonɩ kẽkẽ waa kɔɔ dʋrɛ, dɩ ka wɩ-n kɔɔ lonɩ dã caca le wɩ-n we pa phuu; liir dɔ carã dɛ̃ɛ paar kɔɔ ha, na tabal, na buruukɛ wɩ-n hanɩ Thãgba.
3 Sɩ balanyɔ kẽkẽ billo liir dɔ paarɩkɛ wɩ-n wenɩ sãsɩ pa phuu,
4 dɛ bʋlaa hale kɛ dɔnɩ latɩkolo 'wii paar, na nɔ bɩɛl ʋlfɛ khɛɛsʋʋkɛ wɩ kolnɩ koo na dɛ kãkɛ dɛ bʋlaakɛ wɩ pɛrnɩ maan hanɩ, na kãkɛ Aarɔ̃ɔ gbolɩkɛ kɔɔ phɛnɩ phɩ̃ɩ hanɩ, na bokanaakɛ wɩ khereronɩ nɔ bɩɛl ʋlfɛ thɩmɩɩr.
5 Nɔ bɩɛl ʋlfɛ khɛɛsʋʋra ƴũule thɔ̃thɔ̃daar thusɔ hale kɛ n nɛnanɩ Thãgbaa i dʋbɩ, dɩ awɩ jəər n kɔɔ kɛa so hɛl paar; sɩ ga do ga thɩmɩɩsɔ sɩ-n ƴaal sɩ mɩɩ nɩ nɛnɛ̃ kɩrʋ n yɩra'.
6 Dɩ mɔ̃ thɩ̃ɛsɔɔlera hanɩ thale, bonɩ jidara n lʋʋn bɔɔ fɛʋ caca paar waaraale dɩ wa-n do awɩ thɔ̃.
7 Sɩ balanyɔ paar gbõdaar dɩbara n lona babɩɛl yɛ bɩɛl. Tɔmɩnɩkɛ a jinəni bonɩɛ a pɛ ɔɔbara na tɩbɩlaa sopugosɔra a-n lona.
8 Gɛr dɔ gɩrɛ Thu Phuu nɩnanɩ dɩ sãsɩ pa phu hʋɛ na khɛr pɩ ɔbɔɔkɛ caca kẽkẽ waa hanɩle 'loa'.
9 Sokpaa gɩ dɩ ga-n nɩ sar mɔ̃kɛ thɩ̃ɛ hanɩ nɛnɛ̃ bɔɔkɛ, dɩ khaardaasɔ na bonɩɛɛkɛ wɩ-n jini, ga puno na cʋʋ tibilikɛ n fʋɔrɛnɩ Thãgba thale, gɩ do ɔɔ kpɩɛrnɔ bɔrɛ waa a dã thuə'.
10 Gɩdonɩ thɩ̃ khonanɛ gɩ, na dayɔnanɛ, na phʋɔl caarsɔ dɩɩdɩɩ dɩbara, kɛ tɩbɩla pɛrnɩ dɩɩ do jɔfʋ phaphapha gɩ dana bɔɔkɛ Thãgba na gbɛbɩnɩ thɩ̃ɛ dɩ ga jɩɩ bɔr.
11 Sɩ Kirisiti ɩnɛ a do gbõdaar thɩ̃ bʋɔraakɛ hanɩkɛ gɩrɛ; a kɔɔ kpãsɛrɛ waaraakɛ kɔ̃tɩnanɩ ka, kɛ bʋɔnɔnɩ dakha ka, kɛ na dɔnɩ tibili nyɛ̃ thɔ̃a', kɩrʋ dʋɔn, ga do thɩɩkɛɛda ga.
12 A kɔɔ lʋʋn babɩɛl khorr sãsɩ pa phuurə sɩ ga do bʋ tɔmɩn na na ɓol tɔmɩn a kɔɔ lona ga, sɩ ɔɔ thɛthɛɛ tɔmɩ̃ gɩ, dɩɩ do babɩɛl a kɔɔ birse si waa khorr.
13 Gɩdonɩ ado bʋ tɔmɩn, na nake tɔmɩn, na naphɩɩ thookɛ wɩ-n gbanɩ a jɛbɩ wɩrɛraakɛ biseneni dɩɩ do gɩ phʋɔl wɛr dɩ wɩ phu gɩdonɩ wɩ lɩrɛ,
14 mɔ̃ ga ka na ha na gɩrɛ Kirisitii tɔmɩ̃ n cʋʋnɩ, kɛ dɔnɩ ʋrɛ kɔɔ 'laanɛnɩ ɔɔbara Thãgbara a do bonɩ jirikɛ na hananɩ sɩ paara', dɩɩ do Thu Phuukɛ dɔnɩ khorrdaarɩ pa gɩ the. Kirisitii tɔmɩ̃ɩlera na phʋɔlɛ asɩ ha a na ti mɔlɔ thɔmaakɛ sɩ kɔɔ cʋʋnɩ sɩ sɩ puno dɩphã sa-n fʋɔr Thãgba yidaar.
