4
1 Ado gɩrɛ sɛnɩ gɩ omɩna, nɩ nɩɛrɛ mɔ̃ sɩ-n dɩɩr nɩnɩ dɩ gɩ teenanɛ na-n ɩrɛ ga-n da Thãgba haar, dɩɩ dorakɛ gɛr nɩ-n cʋʋ gɩrɛ, sɩ-n bɩɛl nɛr dɩ sa-n phʋʋrna nɩ na Jeju Kɔ̃tɩnɩ i, dɩ na-n ɩrɛ hʋɛrara na bãbar.
2 Nɩ jɩrɛ dakha mɔ̃ so ca ʋrɛ Jeju Kɔ̃tɩn kɔɔ ha sɩnɩ dɩ sɩ ha nɩ hanɩ.
3 Gɩrɛ Thãgba n ƴaalnɩ gɛr dʋɔn anɩ kpɩɩ lee sopugora; gɛr dʋɔn nɩ hʋnɔnɛ na bɔdɛl cʋʋrɛ;
4 gɛr dʋɔn nɛrɛ fɛʋ bɩɛlbɩɛl n jɛ mɔ̃ na fʋnɩ anɩbara, anɩ tomɩ n do daphuu, na thɩ̃ɛɛkɛ na hananɔnɩ cʋrɛ.
5 Dɩ na-n do thɩ̃ puu ƴaalɛɛkɛ n hərəneni tibil na-n fʋ nɩ, mɔ̃kɛ gɩ-n hanɩ thɩldararaakɛ na jɛnɩ Thãgba gaaga;
6 gɛr dʋɔn tibil na-n tagɩrɩ ɔɔ omi, agɩbo a na-n pɩɛraa hara thɩɛna ga, gɩdonɩ Kɔ̃tɩn na tiire helu ga thɩ̃sɔraale fɛʋ mɔ̃kɛ sɩ kɔɔ maanɩ so nar a kpãkpaanɔ.
7 Gɩdonɩ Thãgba na kɔɔ we sɩ thɩ̃ bise cʋʋrɛra ga, sɩ sɩ pho.
8 Gɛr gɩ ʋrɛ bɔnɩ sorɩkɛ ga do tibil a boa', sɩ Thãgba a bo, ʋrɛɛkɛ hana sɩnɩ ɔɔ Thu Phuu.
9 Sɩ ado gɩrɛ dɔnɩ omi naar gɩ, ma laar na khere nar dɩkha bã, gɩdonɩ Thãgbaa thɛthɛ dɩrɛ nɩ ayɩ, na-n na khasɔ bɩɛlbɩɛl.
10 Dɩ gɛrra dɔrakɛ gɩrɛ nɩ-n cʋʋnɩ gɩrɛ omɩnasɔra fɛʋʋkɛ hanɩ Masedʋan dɩɩra koo, sɩ sɩ-n phʋʋr nɛr omɩna, dɩ na jɩɩ bãba gɩ jɔ mɛ̃.
11 Nɩ yɩra a tɔɔ mʋmʋr, na-n jɩɛ ɔ anɩ thɩ̃sɔra bɔɔbɔɔ, na-n gbuo yʋʋ anɩ nyɛ̃kɩɛr thɔna, mɔ̃kɛ sɩ kɔɔ dɩɩr nɩnɩ.
12 Dɩ mɛ̃ na hana fɩlɛɛkɛ bʋɔnɔnɩ wɩrɛ na dɔnɩ ha pɛdara gaa thɩ̃thɩɩn, gɩ do nɔɔ dakha na too na-n therna tibilə'.
13 Omɩna, ado wɩrɛ daarɛnɩ daanɩkɛ dɔnɩ khir gɩ, sa-n ƴaal na-n jɩ mɔ̃ gɩ hanaa ga, na-n bɩ nɩ ho wɛkɛ na hananɩ nũ pɛraa ga.
14 Gɩdonɩ mɔ̃ sɩ pɛrnɩ haar gel dɩ Jeju kɔɔ khire sa bir a ɩɩr a the khirera, mɛ̃ sɩ jɩ dakha ga har na wɩrɛ pɩɛrnɩ Jeju haar sa daar, Thãgba na kpa wɛr dɩ wa ɩ̃ kha na Jeju.
15 Nɩ yɛ gɩrɛ sɩ-n mɩɩ nɩnɩ mɔ̃kɛ Kɔ̃tɩn sonɩ, sɛr yidaraakɛ na sɛnɩ Kɔ̃tɩnɩ ɩ̃ bɔɔ, wɩrɛɛkɛ daarɛnɩ daanɩkɛ dɔnɩ khir sa kɔɔ kʋʋl wɩ ƴɩɛ a na jʋʋna'.
16 Gɩdonɩ Kɔ̃tɩnɩ thɛthɛ na ther Thãgbaa dʋɔ a na-n gbũ, dɩ nɔ khɩɩr na phaan, wa nɩrɛ Thãgbaa thɔ̃thɔ̃daar thu kɔ̃tɩ̃ɩ nɔ, dɩ dakha Thãgbaa tutuu na ʋnɛ, le wɩrɛ pɩɛrnɩ Kirisiti haar sa khiir na kɔɔ ɩɩr cacaca a na the khirera.
17 Agɩpɩ dɩphã sɛr yidaraakɛ na sɛnɩ, Thãgba na və̃ ser kha na wɛr dɩ sa gbɛbɩ kha kãkɛ ndɔlɔ̃pana hanɩ, gɩ do le sɩ caan Kɔ̃tɩn thãgbara ƴũ. Mɛ̃ na dɔ asɩ too sa toonɩ kha waa khorr na Kɔ̃tɩn.
18 Gɛr gɩ nɩ gba thɩmɩaakɛra a na ƴɔlana kha haar bɩɛlbɩɛl.