4
1 Mɩ-n kpãkpãa farɛ gɩrɛ Thãgbaa ƴɛra na Jeju Kirisitii ƴɛra, na mɔ̃ gɩ donɩ Kirisitira na bire na ɩ̃ a na kɩɩlna yidara na khe, saa gba ɔɔ fãga, mɩ so farɛ gɩrɛ ayɩ:
2 Na mɩa Thãgbaa thɩmɩɩ, na yɩrana gɩ, a fɩ yɩrɛ fʋ paar a fa yɩ fʋ paara'; na nɛna tɩbɩla awɩ dɩ pa, na naarɛ wɩ, na kpãkpaanɛ war, sɩ na cʋɛ gele na ha fʋrɛ fɛʋʋkɛ dɩɩrdaar teenanɩ a hanana.
3 Gɩdonɩ bɔ bɩɛl na daan kɛ tɩbɩla na tuni dɩɩr bʋɔ bã, sɩ mɔ̃kɛ awɩ bɩ̃ n nanɩ dɩ awɩ nũ na-n hʋʋl wɩ thɩ̃ kpɩɩ nɩɩrra, wa ƴaalɛ dɩɩrdara wa-n ɓã dɩɩrdarara.
4 Wa kpʋʋ garɛ nũu sobɔ nɩɩrra, sɩ wa-n pɛ kpuro nɩɛsɔ nũu.
5 Sɩ fe wer, a gɩ ha mɔ̃ na fɔ haar, fa-n hə̃jə̃ə bɔ gaarɛra ga, dɔ thɔ̃ don tutugo bʋɔɔ thɩmɩɩ mɩɩrɛra, na dɔ afɩ thɔ̃ ga-n pɩ ɓibi.
6 Gɩdonɩ ado me wer gɩ, bɔɔ daan dɩ ɩ̃ tɔmɩ̃ na deer, ɩ̃ kɔ̃ bɔ wɔrɔnɛ dɩphã.
7 Mɩ kɔɔ kɛ̃kɛrɛnɛ kɛ̃kɛrɛ̃ bʋɔ; mɩ car ɩ̃ kɔlɔ̃kɔɔ pɩ, mɩ fʋrɛ ha pɛrɛ kĩkĩ.
8 Nɛnɛ̃ dɩphã khorɩkɛ ma 'lɛnɩ cacadaar dʋʋrra n pɩɛrɛ mɩ mɛ̃, gɛr dʋɔn so hɛl khaardaakɛ Kɔ̃tɩnɩkɛ dɔnɩ ʋrɛ n kɩlɛnɩ kɩɩl telẽe na ha mɩnɩ ga Wirəəle, sɩ ga do mɛr dɩbara a na ha ga, sɩ wɩrɛ fɛʋʋkɛ n naannɩ ɔɔ bir ɩ̃.
9 Dɔ bʋɔ sa ɩna ɩ̃ pa kɔrɔ,
10 gɩdonɩ Demasɩ faa mɛr dɩ gɩ ther naʋraakɛ a-n nanɩ nɛnɛ̃ bɔɔkɛɛ thɩna, Tesalonɩkɩ a jal, dɩ Kiresã jal Galasɩ, Tɩtɩ jal Dalmasɩ;
11 Luki dɩbara haan kha na mɛrɛ; kpa Markɩ nɩ ɩ̃ kha gɩdonɩ a do marɛ bɔ taa tibil thɔmana.
12 Tɩsɩkɩ wer mɛr thɔnaa Efɛjɩ.
13 A fa ɩ̃ gba ɩ̃ delkeba jakparaakɛ mɩ faanɩ Tʋrʋasɩ Karpusii pa, a gbana dakha sɛbɛsɔ, sɩ caca thɩ̃ɛ dʋɔn ɩ̃ lo sɛbɛ.
14 Phube Alesãdɩɩr kɔɔ cʋʋ mɛr puure ka; Kɔ̃tɩn na lɩmaa mɔna ɔɔ thɔna hanɩ.
15 Fɛrɛ dakha na jɩɛ dʋʋraa bʋrɛ dɛ, gɩdonɩ a bana mɛr waa gel ɩ̃ thɩmɩɩsɔraakɛ mɩ kɔɔ mɩɩnɩ.
16 Caca bɔɔkɛ mɩ kɔɔ jɩɩlnɩ ɩ̃ hɛl ɩ̃ so, tibil bɩɛllakɛ na kɔɔ jɩɩl mara', sɩ fɛʋ kɔɔ faa mɛr. Thãgba na-n gba gele wɩ kɔɔ cʋʋnɩ a heen wa'.
17 Kɔ̃tɩn dɔ ʋrɛ kɔɔ jɩlɛna mɩnɩ a ha mɩ fãga dɩɩ do nɔɔ dɩ ɩ̃ kɔɔ mɩɩ tutugo bʋɔɔ thɩmɩɩ waa dɩɩ dã thu, dɩ ca kpala fɛʋ nɩɛ. Kɔ̃tɩn kɔɔ taa mɩ sidũ'ũ gbuokhorə.
18 Kɔ̃tɩnna na-n taa mɩ thɔ̃ puu caarra fɛʋ, dɩ a na fʋ marɛ na cʋʋ mɩ dɩ ma lõ ɔɔ ƴũ fãga dɩra. Ɔɔ i n dʋbarɔ na jala waa khorr vʋ̃ʋ. Amɛn.
19 Fʋɔrɛ Pirisika na Akɩlasɩ na Onejɩfɔɔrɩ cɔdara.
20 Erasɩtɩ wer toore Korɛ̃tɩ, sɩ gɩ-n khor Tʋrofɩm dɩ ɩ̃ sɩɩraa dɩ too Mɩle.
21 Bãbanɛ a dana kɛ sɩ yʋʋr n yo. Ebulusi, Pudãsɩ, Linusi, Kʋlodɩa na omɩna fɛʋ wɩ fʋɔr fɛr.
22 Kɔ̃tɩn n hana kha na fɛrɛ. Thãgba na-n jɛ nɩ bʋɔra.