2
1 Gɩdonɩ mɩ-n ƴaalɛ nɩ jɛ mɔ̃ kɛ̃kɛrɛ̃ kɔ̃tɩ̃ɩkɛ mɩ-n kɛ̃kɛrɛnɩ anɩ sora hanɩ, na wɩrɛraakɛ hanɩ Laʋdɩse, na wɩrɛraakɛ na yɛ mɩnɩ ƴɛbiro pa',
2 gɩ do nɔɔ wɩ yɩ ha ƴɔllɛ, wɩ gbɛbɩ wɩ do bɩɛl naʋra, wɩ hana tu jɩɩrɩkɛ thɛnɩ jɩ bʋɔra, wɩ puno wa-n jɩna Thãgbaa thɩ̃ gbulikɛ dɔnɩ Kirisitii thɛthɛ.
3 Ɔr cʋɛ Thãgbaa kpɛsɛ na jɩɩrɩkɛ hɔnɩ tɩɩ ko thɩ̃ɛɛkɛ keranɩ dɩɩ yɩr.
4 Mɩ-n mɩɩrɛ thakɛ gɩ do nɔɔ tibil na fɩɩl nɩ na nɔ da thɩmɩa ga.
5 Mɛrɛɛ thɛthɛ na hanɩ anɩ parakɛ gɩra', sɩ ɩ̃ thu har kha na nɛrɛ, dɩ daʋ fʋ mɛr mɔ̃ mɩ yɩnɩ fɩl bʋɔ dɩɩ ha anɩ thɩ̃thɩɩn, na mɔ̃ anɩ ha pɛɛkɛ nɩ hananɩ Kirisitira tɩnɩ kĩkĩ.
6 Mɛ̃ gɩ mɔ̃kɛ nɩ 'lɛnɩ Jeju Kirisiti dɩ do Kɔ̃tɩn, na-n ɩrɛ kha na ɔr na wa fɩl,
7 a gɔ nɛɛ gɩ hulono ɔrra; nɩ jɩlɛ ɔrra kɩbɩ, nɩ tɛ ha pɛrɛraakɛ nɩ hananɩ mɔ̃kɛ dɩɩrɛɛkɛ wɩ kɔɔ dɩɩr nɩnɩ hanɩ. Nɩ dɔ Thãgba khɩɩrɛ n too nɩ nɔɔ.
8 Na-n jɩɛ dʋ bʋrɛ, na-n do tibil n fʋ nɩ a ɩɩrɔ na tibil jɩɩrɩkɛ dɔnɩ mɔlɔdaa wɩ-n fɩɩlna nɩna', gele fɛʋ kpamna gɩ the na dɩɩrɛraakɛ na dɔnɩ bɔ taa dɩɩra', kɛ dɔnɩ thɩ̃ tinəneeda, ga do Kirisitii pa gɩ tha'.
9 Gɩdonɩ Thãgba dʋʋr koo har Kirisitii tomɩra.
10 Dɩ anɩ yi hanana na Kirisiti, dɩkha na ɓɔr nɩ fɩɩʋraka'. Ɔr dɔ yʋʋ kɔ̃tɩnasɔra fɛʋ na fãgadarasɔra fɛʋ.
11 Mɔ̃ nɩ donɩ kha bɩɛl na Kirisiti wɩ kɔɔ kur nar khʋ̃ʋ, sɩ ga do tibil nyɛ̃ɛ kuro ga, sɩ Kirisiti n kuro gɩ; a thɩɛna gaa gɛr dɔ taarɛ tɩɩ tɩ̃ dʋʋrra.
12 Yɔ kpɛɛrɛra wɩ kɔɔ dʋ nɩ kha na Kirisiti, sɩ Thãgba ɩɩr nɩ kha dakha khirera wo na ɔrra, dɩɩ the ha pɛrɛraakɛ nɩ hananɩ Thãgbaa fãgaraakɛ kɔɔ cʋgɛɛnɩ dɩ ɩɩr a the khirera.
