2
1 Sɩ fɛr ɩ̃ bikuun, hanana fãga gɩ the bɔ jɩɩrraakɛ hanɩ Jeju Kirisitii pa.
2 Gɩrɛ fɩ nɩɛnɩ dɩ ɩ̃ mɩɩna tibil jɔjʋɔɔ ƴɛra, gba hana sobɔ tɩbɩlaakɛ na punoneni na dɩɩr dakha wɩ̃ tibil.
3 Gaarɛ bʋɔ nakha mɛrɛ a hɔ Jeju Kirisitii sɔrasɩ bɔ.
4 Tibil na ha sɔrasɩ cʋʋ paar sɩ a bir a faa ɔɔ kpɩɛr nɛnɛ̃ bɔɔkɛɛ thɩna, ado a-n ƴaalɛ a da ɔɔ sɔrasɩ kɔ̃tɩ̃ haara'.
5 Kɔlɔ̃kɔɔ can na 'li khor cacadaar dʋʋrra ado aa kɔɔ ca mɔ̃kɛ ga jɔfʋ sonaa ga.
6 Dɔ kokol n kɔɔ gbʋʋ yʋʋ kʋʋlɛla ɓo sɩ khar na-n kpaan.
7 Kpɩɛrɛ gɩrɛ mɩ sonɩ a hɩnɛ; Kɔ̃tɩn na hana fɩ kpɛsɛrɛ thɩ̃ɛ fɛʋra.
8 Na jɛna Jeju Kirisitiikɛ dɔnɩ Davɩdɩɩ məl, ʋrɛɛkɛ kɔɔ ɩrɛnɩ a the khirera mɔ̃kɛra tutugo bʋɔɔkɛ mɩ-n mɩɩnɩ sonɩ,
9 kɛ mɩ-n gaarɔnɩ bʋɔ gɩrɛ dɩ wɩ ba linə mi dɩ ɩ̃ ho puu cʋʋ tibil, sɩ Thãgbaa thɩmɩɩ wer na ha li paara'.
10 Gɛr gɩ dɩ ɩ̃ hana yɩrrɛ thɩ̃ɛ fɛʋra, wɩrɛ Thãgba phiirni n puno wɩ 'lɛ taarɛɛkɛ hanɩ Jeju Kirisitira na i dʋbɩrɛɛkɛ dɔnɩ khorrdaa.
11 Sobɔr thɩmɩɩrɩkɛ do gɩ yɩ: «Ado sɩ kɔɔ khire kha na ɔr, sa hananɛ kha dakha yire na ɔr.
12 Ado sa yɩr, sa bulle kha na ɔr ɔɔ fãgadaar dora. Ado sɩ bʋʋ, oti a na bo sɩ.
13 Ado sa do sobɔ tibilə', sobɔ tibillə or na dorakɛ 'lo, gɩdonɩ a na puno na debi ɔɔ fɩl dɩ ga ha kpɩɩ na gɩrɛ a dona'.»
14 Cʋɛ tɩbɩla wɩ jɩna ga thɩ̃ɩkɛ, dɩ na kpãkpaanɛ war kheu Thãgbaa ƴɛra wa-n bana mɔlɔ thɩ̃ banaa ga, ga do thɩ̃ bʋɔ ga, kʋɛrɛ gɩ-n do wɩrɛraakɛ n pɛ gɩnɩ nũu.
15 Gbuoro yʋʋ na jɩlɛ Thãgbaa ƴɛra mɔ̃ fɩ donɩ thɔ̃daarɩkɛ daaraanɩ haar sɩ yicuru na fʋ fa', sɩ fɩ do ʋrɛ n 'laanɛnɩ Thãgbaa thɩmɩɩ dẽdẽdẽ.
16 Golone folo folola na khaakhaar thɩmɩara, gɩdonɩ wɩrɛ n cʋɛnɩ ga thɩ̃ɩle gɩ-n cʋʋ wɛr dɩ awɩ Thãgba fɩl 'lee n puuro dɩ ga-n pɛr.
17 Awɩ thɩmɩɩ dakha n ƴɛrrɛ nɔr khaa, mɛ̃ gɩ ha na Imene na Fɩlɛtɩ,
18 kɛ kɔɔ dɛnɩ hʋɛra a lɛ̃ sa faa sobɔr dɩ wa-n mɩɩ ayɩ: Khi ɩɩrɛ mãa kpãsɛrɛ; dɩ wɩ cʋʋrɛ ɩkhasɔɔ ha pɛ dɩɩ kʋɛ.
19 Sɩrakɛ Thãgbaa gookɛ a kpɛɛnɩ gɩ jɩɩlɛ kɩbɩ, a hana thɩmɩɩrɩkɛ dɔnɩ jɩɩn dɩɩ so ayɩ: «Kɔ̃tɩn jɩrɛ wɩrɛɛkɛ dɔnɩ ɔɔda.» Wo: «Tibil wo tibilikɛ yɛnɩ Kɔ̃tɩnɩda ɩnɩ do, dɔ a hʋnɔna sopugo.»
20 Cɔ kɔ̃tɩɩna, ga-n do bʋlaakɛ wɩ cʋʋnanɩ dɛ na gɩrɛ wɩ cʋʋnanɩ dɛ bulona n haanle dɩbara ga, sɩ thɩrdaa n hale dakha na jadaa, dɩ yɛ n dor bʋla ɓʋ̃ɔ sɩ yɛ n do thɔ̃ pɔɩ cʋʋdaa.
21 Dɩ ado tibil fʋ dɩbara a phu ga sopugosɔraale, ɔr na dɔ bʋla ɓʋ̃ɔ, kɛ Thãgba thɩɩnnɩ kpɩɩ, dɩɩ do bɔ taa thɩ̃ɛ Kɔ̃tɩnna, a too ga too a na-n do thɔ̃ bɔ caar dɩɩdɩɩ fɛʋ.
22 Gɩrɛ n kɔnɩ daɓola thue, fe khiru pɛ gar, sɩ na ƴaalɛ fɩl sarʋ, na ha pɛrɛ, na naʋ, na ha ɩɩ, nakha wɩrɛɛkɛ n fʋɔrɛnɩ Kɔ̃tɩn na ha phuu.
23 Bɔ də̃bəəl thɩ̃ bananɛɛkɛ na hananɩ kɩrʋa', gɩdonɩ fɩ jɩrɛ gɛr n ɩrɛna kɩla.
24 Dɩ ga teena Kɔ̃tɩnɩ thɔ̃daar na-n ɩrɛna kɩla ga, a ka teenanɛ a hanana hɛlɛlɛ fɩlɛ na tɩbɩla fɛʋ, a dɔ dakha tibilikɛ n punoneni da-n dɩɩr tibil thɩ̃ɛ; a dɔ ha fʋ tibil,
25 a hanana ha bulole mɔ̃ a-n narnɩ wɩrɛ na-n tuonni dɩɩra', a na pɛna nũu mɔ̃ ga donɩ Thãgba cʋʋ wɛr dɩ wɩ debi haar a jɩ gɩrɛ n dɔnɩ sobɔr,
26 gɩ cʋʋ dakha kpɩɛrɛ gɩ lõ war wɩ taa Satãa pherra, kɛ fɔ wɩnɩ ɩɩrɔ wa-n cʋɛ ɔɔ tuur.