1
1 Mɛr Pol na Timothe, sɛrkɛ dɔnɩ Jeju Kirisitii thɔ̃dara, thɔna sɛbɛɛkɛ a ha Jeju Kirisitii tɩɩ phusɔɔkɛ hanɩ Filipi, na we gbɛbɩdaraa hɩɩndara, na we gbɛbɩdaraa thɔ̃ dodara.
2 Thãgba asɩ Thɩ na Jeju Kirisiti Kɔ̃tɩn n hana nɩ ha ɩɩ a jɛ nɩ dakha bʋɔra.
3 Bɔɔ fɛʋʋkɛ ma-n jɩna nɩnɩ mɩ-n khɩɩrɛ ɩ̃ Thãgba.
4 Bɔɔ fɛʋʋkɛ mɩ-n bɩɛlnɩ Thãgba, daʋ mɩ-n bɩɛlna dɩ ma-n pɛ nar fɛʋ.
5 Gɩdonɩ nɩ-n bulle tutugo bʋɔɔ thɩmɩɩ mɩɩrɛ, dɩɩ fʋna caca wire a dana nɛnɛ̃kɛ.
6 Mɩ jɩrɛ tue dɩ ʋrɛ fɔnɩ anɩ hara thɔ̃ bɔ caakɛ da-n cʋʋ, a na jalna gɛr waa na ba pɩɩr Jeju Kirisitii wirə.
7 Gɩ teere kha ɩ̃ hana kpɩɛr caar thakɛ nɛrɛra, gɩdonɩ mɩ fʋ nɛr na ɩ̃ ha, gɩdonɩ nɛrɛ fɛʋ nɩ bulle kha na mɛrɛ bɔ jɩɩrɩkɛ Thãgba kɔɔ jɩ mɩnɩ, a khaɩra mɩ ha, a ɩ̃ kɛ̃kɛrɛnaakɛ mɩ-n kɛ̃kɛrɛnɩ tutugo bʋɔɔ thɩmɩɩ n jɩlɛ kɩbɩ gɩ.
8 Thãgba dɔ ʋrɛ tɔ garnɩ yire dɩ ɩ̃ ha hor dɔɔ nɛrɛ fɛʋʋ sora, naʋraakɛ mɩ hana narnɩ ɓoɓo dɩɩ do Jeju Kirisitii pa gɩ the.
9 Dɩ gɩrɛ mɩ-n bɩɛlnɩ Thãgbara dʋɔn, anɩ naʋ n khɔna na pɩɛr wire wire na jɩɩr na kpɛsɛ hulone,
10 nɩ puno na-n jɩ gɩrɛ bʋɔnɔnɩ a jɔ fɛʋ, gɩ do nɔɔ nɩ phu nɩ 'lee dɩ paar Kirisitii wirə;
11 nɩ hinə fɩl sar beekɛ Jeju Kirisiti n cʋʋnɩ dɩ ga-n se, ga-n dʋbɩ Thãgbaa i ga-n khɩɩnaa.
12 Omɩna, mɩ ƴaalɛ nɩ jɛ dɩ gɩrɛ kɔɔ dana mɩnɩ ka cʋʋrɛ dɩ tutugo bʋɔɔ thɩmɩɩ ka dɩ ga-n jal ƴɔɔ.
13 Gɩdonɩ fãgadaarɩ gardɩsɔ fɛʋ na wɩ̃ tibilsɔ paar fɛʋ jɩrɛ dɩ Kirisitiida dɔ nɔɔ dɩ ɩ̃ ha khaɩraakɛ.
14 Dɩ ɩ̃ khaɩ lona cʋʋrɛ dakha omɩna jɔɔ dɩ wɩ faa haar a ha Kɔ̃tɩn, a hanana 'lar a pɛr dɩ wa-n mɩɩna Thãgbaa thɩmɩɩ, sɩ maar na-n fʋ wa'.
15 Sobɔr gɩ, ɩkhasɔ n mɩɩrɛ Kirisitiida na gbugi na nɔkhaa, wɛ na-n mɩɩ na ha bʋɔ kpẽgelẽ;
16 sɩ ha bɔdaraakɛ wer n mɩanɩ naʋra gɩ the, gɩdonɩ wɩ jɩrɛ dɩ Thãgba pɛ marɛ ɩ̃ tea na pɛ tutugo bʋɔɔ thɩmɩɩra.