13 Nɛrɛɛkɛ mamara anɩ sopugo na mɔ̃ na kɔɔ kurni khʋ̃a' dɔnɩ nɔɔ dɩ nɩ kɔɔ khi, sɩ nɛnɛ̃ Thãgba bire ha nɩ kha yire na Kirisiti a faana asɩ sopugosɔ fɛʋ.
14 Jɔfʋʋkɛ kɔɔ kheranɩ asɩ so heen khere dɩɩ do a thɩɛna gaa sor heene sɩ asɩ Thãgbaa jɔfʋ kʋɛrara, Thãgba bũburõ ger a faa mɔ̃ a gba gɩnɩ a kpa thɩrʋra.
15 Kʋkʋ thɩrʋʋ pa gɩ the dɩ Kirisiti puno kɔ̃tɩnasɔ na fãgadarasɔɔ fãga a tagɩrɩ, sa nɩna tɩbɩla fɛʋ dɩ ɔr punone wi.
16 Gɛr gɩ na-n do tibil n yɩ hʋɛ a na-n yɩ nar dɩɩ gɩrɛraakɛ nɩ-n khonɩ dɩ na-n yɔna ga, agɩbo gɩ do fɛtɩ thɩmɩɩrra, na sɩpo pha hɩɩndaara dɩ hɩɩr widaara gɩ woa'.
17 Gelesɔ fɛʋ dʋɔn gɩrɛ na ɩnanɩɩ jəər, sɩ gɩrɛ dɔnɩ sobɔ bire Kirisiti gɩ.
18 Na-n do tibil n fɩɩl nɩ na sõso dɩbara jor, na thɔ̃thɔ̃daar thusɔɔ fʋɔrda, gɩ cʋʋ nɩ nɩ 'lee khorɩkɛ na 'lɛna'. Tibil ca ole ire a-n ka thɩɛnaakɛ a yɩnɩ ɩnɩ yɩrɛ, gɩdonɩ ɔɔ kpɩɛrra aa-n kpɩɛrna Thãgba ga;
19 sɩ aa-n ka dɩ ma Kirisitiraakɛ dɔnɩ yʋa', kɛ dɔnɩ ʋrɛ n cʋɛnɩ tomɩr fɛʋ dɩ ɔɔ ƴɔɔ pa na cela fɛʋ n li gi dɩɩ coor a do bɩɛl, a khɔ̃ dɩɩ do Thãgbaa pa gɩ the.
20 Gɩdonɩ nɩ kɔɔ khire kha na Kirisiti, na ha kha dɩkha na dɩɩrɛɛkɛ na dɔnɩ bɔ taa dɩɩra', kɛ dɔnɩ thɩ̃ tinəneeda ga, mɔ̃gɩdo dɩ na hana fɩlɛ 'lo gɩ ho thɩɩkɛɛda nɩ do, nɩ sɩrɔ wa-n ha nɩ jɔfʋ wɩ yɩ:
21 Fa-n gba ga, fa-n 'lɛ hɩɩna', fa-n thara'.
22 Sɩ gelesɔ fɛʋ thɩ̃ kʋɛna gɩ do a fɩ yɩ fɩ gba gɩ a na cʋɛna thɩ̃ɛ, dɩrakɛ wo tibil jɔfʋ gɩ na tibil dɩɩrɛ.
23 A fɩ yɩɛ wer gɩ-n hʋrɛ kpɛsɛrɛ, mɔ̃ gɩ-n hananɩ dɩbara fɛrɛ Thãgba fʋɔrɛ, na dɩbara jor, na tomɩ hʋɔlɛ dɩbara, sɩɩ dorakɛ ga do bɔ taa thɩ̃ɛ ha gela', sɩ tomɩrɩkɛ gɩ-n kʋnɩ thue dɔrɔɔm, dɩɩ do gɩ daaraarɛ gɩ.