1
1 Mɛr Polɩkɛ dɔnɩ Thãgbaa thɔ̃daar na Jeju Kirisitii thɔ̃thɔn, gɩ cʋʋ wɩrɛ Thãgba phiirni wɩ 'lɛ ha pɛrɛ, wɩ 'lɛna dakha sobɔ jɩɩrɩkɛ n cʋranɩ kha na Thãgba fɩlɛ,
2 wa-n pɛna nũu yire khorrɩkɛ Thãgbaakɛ na-n sõsonena' kɔɔ maanɩ ʋlfɛrɛ kɛkɛkɛ ɩna 'laarɛ,
3 dɩ ɔbɔɔkɛ bɔɔkɛ a pɛrnɩ danɩ, a kɔɔ nɩnanɛ ɔɔ thɩmɩɩkɛra ɔr Thãgba asɩ Taadaar yɩnɩ ma-n mɩa;
4 mɩ thɔnanɛ sɛbɛɛkɛ ɩ̃ ha fɛr Tɩtɩɩkɛ dɔ marnɩ bikuun ha pɛrɛraakɛ sɩ bulni kha. Thãgba Thɩrɛ, na Jeju Kirisiti asɩ Taadaar na-n jɛ nɩ bʋɔra, a na-n hana nɩ dakha ha ɩɩ.
5 Mɩ kɔɔ faa fɛr Kɩrɛtɩ fɩ gbɛbɩ thɩ̃ɛ fɛʋʋkɛ sɛnɩ gɩ telẽ, dɩ fɔ mɔ̃ mɩ kɔɔ so farnɩ sa pɩɛr we gbɛbɩdaraa kɔ̃tɩ̃sɔ dɩɩdɩɩsɔra;
6 sɩ dɔ ntɛ n do kuunikɛ na hananɩ so paara', a hanana khɛ bɩɛl, a hanana bɩsanaakɛ dɔnɩ ha pɛdara, kɛ tɩbɩla na pɛrnɩ sor dakhaba dʋʋrra dɩ nũ nʋʋrɛra ga.
7 Gɩdonɩ we gbɛbɩdaarɩ hɩɩndaar teenanɛ a dɔ ʋrɛ na hananɩ so paar mɔ̃ a donɩ Thãgbaa thɩ̃ hɩɩndaara', a na-n do tibilikɛ na-n wuronəə ga, a na-n gba nĩkhii kɔrɔa', a na-n do ta laardaar na kɩl ƴaal tibilə', a na-n phʋʋn tɩbɩla na fãga bɩɩ ɔɔ war ƴaalla ga,
8 sɩ a dɔ kpakpal tee tibil, a dɔ tibilikɛ n naannɩ gɩrɛ telenenɩ, a dɔ yʋ bɔ tibil, a dɔ tɩɩ sarʋ, a hanana fɩl phuu, a dɔ dɩbara fʋdaar.
9 A teenanɛ a jɩɛ ma bɔɔbɔɔ sobɔ thɩmɩɩrraakɛ n thɛnɩ dɩɩrɛra, dɩ mɛ̃ a na mar a gba dɩɩr bʋɔ a na-n dɩɩr tibil, a na-n punona dakha thɩ̃ banadara.
10 Gɩdonɩ jɔɔ hale khʋ̃ kurdaraa thɩ̃thɩɩn, kɛ na-n tuonni thɩmɩɩra', kɛ dɔnɩ mɔlɔ thɩ̃ banadara na tɩɩ fɩɩldara,
11 kɛ teananɩ sɩ khaanɛ wɩ nʋɔ; a wɩ lõ cɔ dɔɔra wɩ-n nyanyãa gɛr koo, wɩ-n dɩɩrɛ thɩ̃ɛɛkɛ na teananɩ dɩɩra' wɩ puno wa-n 'lɛ yicur war.
12 Awɩ thɛthɛɛ bobon bɩɛl yɛrɛrakɛ sor ayɩ: «Kɩrɛtɩdara wer, sɔ̃sɔ wɩ-n kuur wire fɛʋ, hɔ̃ nʋ̃ puunə ha wɩ, khãkhalaakɛ n kɛbanɩ wɩ do.»
13 Dɩ sobɔrra gɩ do ger; gɛr gɩ phaanɛ wɩ dakɔ̃tɩ̃ɩ wɩ jɩɛ hana ha pɛ bʋɔ,
14 dɩ wa-n bo na pɛ nũu Juifisɔɔ kpuro nɩra ga, dɩ jɔfʋraakɛ tɩbɩlaakɛ faanɩ sobɔr pɛrnɩ ga.
15 Thɩ̃ɛ fɛʋ phure wɩrɛraakɛ phonɩ, sɩ thɩ̃ bɩɛllakɛ na phu wɩrɛraakɛ bisenenə', kɛ dɔnɩ ha pɛ 'leedara ga; awɩ fɩl na awɩ kpɩɛrnɔ bisere.
16 Sɩ nʋɔ wer n mɩɩrɛ ɩnɩ jɩrɛ Thãgba, sɩ awɩ cʋʋ pa na-n jal kha na gɩrɛ wɩ-n sona'. Tɩɩ sʋ̃ɔ ha wɩ na nũ nʋra, wa-n puno thɩ̃ bɔ cʋʋrɛ fɩɩʋraka'.