3
1 Gɩrɛ sɛnɩ omɩna, nɩ bɩɛlnɛ Thãgba na pɛ sar Kɔ̃tɩnɩ thɩmɩɩ n puno gɩ ca ga-n kpaar ga-n 'lɛ cʋʋr, mɔ̃kɛ gɩ hanɩ gɩrɛ anɩ pa;
2 gɩ do nɔɔ dakha Thãgba n taa sɩ gõgolõdarara na tɩɩ puusɔɔ nyɔ̃kɔɔ, gɩdonɩ ga do tɩbɩla fɛʋ hana ha pɛra'.
3 Sɩ sobɔdaar Kɔ̃tɩn do, ɔr gɩɩkɛ na cʋɛ nɩnɩ dɩ na tɩ kɩbɩ, a na bɛr nɛr dakha puu cʋʋ hɩ̃daarra.
4 Dɩrakɛ sɩ hana narɛ ha pɛrɛɛkɛ thɛnɩ Kɔ̃tɩnna, dɩ gɩrɛ sɩ kɔɔ so narnɩ nɩ-n cʋʋrɛ, dɩ thalera na cʋʋrakɛ na-n jalna.
5 Kɔ̃tɩn n thɔɔ anɩ ha a na pɛ naʋraakɛ dɔnɩ Thãgbaada na Kirisitii ha fʋra.
6 Asɩ Kɔ̃tɩ̃ Jeju Kirisitii i sɩ gba dɩ sa-n kpãkpaana nar omɩna, dɩ na hʋnɔ kha na omine wo omineekɛ dɔnɩ khãkhal, kɛ na-n ɩrɛnɩ mɔ̃kɛ dɩɩrɛɛkɛ nɩ kɔɔ 'lɛnɩ asɩ pa hana'.
7 Nɛrɛɛ thɛthɛ jɩrɛ anɩbara mɔ̃kɛ gɩ teenanɩ nɩ phɛla sɩ, gɩdonɩ ɔbɔɔkɛ sɩ kɔɔ hanɩ anɩ pa sa do khãkhala ga.
8 Sa kɔɔ kho tibili dɩko sɩ sa lɩmaa ga, sɩ dɩtɩnɛ na dɩwɩlʋ sɩ-n kɔɔ do thɔ̃ khena na vɔɔrɛ dɩ sa do heendaa tibil bɩɛllalakɛ anɩ pa ga.
9 Sɩ ga do hʋɛ sa kɔɔ hana gaaga, sɩ thɩ̃ nɩrɔrɛ sɩ ƴaal sɩ do nar na-n phɛl sɩ.
10 Gɩdonɩ ɔbɔɔkɛ sɩ kɔɔ hanɩ anɩ pa sɩ-n kɔɔ kpãkpãa narɛ ayɩ: Tibilikɛ n bɔnɩ thɔ̃ dʋʋr aa hana hʋɛ na kho dɩkor dakha ga.
11 Sɩ sɩ nɩɛrɛ dɩ ɩkhasɔ har anɩ thɩ̃thɩɩn a do khãkhala, wa-n do thɔma ga, sɩ dɩ wa-n hɩɩn gɩrɛ na ba wɩna'.
12 Ado wa tibil casɔɔle wɛ, sɩ gba Jeju Kirisiti Kɔ̃tɩnɩ i a na kpãkpaana wɩ a tɔna wɩ na pɩɛr wa-n dɔ awɩ thɔ̃ mʋmʋr, a yɛ awɩ nyɛ̃kɩɛr thɩ̃ɩkɛ na-n haanɛ wɩnɩ.
13 Sɩ ado nɛr wɛ omɩna, na-n vɔɔ bɔ cʋʋrɛra ga.
14 Sɩ ado tibil na-n nɩ thɩmɩaakɛ sɩ kherenɩ sɛbɛraakɛ nũə', nɩ dʋɔraa bʋrɛ, na-n bɔ kha na tibil ca ola', gɩ do nɔɔ yicuru n fʋʋ.
15 Sɩ na-n hɩɩnʋʋ lãlaar hɩɩnʋa', sɩ na-n dɩrɛɛ omi dɩɩrɛ.
16 Kɔ̃tɩnɩkɛ ha ɩɩ n thernɩ, ɔɔ thɛthɛ na-n ha nɩ ha ɩɩ bɔɔ fɛʋ, thɩ̃ɛ fɛʋra. Kɔ̃tɩn na-n hana kha na nɛrɛ fɛʋ.
17 Mɛr Pol khera fʋɔrɛɛkɛ na ɩ̃ nyɛ̃. Gɛr dɔ jɩɩn ɩ̃ sɛbɛsɔra fɛʋ, thale dɔ ɩ̃ khere.
18 Asɩ Kɔ̃tɩ̃ Jeju Kirisiti na-n jɛ nɛrɛ fɛʋ bʋɔra.