3
1 Mɔ̃ nɩ ɩɩrnɩ khirera nakha Kirisiti, na-n ƴaalɛ ƴũ thɩ̃ɛ, ka Kirisiti hanɩ gɩrɛ a too Thãgbaa nyɔ̃bɔra.
2 Na-n kpɩɛrna ƴũ thɩ̃ɛ, na-n kpɩɛrna gɩrɛ hanɩ thɩɩra ga.
3 Gɩdonɩ nɩ kɔɔ khire dɩ anɩ yi ha Kirisitira dɩphã a ker Thãgbaa pa.
4 Dɩ ɔbɔɔkɛ Kirisitiikɛ dɔnɩ anɩ yi hana na yɩrnɩ, le na yɩr kha dakha na ɔr ɔɔ i dʋbɩra.
5 Gɛr gɩ nɩ kɔ anɩ thɩ thɩ̃ ƴaal, kɛ dɔnɩ bɔdɛl cʋʋrɛ, na thɩ̃ bise cʋʋrɛ, na thɩ̃ puu ƴaalɛ, na thɩ̃ puu kpɩɛrɛ, na ha pɩɛrɛɛkɛ dɔnɩ bɩɛl na thɩl jir.
6 Gɛrra n cʋɛ nĩkhii dɩɩ fʋ Thãgba.
7 Dɩ nɛrɛ dakha nɩ kɔɔ hananɛ ga fɩlɩlera mamara ɔbɔɔkɛ nɩ kɔɔ ha garnɩ.
8 Sɩ nɛnɛ̃kɛ nɩ dɔna gelesɔ fɛʋ a faa: Nĩkhii, nĩkhi khɩɩ, kpallɛ, tibil i kʋɛrɛ na khaakhaar thɩmɩaakɛ n thɛnɩ anɩ nɔra.
9 Na-n kuur sɔ̃sɔ na pɛ khasɔa', gɩdonɩ nɩ kɔɔ thʋbɩrɛ tɩɩ tɩ̃ dʋʋr na ɔɔ thɔ̃ a faa,
10 sa to tɩɩ pha dʋʋrɩkɛ n dʋɔnnɩ daphaa da-n pɛr, da-n hona Thãgbaakɛ tieni dɩ a na jɩɩ hananaa jɩ bʋɔ.
11 Liir Juifi na ha kpɩɩ dɩ wɩrɛ na dɔnɩ Juifisɔa ha kpɩa', dɩ ʋrɛ wɩ kurni khʋ̃ʋ gɩ dɩ ʋrɛ wa kurni khʋ̃aa ga, dɩ hɔ̃ baldara wɛ dɩ wɩrɛ na phuoni yire paa ga, dɩ dee gɩ dɩ waʋ ga; sɩ Kirisiti dʋɔn thɩ̃ɛ fɛʋ a har dakha thɩ̃ɛ fɛʋra.
12 Gɛr gɩ mɔ̃kɛ nɩ donɩ wɩrɛ Thãgba phiirni dɩ nɩ phu, a dona dakha wɩrɛ a-n nanɩ, nɩ hanana bɔ jɩɩr gɩ kɔ̃tɩ̃ gɩ ka, na ha bulo fɩlɛ, na dɩbara jor, na hɛlɛlɛ fɩlɛ, na ha fʋrɛ.
13 Ado tibil hana sor na ʋ̃ tibil, nɩ hanana kha ha fʋrɛ a faa na hana kha; mɔ̃kɛ Kirisiti kɔɔ faanɩ anɩ sopugosɔ, nɛrɛ dakha nɩ faa sopugosɔ na hana kha.
14 Sɩ gɩrɛ jɔnɩnakɛ thɩ̃ɛ fɛʋ dʋɔn nɩ hanana naʋʋkɛ dʋɔnnɩ bɩɛl do lidaakɛ n cʋɛnɩ tibil dɩ bɔr dɩ ka.
15 Ha ɩɩkɛ n thɛnɩ Kirisitira, kɛ Thãgba we narnɩ nɩ 'lɛ mɔ̃ nɩ donɩ tomɩ bɩɛl, nɩ dɔ ha ɩɩra n do kɔ̃tɩn anɩ hara, na-n hana dakha fɔfʋɔr haar.
16 Nɩ dɔ Kirisitii thɩmɩɩkɛ ɓɔnanɩ ka n too anɩ hara jɔɔ. Na-n dɩrɛ kha thɩ̃ɛ a na kpãkpaana khasɔ bɩɛlbɩɛl na kpɛsɛrɛ fɛʋ. Na-n khɩna Thãgbaa khɩkhɩɩ nɩ, na ɔɔ fɔfʋɔr nɩ, na Thu Phuu nɩɛsɔ; na-n khɩna gɩsɔ na fɔfʋɔr haar ga-n khɩɩ Thãgba.
17 Dɩ thɩ̃ɛ wo thɩ̃ɛɛkɛ nɩ-n cʋʋnɩ, a thɩmɩɩr nɩ-n mɩɩ, a thɔma nɩ-n do, na-n cʋɛ thɩ̃ɛ fɛʋ mɔ̃ nɩ donɩ Jeju Kɔ̃tɩnɩda, a na khɩana Thãgba Thɩrɛ gɩ do ɔɔda dɔ nɔɔ.
18 Khɛra, na-n jɔ anɩbara anɩ kora mɔ̃ nɩ donɩ Kɔ̃tɩnɩda.
19 Kona, na-n na anɩ khɛr, na-n hananaa fɩl khɩa'.
20 Bɩsana, na-n nɛ anɩ thɩ na anɩ nɩ nũu thɩɛna fɛʋ, gɩdonɩ gɛr n da Kɔ̃tɩn haar.
21 Thɛ, na-n gba bɩsanana fɩl khɩɩ awɩ kpɩɛr n kʋɛa'.
22 Dea, na-n nɛ nũu thɩ̃ɛ fɛʋra anɩ kɔ̃tɩ̃sɔraakɛ nɩ donanɩ kha tibil kɛ thɩɩra, sɩ ga-n do awɩ ƴɛra dɩbara gɩ ho tɩbɩla nɩ-n ƴaal nɩ da haara', sɩ na-n cʋɛ na ha bʋɔ gɩdonɩ Kɔ̃tɩn nɩ-n ma.
23 Thɩ̃ɛ wo thɩ̃ɛɛkɛ nɩ-n cʋʋnɩ na-n cʋɛ na haar fɛʋ, gɩ ho Kɔ̃tɩnna nɩ-n cʋʋ ga-n do tɩbɩlala ga;
24 na-n jɩnana dɩ Kɔ̃tɩn na ka nɩ na thɩ̃ɛɛkɛ a thɩɩnnɩ gɩ dɔ anɩda. Gɩdonɩ Kirisiti dʋɔn Kɔ̃tɩnɩkɛ nɩ-n doronɩ thɔma.
25 Gɩdonɩ ʋrɛɛkɛ n cʋɛnɩ puure a na 'lɛr lɩmɩnɛ ɔɔ puu cʋʋrara, dɩɩdɩɩ hɩɩnɛ na hala'.