1
1 Mɛr Pol na Sɩlvɛ̃ na Timothe thɔna sɛbɛɛkɛ a ha we gbɛbɩdaraakɛ hanɩ Tesalonɩkɩ, kɛ Thãgba asɩ Thɩ na Jeju Kirisiti Kɔ̃tɩn hɩnɩ.
2 Thãgba Thɩrɛ na Jeju Kirisiti Kɔ̃tɩn n hana nɩ ha ɩɩ a jɛ nɩ dakha bʋɔra.
3 Omɩna, asɩda dʋɔn dɔ sa-n khɩɩ Thãgba wire wire anɩdara, dɩ gɩ teenanɛ dɩ sa cʋʋ mɛ̃ gɩdonɩ anɩ ha pɛra kɔ̃tɩnɛ dɩ ga-n pɛr, dɩ anɩ naʋʋkɛ nɩ-n nanɩ kha bɩɛlbɩɛl dakha gɩ-n dɛɛnɔnɛ.
4 Dɩ gɩ dor nɔɔ dɩ sɛrɛɛ thɛthɛ na-n məbi anɩdara, Thãgbaa we gbɛbɩdarasɔɔ thɩ̃thɩɩn, gɩdonɩ anɩ kɩbɩ jɩɩl dɔ nɔɔ, na anɩ ha pɛɛkɛ nɩ hananɩnakɛ kpoore na bɔ gaarɛra fɛʋʋkɛ nɩ-n yɩnɩɩ thɩ̃thɩɩn.
5 Gɛr n nɛna Thãgbaa kɩɩl sar, gɩ do nɔɔ gɩ do nɩ teenanɛ lʋʋn Thãgbaa fãgadaar dora, kɛra nɩ-n gaarɔnɩ bʋɔ mɛ̃.
6 Gɩdonɩ Thãgba sarrɛ gɛr a na gbaar bɔ gaarɛ ana lɩmɩ wɩrɛ n gaarɛ nɩnɩ,
7 dɩ nɛrɛɛkɛ wɩ-n gaarnɩ gɩrɛ, a na gbaar hɩɩrɛ a na ha nɩ nakha sɛrɛ dakha, ɔbɔɔkɛ Jeju Kɔ̃tɩn na thenɩ Thãgbaa dʋɔ a na-n ɩ̃ gbelẽ gbelẽ na ɔɔ thɔ̃thɔ̃daar thusɔ na fãga,
8 na dɔlɩnanɛ. A na tiire helu wɩrɛraakɛ na jɛnɩ Thãgba ga, na wɩrɛraakɛ na-n nɛnɩ asɩ Kɔ̃tɩ̃ Jejuu tutugo bɔ thɩmɩɩ nũə'.
9 Awɩ so heen na dor bũburone khorr, wɩ hʋnɔnanɩ Kɔ̃tɩn a 'leena ɔɔ fãgaakɛ thɛnɩ ɔɔ puno hanana.
10 Ɔbɔɔkɛ Wireelera na danɩ a na-n ɩ̃ kpãgarɛ na-n ther ɔɔ tɩɩ phusɔɔ pa, wɩrɛ fɛʋ pɩɛrnɩ haar na hananaanɛ cʋʋr, dɩ nɛrkɛ pɩɛrnɩ thɩmɩɩrɩkɛ sɩ kɔɔ mɩɩ nɩnɩ haar na harrɛ ner.
11 Gɛr gɩ dakha dɩ sɩ bɩɛl Thãgba bɔɔ fɛʋ dɩ sa-n pɛ nar, asɩ Thãgba n cʋɛ nɩ nɩ teena ɔɔ wera, a gba ɔɔ fãga a cʋʋna nɩ nɩ puno na-n cʋʋ bɔɔkɛ nɩ-n ƴaalnɩ, a cʋʋna anɩ ha pɛ thɩ̃ cʋʋ ga-n dã otirə.
12 Dɩ mɛ̃ na do nɔɔ dɩ asɩ Kɔ̃tɩ̃ Jejuu i na 'lɛ kpãgarɛ, dɩ na 'lɛr dakha kpãgarɛ gɩ do ɔr dɔ nɔɔ, gɩ the asɩ Thãgba na asɩ Kɔ̃tɩ̃ Jeju Kirisitii bɔ jɩra.