2
1 Sɩ-n bɩɛl nɛr omɩna, ado gɩrɛ dɔnɩ asɩ Kɔ̃tɩ̃ Jeju Kirisitii bir ɩ̃da gɩ, na asɩ gbɛbɩ kha na ɔr,
2 na-n do kpɩɛrɛ nyanyãa nɩ kɔrɔa', dɩ na-n do dakha haar na-n jɛ̃ nɩ gɩrɛraakɛ tibil na yɩnɩ aa, Thu Phuu mɩana nɩ agɩbo thɩmɩɩr ɩnɩ nɩ agɩbo aa, sɛbɛ thɛ asɩ pa ayɩ, Kɔ̃tɩnɩ wi daan pa'.
3 A gɩ ha mɔnakɛ na-n do tibil n fɩɩl na', gɩdonɩ dɔ Thãgba so bʋʋrɛ n kɔɔ ɩ̃ ɓo wɩ yɩ Sopugo tibilile a yɩr, kɛ wɩ thɩɩnnɩ bũburõ thɩɩnʋʋ,
4 Thãgbaa vardaar gɩɩkɛ na ɩrɛnɩ na yʋ bʋʋn gɩrɛ fɛʋraakɛ wɩ-n wenɩ Thãgba na gɩrɛraakɛ tibil n fʋɔrnɩ, a ba toorakɛ Thãgba fʋɔr cɔ kɔ̃tɩɩna sɩ ayɩ, ɩnɛrɛɛ thɛthɛra dɔ Thãgbara.
5 Na jɩna mɔ̃ mɩ-n kɔɔ mɩɛ nɩnɩ ga thɩ̃ɩlera ɔbɔɔkɛ mɩ kɔɔ hanɩ anɩ pa gaa?
6 Dɩ nɛnɛ̃ nɩ jɩrɛ thɩ̃ɛɛkɛ pɩɛrɛɛnɩ dɩ agado bɔɔ dana ga hʋɛ na yɩr da tha'.
7 Gɩdonɩ fãga gbulikɛ dɔnɩ sopugodaa 'lire har dɩ ga-n do thɔma, foo ʋrɛ pɩɛrɛɛnɩ nɛnɛ̃ n tɔ a khokhɩa ɓo dɩphã.
8 Liir Sopugodaarɩlera na yɩr dɩ wa yɩɩ, kɛ Jeju Kɔ̃tɩn na phʋʋnɩ na kʋ, a na hɛlʋʋlɛ dɩ ɔɔda na ther mɔ̃ a na-n ɩnɩ ga-n carbara.
9 Sopugodaarɩ ɩ̃ɩle Satãa fãgara ga the, na nɔ kpaa thɩ̃ɛsɔ, na jɩɩnsɔ, na ma kʋ thɩ̃ɛsɔ, dɩ gelesɔ fɛʋra na jɔrɛ na ka a na do tɩɩ fɩɩldaa.
10 A na gbaar gɩrɛ dɔnɩ thɩ̃ puu caar dɩɩdɩɩ fɛʋ a na-n fɩɩlna wɩrɛ n buureni, gɩdonɩ wa na sobɔr a na 'lɛ taara'.
11 Gɛrra dɔ kɩrʋ dɩ Thãgba thɔna war fãga ga-n fɩɩl wɩ wa-n pɛr sõsor haar.
12 Dɩ mɛ̃ wɩrɛ fɛʋʋkɛ na pɩɛrnɩ sobɔr haara', sɩɩ do thɩ̃ puu ka da war, na 'lɛ kɩɩlʋ.
13 Sɩ ado sɛr wɛ, omɩnaakɛ Kɔ̃tɩn n nanɩ, sɩ teenanɛ sa-n khɩa Thãgba wire wire anɩ sora, gɩdonɩ Thãgba kɔɔ phire ni caca fʋ paar dɩ na 'lɛ taarɛ, gɩ the Thu Phuurəəkɛ lea nɩnɩ kpɩɩ, gɩ the dakha ha pɛrɛraakɛ nɩ pɛrnɩ sobɔr haar.
14 Gɛr dɔ gɩrɛ a gbarɔnɩ tutugo bʋɔɔkɛ sɩ-n mɩɩnɩ a wena nɩ, nɩ puno nɩ bul kha na asɩ Kɔ̃tɩ̃ Jeju Kirisitii i dʋbɩ.
15 Gɛr gɩ gɩrɛ omɩna, nɩ fɔ gɩ ma, nɩ fɔ dɩɩrɛɛkɛ nɩ kɔɔ 'lɛnɩ, ado na asɩ nɔ gɩ, ado na asɩ sɛbɛsɔ gɩ.
16 Dɔ asɩ Kɔ̃tɩ̃ Jeju Kirisitii thɛthɛ, na Thãgba asɩ Thɩ, kɛ kɔɔ naan sɩnɩ, kɛ kɔɔ hana sɩnɩ khorr ha faarɛ na nũ pɛ bʋɔ bɔ jɩɩrra,
17 n cʋʋ nɩ na-n faa haar, a cʋʋ nɩ dakha nɩ 'lɛ fãga thɔ̃ bɔ cʋʋrɛra fɛʋ na thɩmɩɩ bɔɩra fɛʋ.