2
1 Dɩ gɩrɛ dɔnɩ caca thɩ̃ɛ mɩ-n ƴaalnɩ dʋɔn, phʋʋrɛ, na bɩɛlɛ, na ƴɛɛrɛ, na Thãgba khɩɩrɛ, sa-n pɛ tɩbɩlala fɛʋ.
2 Sɩ bɩɛlnɛ a na pɛ fãgadarara fɛʋ na wɩrɛraakɛ dɔnɩ kɔ̃tɩnasɔ, dɩ mɛ̃ sa too dɩɩra cɔcɔcɔ na ha ɩɩ, sɩ hana Thãgba fɩlɛ na fɩl bʋɔ;
3 thale bʋɔnɔ, gɛr n da dakha Thãgbaraakɛ dɔnɩ asɩ Taadaar,
4 kɛ n ƴaalɛnɩ tɩbɩla fɛʋ n 'lɛ taarɛ a jɛ gɩrɛ n dɔnɩ sobɔr.
5 Gɩdonɩ Thãgba bɩɛl dɩbara haanle, na dakha so ƴɛɛdaar bɩɛl tɩbɩlala na Thãgba, Jeju Kirisitiikɛ dɔnɩ tibil gɩ.
6 Ɔr dɔ ʋrɛ kɔɔ faanɩ dɩbara a birse tɩbɩla fɛʋ, dɩ ɔbɔɔkɛ ga bɔɔlera kɔɔ danɩ gɩ har mɔna gɩ kɔɔ mɩɩnɩ.
7 Gɛr dɔ gɩrɛ Thãgba pɛ marnɩ dɩ ɩ̃ do ga mɩmɩɩ na thɔ̃thɔn, ma-n dɩɩr ca kpala ha pɛrɛ, na gɩrɛ dɔnɩ sobɔr, dɩ sobɔr mɩ-n so ga do sõsor mɩ kurə'.
8 Dɩ gɛr gɩ mɩ-n ƴaalɛ kona n 'laanɛ nyɛ̃ phuu ƴũ a na bɩɛlna Thãgba paar fɛʋ, sɩ wa-n hana nĩkhiə', wa-n hana thɩ̃ banaa ga.
9 Mɩ-n ƴaalɛ dakha khɛra na-n tɔ kẽkena mɔ̃kɛ gɩ teenanɩ, na fɩl bʋɔ na fɩl phuu, wa-n li yʋʋ dɩ yʋ lɩɩr gɩ, a gbana dɛ thɩ̃ɛsɔ na lẽbiisɔ na kẽkẽ the nɔ khena ka, a na cʋʋna biirə';
10 sɩ gɩrɛ na dɔnɩ awɩ biir cʋʋ n ka dɔ thɔ̃ bɔ cʋʋrɛ, kɛ dɔnɩ gɩrɛ teananɩ khɛraakɛ n yɛnɩ Thãgba cʋ khɛra ɩnɩ do.
11 Dɔ khɛra n 'wɩɩ kɩrkɩrkɩr sɩ wa-n pɛ dɩɩrɛ nũu na dɩbara jor.
12 Ma-n tu khɛr n dɔ dɩɩrdaara', agɩbo a do yʋʋ kuunna ga, sɩ a teenanɛ a 'wɩa kɩrkɩrkɩr.
13 Gɩdonɩ Adã Thãgba kɔɔ ti ɓo sa pɩɩrɔ Ɛvɩ.
14 Sɩ ga do Adã kɔɔ telene a 'lɛ fifiləla', sɩ khɛr kɔɔ 'lɛ fifiləle a lõ Thãgbaa jɔfʋ kʋɛrɛra.
15 Sɩrakɛ Thãgba na tagʋʋrɛ mɔ̃ a donɩ bi kɔn, ado a too a hana fɩl phuu ɔɔ ha pɛra, na naʋra, na kpɩɩ leerera.