5
1 Sɩ omɩna, ado bɔɔkɛ ga donɩ wer na wireekɛ ga donɩ, ma laar na khere nar ga thɩmɩa',
2 gɩdonɩ nɛrɛɛ thɛthɛrakɛ jɩɛ jɩ dɩ Kɔ̃tɩnɩ wi na daan mɔ̃ yu n ɩnɩ dɩtɩnɔ.
3 Ɔbɔɔkɛ tɩbɩla na sonɩ nayɩ: Ha ɩɩ hale; wo: Thɩ̃ɛ bɔrɛ dɩphã waa. Liir bũburone na phuro wi dapaara mɔ̃ wallɛ n phũroni khɛ pɛmɛdaar, gɩ do wa yɩ for paar bã.
4 Sɩ ne wer omɩna, na ha dabirəra Wi caale n phuroni mɔ̃ yu n phuronə'.
5 Nɛrɛ fɛʋ, nɛr dʋɔn dahɩrɛdara na dɩwɩldara, sa ha kha dɩkha na dɩtɩnɛ dɩ dabirə ga.
6 Dɩ gɛr gɩ sa-n daar wɛɛ kha ga, sɩ sa-n jʋrɛ a hanana dakha dɩbara fʋrɛ.
7 Gɩdonɩ wɩrɛ n daarɛnɩ dɩtɩnɔ wɩ-n daar, dɩ wɩrɛ taan n kʋnɩ dɩtɩnɔ gɩ-n kʋ wɩ.
8 Sɩ sɛrkɛ dɔnɩ dɩwɩldara sɩ hanana dɩbara fʋrɛ, a dɔ wɩrɛ tʋɔnnɩ ha pɛrɛ na naʋ kũkũ kɛɛ the khaa, a subo dakha taa 'lɛ nũ pɛrɛ the kpɛ khaa.
9 Gɩdonɩ Thãgba na kɔɔ thɩɩn sɩ sɩ lona ɔɔ nĩkhirə ga, sɩ sɩ 'lɛ taarɛɛkɛ thɛnɩ asɩ Kɔ̃tɩ̃ Jeju Kirisitira,
10 kɛ kɔɔ khe sarnɩ, dɩ mɛ̃ ado sɩ hananɛ yire, ado sɩ daarɛ, sɩ sa hananɛ kha yire na ɔr.
11 Gɛr gɩ na-n mɩa kha yɩr thɩmɩa bɩɛlbɩɛ̃l, ʋ n tɔ ʋ a na-n jalna ƴɛ kʋʋlɔ mɔ̃kɛ nɩ-n cʋʋnɩ gɩrɛ.
12 Omɩna, sɩ-n bɩɛl nɛr dɩ na hana cʋrɛ wɩrɛraakɛ n gbũgbuloneni anɩ thɩ̃thɩɩn, kɛ dɔnɩ anɩ ƴɛ kʋʋldara, dɩ wa-n dɩɩr nɩ fɩlɛ Kɔ̃tɩnɩ hʋra.
13 Na-n cɔ wɩ dakɔ̃tɩ̃ɩ na naʋʋkɛ hanɩ phãphãphã gɩ do awɩ thɔ̃ dɔ nɔɔ. Na-n tɔ̃ɔ kha na ha ɩɩ.
14 Sɩ-n phʋʋr nɛr dakha omɩna, na-n kpãkpaanɛ khãkhalala, na-n hana ha phaadara 'lar, na-n bulo wɩrɛ yɔɔnɩ, na-n hana ha fʋrɛ na tɩbɩla fɛʋ.
15 Na-n jɩɛ hɩɩn dɩ a tibil cʋʋ ʋ̃ tibil puure a na-n bir lɩmʋʋ puurə', sɩ bɔɔ fɛʋ anɩ hara na tɩɩ kpɩɩsɔra fɛʋ, na-n yɩrana bɔ cʋʋrɛ.
16 Na-n hana daʋ wire fɛʋ.
17 Na-n bɩɛlnɛ Thãgba tɔ̃tɔ̃tɔ̃.
18 Na-n fʋɔrɛ Thãgba thɩ̃ɛ wo thɩ̃ɛ fɛʋra a gɩ ha mɔ̃, gɩdonɩ gɛr dɔ gɩrɛ Thãgba n ƴaalnɩ anɩ pa, nɛrkɛ hanɩ Jeju Kirisitira.
19 Na-n khiir Thu Phuu dɔa'.
20 Na-n beesi Thãgba tukɩr tirə',
21 sɩ nɩ mɩɛnɛ thɩ̃ɛ fɛʋ na hɩnɛ, sɩ na fʋɔr gɩrɛ bʋɔnɔnɩ.
22 Nɩ hʋnɔnɛ na thɩ̃ puu caar dɩɩdɩɩ fɛʋ.
23 Thãgbaakɛ ha ɩɩ n thernɩ, ɔɔ thɛthɛ n lea nɩ kpɩɩ koo nɩ phu, dɩ anɩ thɛthɛɛ tɩɩ dorakɛ koo: Thue, na haar, na tomɩr n jɩɩ too gɩ 'lee dɩ paar, gɩ dana wireekɛ asɩ Kɔ̃tɩ̃ Jeju Kirisiti na birni na ɩ̃.
24 Ʋrɛɛkɛ wɛ nɩnɩ sobɔdaar a dõ, dɩ ɔrra dakha na cʋɛ gɩ.
25 Omɩna, nɩ bɩɛlnɛ Thãgba na pɛ sar.
26 Nɩ fʋɔrɛ omɩna fɛʋ na ha lõ fʋɔrɛ.
27 Kɔ̃tɩnɩ i mɩ gba dɩ ma-n kpãkpaana nar, nɩ sɔ sɛbɛɛkɛ omɩna fɛʋ n nɩɛ.
28 Asɩ Kɔ̃tɩ̃ Jeju Kirisiti na-n jɛ nɩ bʋɔra.