17 Sɩ nɔkhadaraale wer n mɩanɩ Kirisitiida, awɩ dɩbara na kpɩɛrra gɩ the, ga do bɩ̃ bʋɔra gɩ tha'. Wɩ-n ƴaalɛ ɩnɩ-n birə na pɛ mar bɔ gaarɛ ɩ̃ khaɩdaar dora.
18 Anye ga cʋʋ? Gɩdonɩ a gɩ ha mɔ̃ gɩ hanɩ, gɩ dɔ bɩ̃ puu agɩbo bɩ̃ bʋɔ, sɩ Kirisitiida n mɩɩrɛ, dɩ gɩ da marɛ, sɩ ga da marɛrakɛ ga-n jalna.
19 Gɩdonɩ mɩ jɩrɛ tue dɩ ɩ̃ taadara gele na do fɛʋ, gɩ the anɩ Thãgba bɩɛlla, na bullelaakɛ Jeju Kirisitii Thu n bulni,
20 mɔ̃kɛ mɩ-n pɩɛrnɩ gɩrɛ na haar fɛʋ, dɩ ma-n pɛna nũu, dɩ yicuru na fʋ ma', sɩ mɩ ka hananɛ 'lar a jɩ dɩ mɔ̃kɛ gɩ-n kɔɔ hanɩnakɛ wire wire mɛna ga ha nɛnɛ̃kɛ, Kirisiti na 'lɛr cʋrɛ ɩ̃ tomɩra, ado ɩ̃ yi hanana gɩ, ado ɩ̃ khirə gɩ.
21 Gɩdonɩ ado mɛrra gɩ, Kirisiti dɔ ɩ̃ yi hana, dɩ khir dɔ khor 'lɛdaa.
22 Sɩ ado ɩ̃ yi hana kɛ thɩɩra na dor nɔɔ ɩ̃ thɔ̃ na-n jal ƴɔɔ, ga dor ma jɩ gɩrɛ ma phiirni bɔɔbɔa'.
23 Jɛ paar yenyɔ mɩ-n jɛ: Mɩ-n ƴaalɛ ka ɩ̃ thɛ jala tɔɔ kha na Kirisiti, gɛr dɔ gɩrɛ baannɩ;
24 sɩ mɔ̃ ga bɔ narnɩ dɔ kɩrʋ gɩ teere kha ɩ̃ hana yire kɛ tomɩrra.
25 Dɩ gɛr gɩ mɩ jɩnɩ tue dɩɩ do sobɔr gɩ, mɩ jɩrɛ dɩphã ma toore, ma sɩrɔrɛ sɩ ɩ̃ toona nɩ fɛʋ gɩ cʋʋ nɩ na-n bãba ha pɛrɛɛ da hanana;
26 dɩ mɛ̃ bɔɔkɛ ma birni wo na ha anɩ thɩ̃thɩɩn, ɩ̃dara na dor nɔɔ na-n khɩɩrɔ Jeju Kirisiti jɔɔ.
27 Sɩ thɩ̃ bɩɛl, nɩ hanana fɩlɛ gɩ tee kha na Kirisitii tutugo bʋɔɔ thɩmɩɩ, dɩ mɛ̃ ado ma pɔr na yɩ nɩ ado ma-n pɔa', sɩ ɩ̃ nɩɛ wa-n mɩɩ mɔ̃kɛ nɩ tɩnɩ kɩbɩ kpɩɛr bɩɛl hananɛna, dɩ na-n kɛ̃kɛrɛ̃ na ha bɩɛl ha pɛ kɛ̃kɛrɛnɛ tutugo bʋɔra.
28 Na-n do maar na-n fʋ nɩ anɩ lãlaardarasɔɔ phərəra thɩ̃ bɩɛllalaka', gɛr na nɛ war dɩ wɛr na ka na bũburõ, sɩ gɩ nɩna nɛr dɔ wɩrɛ 'lɛnɩ taarɛ dɩɩ do Thãgbara gɩ the.
29 Gɩdonɩ Thãgba kɔɔ jɩ nɛr bʋɔra, ga do dɩ na pɛ Kirisiti haar dɩbara ga, sɩ na-n gaarɛ bʋɔ ɔɔ sora.
30 Gɛrrara nɩ-n kɛ̃kɛrɛnɔ kɛ̃kɛrɛ̃ ca bɩɛlɩkɛra nɩ kɔɔ yɩ mɩnɩ dɩ ma-n kɛ̃kɛrɛna, dɩ nɩ nɩɛrɛ dɩ kɛ̃kɛrɛnɔna mɩ harakɛ gɩrɛ 'lo.