15 Gɛr gɩ dɩ Kirisiti do ƴɛƴɛɛ dɩɩ do nɔɔ dɩ nɔ bɩɛl ʋlfɛ phaa hale, dɩ mɛ̃ wɩrɛ Thãgba wenɩ na puno na 'lɛ bɔnanɛɛkɛ dɔnɩ khorrdaa, kɛ Thãgba yɩnɩ ɩna 'laarɛ. Gɩ punone ha mɛ̃ gɩdonɩ bɩɛl kɔɔ khire dɩ khirile na birsene tɩbɩla dɩ wa the puureraakɛ wɩ kɔɔ cʋʋnɩ caca nɔ bɩɛl ʋlfɛ bɔɔ.
16 Gɩdonɩ a thɩ̃ gba sɛbɛ hale, dɔ tue n jɩ dɩ ʋrɛ kheranɩ sɛbɛɛlera khire.
17 Gɩdonɩ thɩ̃ gba sɛbɛɛle na-n taa bʋɔ ɔbɔɔkɛ ʋrɛɛkɛ kheranɩ hananɩ yirə', sɩ gɩ-n taarɛ bʋɔ bɔɔkɛ ʋrɛɛkɛ kheranɩ khini pɩ dɩphã.
18 Gɛr dɔ kɩrʋ dɩ caca nɔ bɩɛl ʋlfɛrɛ na kɔɔ puno na jɩɩ do ʋlfɛrɛ sɩɩ do tɔmɩn na kɔɔ halaa ga.
19 Ɔbɔɔkɛ Mʋɩjɩ kɔɔ sonɩ jɔfʋ sɛbɛra jɔfʋ fɛʋ bɩɛlbɩɛl tɩbɩla fɛʋʋ ƴɛra pɩ, a gbaar bana sũu sɩɛ, na ɩjopɩ faa, a ɓɛna na ɓol tɔmɩn na bʋ tɔmɩn, na nyʋɔn a jɛbɩ sɛbɛraale na tɩbɩlala fɛʋ sa so ayɩ:
20 «Tɔmɩnɩkɛ dʋɔn nɔ bɩɛl ʋlfɛ jɩɩn nɛrɛra na Thãgba.»
21 Ɔmɛna a jɛbɩ dakha tɔmɩn kẽkẽ waara, na Thãgba fʋɔr thɔ̃ do thɩ̃ɛsɔra fɛʋʋkɛ hanɩle.
22 Ado jɔfʋra gɩ, gɩ sɩrɛ fɩɩʋrakɛ sɩɩ do thɩ̃ɛ fɛʋ tɔmɩn n phʋɔlɛ gɩ, dɩ ado tɔmɩn na deera', sopugo faarɛ na hala'.
23 Thɩ̃ɛsɔɔkɛra fɛʋ dɔnɩ gɩrɛ n nɛnanɩ mɔ̃ ƴũ thɩ̃ɛsɔ hanɩ, gɩ teenanɛ phʋɔlɛ thakɛ, dɩ gɩrɛɛ thɛthɛɛkɛ dɔnɩ ƴũdaa bonɩ jirikɛ baannɩ gɩ-n ƴaal.
24 Gɩdonɩ Kirisiti na kɔɔ lõ pa phuurəəkɛ tibil nyɛ̃ɛ cʋʋna', kɛ n kporonanɩ gɩrɛ dɔnɩ thɩ̃ bire, sɩ Thãgbaa dʋɔɔ thɛthɛ a lõ, dɩ mɛ̃ a na-n jɩɩl gɩrɛ Thãgbaa ƴɛra asɩ jɩɩl.
25 Dɩ dakha wo aa-n kɔɔ lõ le da-n jinə ɔɔ dɩbara bonɩɛ bɔɔ fɛʋ, mɔ̃kɛ gbõdaar n lonɩ pa phuurə yɩɛr koo na thɩ̃ kpɩɩ tɔmã'.
26 Agado mɛ̃ ga, ga dor bɔɔ fɛʋra a na-n kɔɔ gaar bʋɔ gɩ fʋna thɩɩ ti bɔɔ; sɩ nɛnɛ̃kɛ dɩphã pɩpɩɩ bɔɔraakɛ babɩɛl a kɔɔ ɩ̃ sopugo hɛl ɩɩn, gɩ the gɩrɛraakɛ a kɔɔ gbanɩ ɔɔbara a jinə bonɩɛ.
27 Tɩbɩla fɛʋ bɩɛlbɩɛlɩda dʋɔn babɩɛl wa khi, agɩpɩ Thãgba n kɩɩlna wɩ.
28 Mɛ̃ dakha Kirisiti kɔɔ jinə dɩbara bonɩɛ babɩɛl a heen tibil jɔjʋɔɔ sopugo, sɩ balanyɔdaa a na bire na ɩ̃, ga do sopugodaara gɩ bã, sɩ wɩrɛ n pɩɛrɛɛnɩɩ taa pa gɩ mɛ̃.