3
1 Sobɔr thɩmɩɩrɩkɛ do gɩ yɩ: Ado tibil na ɩnɩ-n dɔ we gbɛbɩdaraa hɩɩndaar thɔ̃ bʋɔ a-n ƴaal.
2 Dɩ gɛr gɩ we gbɛbɩdaraa hɩɩndaar teenanɛ a dɔ ʋrɛ tibil na punoni na pɛr sora' a hanana khɛ bɩɛl, a dɔ dɩbara fʋdaar, a dɔ yʋ bɔ tibil, a hanana fɩl bʋɔ, a dɔ kpakpal tee tibil, a punone a na dɩrɛ tibil thɩ̃ɛ;
3 a na-n do ta laardaara', a na-n do kɩl ƴaal tibilə', sɩ a dɔ bɩ̃ bɔ tibil, na ha ie ƴaal tibil, a na-n do war laardaara'.
4 Dɔ a do tibilikɛ n punoneni da-n ma ɔɔ cɔra, dɩ jɩɩ fʋ ɔɔ bɩsãsɔ dɩ wa-n nɩ nũu dɩ wɩ hananaa cʋʋr.
5 Gɩdonɩ ado tibil na puno a na ma ɔɔ cɔra ga, mɔ̃ a na fʋ sɩ na ma Thãgbaa we gbɛbɩdarara?
6 Sɩ wo ntɛ na-n do Thãgbadaar phaa ga, anaa a na kar ire a na ba lõ so heen ca bɩɛlla na Satã.
7 Sɩ a dɔ tibilikɛ hananɩ i bʋɔ wɩrɛraakɛ na dɔnɩ ha pɛdara ga, dɩ mɛ̃ tibil na yɩɩraa so paara', a na ji dakha Satãa pherra ga.
8 Mɛna gɩ ha dakha na wɩrɛ dɔnɩ we gbɛbɩdaraa thɔ̃ dodara, wɩ teenanɛ wɩ dɔ tɩɩ cʋnanɛ, wa-n do khalƴɩɛ yenyɔdara ga, wa-n do ta laardara ga, wa-n phʋʋn tɩbɩla na fãga bɩɩ awɩ war ƴaalla ga,
9 wɩ jɩɛ ma thɩ̃ gbulləəkɛ dɔnɩ ha pɛrɛɛda, a hanana kpɩɛrnɔɔkɛ 'leanɩ dɩ paar.
10 Wa jʋʋr wɛr ɓo na hɩɩn ado wa hana so paara' wa-n do awɩ thɔ̃.
11 Ɔmɛna gɩ dakha na khɛra, wɩ teenanɛ wɩ dɔ tɩɩ cʋnanɛ, wa-n do i kʋɛ tibilə', wɩ hana dɩbara fʋrɛ, wɩ dɔ sobɔ cʋʋ tɩbɩla thɩ̃ɛ fɛʋra.
12 We gbɛbɩdaraa thɔ̃ dodara teenanɛ wɩ hanana khɛ bɩɛl, wɩ jɩɛ ma awɩ bɩsãsɔra na awɩ thɛthɛɛ cɔra.
13 Gɩdonɩ wɩrɛ n jɩɛnnɩ do awɩ thɔ̃ bɔɔbɔɔ, wɩ-n tɔr awɩ thɛthɛɛ cʋ dɩ wa-n pɛr, dɩ wɩ hananɛ dakha 'lar ha pɛrɛraakɛ wɩ hananɩ Jeju Kirisitira.
14 Mɩ khere farɛ thɩ̃ɛsɔɔkɛ sɩ mɩ pɛrɛ haar kɩɛr na gbe ma pɔr afɩ pa.
15 Dɩ ado ma pʋɔr sɩ fɩ jɩ mɔ̃ tibil teenanɩ ɔɔ fɩl n hana Thãgbaa too thɩ̃thɩɩn, kɛ dɔnɩ dakha Thãgba yidaarɩ we gbɛbɩdara, a dona thɩkarʋ ka sobɔr dɛɛnɩ.
16 Tibil na puno na bana mɔ̃ Thãgba fʋɔrɛ donɩ thɩ̃ hulõo a ka ga, gɛr dʋɔn: Jeju Kirisiti kɔɔ gbaar tibil tomɩr a debi do tɩɩ yɩnanɛ, Thu Phuu kɔɔ nɩrɔrɛ dɩ tɩɩ sarʋ a do; thɔ̃thɔ̃daar thusɔ kɔɔ yɩɩrɛ. Ɔɔda kɔɔ mɩɩrɛ casɩ tibil caarsɔra; wɩ kɔɔ pɩɛrɛ haar thɩɩraakɛ, Thãgba kɔɔ khəsuure dɩ 'lɛ i dʋbɩrɛ le ƴũ.