6
1 Bɩsana, anɩda Kɔ̃tɩnɩ ƴɛra dʋɔn, na-n nɛ anɩ thɩ na anɩ nɩ nũu, gɩdonɩ gɛr telene.
2 «Na cɔ afɩ thɩ na afɩ nɩ», gɛr dɔ caca jɔfʋʋkɛ hananɩ ʋlfɛrɛ ayɩ:
3 «Thɩ̃ɛ na bɔ farɛ fɩ hana dakha yire fɩ pʋɔr thɩɩra.»
4 Sɩ nɛr thɛsɔ, na-n cʋʋ thɩ̃ɛ gɩ thʋ̃ ga-n fʋ anɩ bɩsãsɔ nĩkhiə', sɩ na-n haanɛ wɩ a na dɩrɛna wɩ, a na naarna wɩ mɔ̃kɛ Kɔ̃tɩn n ƴaalnɩ.
5 Dea, na-n nɛ nũu anɩ kɔ̃tɩ̃sɔraakɛ nɩ donanɩ kha tibil kɛ thɩɩra, na maar na jẽu, sɩ na-n cʋɛ na ha bʋɔ gɩ ho Kirisitira nɩ-n cʋʋ,
6 sɩ ga-n do awɩ ƴɛra dɩbara gɩ ho tɩbɩla nɩ-n ƴaal nɩ da haara', sɩ mɔ̃kɛ nɩ donɩ Kirisitii deesɔɔkɛ n cʋɛnɩ gɩrɛ dɔnɩ Thãgbaa tuur na haar fɛʋ.
7 Na-n dɔ war thɔma na ha bʋɔ mɔ̃ gɩ donɩ Kɔ̃tɩnna nɩ-n do, ga do tɩbɩlala ga;
8 na-n jɩnana dɩ tɩbɩla fɛʋ bɩɛlbɩɛl, a dee ntɛ do, a waʋ ntɛ do, a na 'lɛr Kɔ̃tɩnna mɔ̃kɛ ɔɔ bɔ cʋʋ hanɩ.
9 Sɩ nɛr kɔ̃tɩnasɔ, na-n cʋɛ ɔmɛ̃ na anɩ deesɔ; nɩ sɛrɔ mɔ̃ nɩ-n mɩɩ warnɩ thɩmɩɩ khena, na-n jɩnana dɩ nɛrɛ na anɩ deesɔ Kɔ̃tɩ̃ bɩɛl nɩ hana dɩ hale ƴũ, aa-n hɩɩn tɩbɩla dɩɩdɩa'.
10 Gɩrɛ sɛnɩ dɩphã dʋɔn wɔɔ, nɩ dɔ anɩ puno na-n the anɩ bɩɛl dora na Kɔ̃tɩn na dakha ɔɔ fãga kʋkʋra.
11 Nɩ gba Thãgbaa ko ke thɩ̃ fɛʋ a tɔ, a punone jɩlɛ kɩbɩ a na pɩɛrɛ Satãa fɩɩl thɔ̃ɔkɛ a-n cʋʋnɩ.
12 Gɩdonɩ ga do lãlaardaraakɛ dɔnɩ tɩbɩla sɩ-n kɛ̃kɛrɛna ga, sɩ fãgadara sɩ-n kɛ̃kɛrɛna, na punodara, na wɩrɛ dɔnɩ dabirə fãgadara kɛ, nakha kɔ̃tɛɛbi puusɔɔkɛ hanɩ thãgbara ƴũ.
13 Gɛr dɔ kɩrʋ nɩ gba Thãgbaa ko ke thɩ̃ fɛʋ, dɩ ɔbɔɔkɛ wi puu na phanɩ nɩ puno nɩ pɩɛr lãlaardaar kĩkĩ, a nɩ kɛ̃kɛrɛnɛnakɛ a dana khu paar sɩ nɩ bo nɩ jɩɩl kɩbɩ.
14 Gɛr gɩ nɩ fɔ gɩ ma. Nɩ gba sobɔr gɩ do lophɛrɛ nɩ khɩmɩ pelela; nɩ gba fɩl sarʋ gɩ do kũkũ kɛɛ ther;
15 nɩ tɔ ha ie tutugo bʋɔɔ thɩmɩɩ mɩɩ ƴaalɛ gɩ do nɛfaa anɩ nɛra;
16 bɔɔ fɛʋ nɩ gba ha pɛrɛ gɩ do tomɩ phɩdaakɛ na punoneni a na khiir puu cʋʋ hɩ̃daarɩ dɔ sõ fɛʋ;
17 nɩ subo dakha taarɛ gɩ do the kpɩɛr, nɩ gbana dakha Thu Phuu bajɩnaakɛ dɔnɩ Thãgbaa so.
18 Na-n bɩɛlna Thãgba na-n phʋʋrnaa anɩ bɩɛlla bɔɔ fɛʋ ga-n the Thu Phuurə; na-n jʋrɛna na yɩrrɛ, nɩ bɩɛlnɛ na pɛ tɩɩ phuusɔra fɛʋ,
19 na mɛrɛra dakha dɩ ɔbɔɔkɛ ma-n hanɩ nʋɔ ɩ̃ mɩɩ tutugo bʋɔɔ thɩ̃ gbullə, ɩ̃ yɩ thɩmɩɩrɩkɛ ma gbanɩ na mɩɩna na 'lar, gɩ do gɩ yɩrrɛ casɩ.
20 Ga tutugo bɔɔlera mɩ doro ʋrɛ wɩ pɛrnɩ sɩ dɩ ɩ̃ bir gbãga ha gɩrɛ khaɩra; nɩ bɩɛlnɛ na pɛ mar ɩ̃ puno ma-n mɩɩ na 'lar mɔ̃kɛ gɩ teenanɩ ma-n mɩa.
21 Tɩsɩkɩɩkɛ dɔnɩ omineekɛ mɩ-n nanɩ, kɛ dɔnɩ sobɔ tibil Kɔ̃tɩnɩ thɔna, ɔr na mɩɛnɛ nɩ mɔ̃ thɩ̃ɛ fɛʋ hanɩ ɩ̃ pa na gɩrɛɛkɛ mɩ-n cʋʋnɩ.
22 Gɩrɛ mɩ thʋɔnaanɩ anɩ pa dʋɔn nɩ jɛ mɔ̃ thɩ̃ɛ hanɩ asɩ pa, gɩ cʋʋ nɩ nɩ faa haar.
23 Ha ɩɩ, na naʋ, na ha pɛrɛ n thɛ Thãgba Thɩrɛɛ pa na Jeju Kirisiti Kɔ̃tɩnɩ pa a na dana omɩna fɛʋ.
24 Wɩrɛ fɛʋʋkɛ n naannɩ asɩ Kɔ̃tɩ̃ Jeju Kirisiti na naʋʋkɛ na dɔnɩ dapɩnana', Thãgba na-n jɛ wɩ bʋɔra.