1
1 Mɛr Polɩkɛ dɔnɩ Jeju Kirisitii thɔ̃thɔn, dɩɩ ha mɔ̃kɛ Thãgbaakɛ dɔnɩ asɩ Taadaar pɛrnɩ gɩ hana, na Jeju Kirisitiikɛ dɔnɩ ʋrɛ sɩ-n pɛnɩ nũu,
2 thɔna sɛbɛɛkɛ a ha Timotheekɛ dɔ marnɩ bikuun na sobɔr ha pɛdaara: Thãgba Thɩrɛ, na asɩ Kɔ̃tɩ̃ Jeju Kirisiti na-n jɛ fɩ bʋɔra, a na-n dɔna fɩ dakha bʋɔ, a na-n hana fɩ dakha ha ɩɩ.
3 Ɔbɔɔkɛ mɩ-n gbanɩ hʋɛ ɩ̃ jal Masedʋan, mɩ kɔɔ so farɛ fɩ tɔɔ Efɛjɩ a vara kĩkĩ tibil ɩkhasɔra wa-n dɩɩr sõso dɩɩra'.
4 Wa-n bo na pɛ dakha kpuro nɩɛsɔ nũə', na thɩ kɔ̃ jɔfʋsɔa', kɛ ga thɩmɩɩ na-n hananɩ khu paara ga, sɩɩ do kɩla gɩ-n ɩɩr, sɩ ga-n ka cʋʋ gɩrɛ Thãgba n ƴaalnɩ ga-n cʋɛa', gɩdonɩ ha pɛrɛra gele n cʋʋ.
5 Gɩrɛ Thãgbaa so 'laa n ƴaalnɩ ga-n cʋɛ dʋɔn gɩ dɔ naʋ a na thɛ ha phuurə, na kpɩɛrnɔraakɛ 'leanɩ dɩ paar, na ha pɛrɛraakɛ na hananɩ fɩɩla'.
6 Ɩkhasɔ kɔɔ dɩrɛ hʋɛra, a lɛ̃, a lõ mɔlɔ thɩ̃ banaana;
7 sɩ wɩ-n ƴaalɛ ɩnɩ-n dɔ jɔfʋ dɩɩrdara, sɩrakɛ gɩrɛ wɩ-n sonɩ wa-n jɩ ga kɩra', dɩ thɩmɩɩ nɔ ʋrɛ wɩ-n bonɩ wa-n ɩɩrɔ, wa jɩ ɔɔ kɩr dakha ga.
8 Sɩ sɩ jɩrɛ dɩ jɔfʋ bɔrɛ a fɩ jɩ mɔ̃ na mɔ̃ gɩ teenanɩ fɩ cʋɛnaa,
9 a fɩ jɩ dɩɩ do ga do tɩɩ sarʋra jɔfʋ kɔɔ pɛra', sɩ jɔfʋ 'leedarara wɛ, na nũ nʋʋrdarara, na wɩrɛraakɛ na-n therananɩ Thãgba ga, na sopugodarara, na Thãgba fʋɔr bodarara, na Thãgba so ƴɔ̃ƴɔ̃ɔdarara, na thɩ kʋdarara, na nɩ kʋdarara, na tɩɩ kʋdarara,
10 na bɔdɛl cʋʋdarara, na konanaakɛ n ƴaalɛnɩ kuun khɛr khaa, na khɛraraakɛ n ƴaalɛnɩ khɛr kũu khaa, na tɩɩ dolõdarara, na sõsodarara, na sõso ʋlfɛdarara, na gɩrɛ fɛʋraakɛ n varanɩ dɩɩr bɔ.
11 Dɩɩrɛɛlera tutugo bʋɔraakɛ Thãgba pɛ marnɩ dɩ ma mɩɩ, le gɩ the; dɩ tutugo bʋɔ gɩɩkɛ n nɛnanɩ mɔ̃ Thãgbaakɛ hɩnanɩ i dʋbɩrɛ a hɩna bɔnanɛ hanɩ.
12 Mɩ-n khɩɩrɛ ʋrɛɛkɛ hana mɩnɩ fãga, kɛ dɔnɩ Jeju Kirisiti asɩ Kɔ̃tɩ̃, na gɩrɛraakɛ a we mɩnɩ sobɔ tibil a gba mɩ pɛ thɔmana,
13 mɛrkɛ mamara kɔɔ dɔnɩ ɔɔ i kʋɛdaar, na kpõkpoodaar, na nĩkhi khedaar, sɩ Thãgba kɔɔ jɩ mɛr bʋɔra, gɩdonɩ yʋ 'leerera na ha pɛ 'leerera mɩ kɔɔ cʋʋ gelela.
14 Asɩ Kɔ̃tɩ̃ nɩna mɛr ɔɔ bɔ jɩ dɩɩ thʋ̃ kãasɩ, a hanana mɩ ha pɛrɛ na naʋʋkɛ thɛnɩ Jeju Kirisitira.
15 Sobɔr thɩmɩɩrɩkɛ do a teena tuur koo, gɛr dʋɔn Jeju Kirisiti kɔɔ ɩnɛ kɛ thɩɩra a taa sopugodara, kɛ mɛrɛ donɩ cacadaar.
16 Sɩ Thãgba kɔɔ jɩ mɛr bʋɔra, gɩ do mɛr dɔ cacadaarɩkɛ Jeju Kirisiti kɔɔ nɩrɔnɩ ɔɔ ha fʋ koo, ɩ̃ do thɩ̃ nɩrɔrɛ wɩrɛraakɛ na pɩɛnɩ haar a na 'lɛ yire khorr.
17 Ʋrɛ dɔnɩ bɔɔ khorr fãgadaar, kɛ na dɔnɩ dakhinənə', aa do wo dayɩnana', kɛ dɔnɩ Thãgba bɩɛl dɩbara 'lẽ'lẽ'lẽ, ɔr teana a hɩna cʋrɛ na i dʋbɩrɛ bɔɔ fɛʋ waa khorr vʋ̃ʋ. Amɛn.
18 Mɩ gbaar sorɩkɛ dɩ ma-n ha fɛr Timothe ɩ̃ bikuun, mɔ̃kɛ Thãgbaa bobonaa thɩmɩɩkɛ telene fɩnɩ kɔɔ maanɩ sor, gba gɩ a na kɛ̃kɛrɛna kɛ̃kɛrɛ̃ bʋɔ,
19 a jɩɛ hanana ha pɛrɛ na kpɩɛrnɔɔkɛ na heene fɩnɩ sora'; ga kpɩɛrnɔ caalera ɩkhasɔ kɔɔ dʋna gɛr a faa a kʋɛ awɩ ha pɛ;
20 Imene na Alesãdɩɩr kɔɔ harrɛ, dɩ mɩ kɔɔ faa wɛr a ha Satã gɩ dɩɩr wɩ fɩlɛ wɩ faa Thãgbaa i kʋɛrɛ.