1
1 Mɛr Pol thɔ̃thɔn, sɩ ga do tɩbɩla kɔɔ pɛ mara', dɩ tibili pa gɩ the woa', sɩ Jeju Kirisitii pa gɩ the, na Thãgba Thɩrɛɛ pa kɛ kɔɔ ɩrɛɛnɩ khirera;
2 mɛrɛ na omɩna fɛʋʋkɛ sɩ hananɩ kha thɔna sɛbɛɛkɛ Galasɩ we gbɛbɩdarara.
3 Thãgba asɩ Thɩ na Jeju Kirisiti Kɔ̃tɩn, n hana nɩ ha ɩɩ a jɛ nɩ dakha bʋɔra.
4 Ɔr dɔ ʋrɛ kɔɔ 'laanɛnɩ dɩbara asɩ sopugosɔra a puno a ti si nɛnɛ̃ bɔ puurəəkɛ mɔ̃ Thãgbaakɛ dɔnɩ asɩ Thɩ tuni;
5 ɔɔ i n dʋbarɔ na jala waa khorr vʋ̃ʋ. Amɛn.
6 Nʋɔ kpaa mɛr mɔ̃kɛ nɩ faanɩ dapaara ʋrɛɛkɛ kɔɔ wɛ nɩnɩ dɩɩ the Kirisitii bɔ jɩra, sa bir kɛr na-n hɩɩn tutugo bɔ kpɩɩ,
7 sɩɩ dorakɛ tutugo bɔ kpɩɩ na hala'; sɩ tɩbɩla haanle dɩ wa-n bũburõ ni kpɩɛrɛ, dɩ wɩ-n ƴaalɛ ɩnɩ-n deba Kirisitii tutugo bʋɔ.
8 Dɩ ado sɛrɛɛ thɛthɛ gɩrakɛ, dɩ ado Thãgbaa thɔ̃thɔ̃daar thu gɩɩkɛ thɛnɩ ƴũ n mɩa nar tutugo bʋɔ dɩɩ ha kpɩɩ na gɩrɛɛkɛ sɩ kɔɔ mɩɩnɩ, dɔ sʋɔn n 'lii.
9 Sɩ kɔɔ mãa sor, sɩ dɩ mɩ birrakɛ ma-n 'loro gɩrɛ wo, ado tibil na mɩɩ nɩ tutugo bʋɔ dɩɩ ha kpɩɩ na gɩrɛɛkɛ nɩ kɔɔ 'lɛnɩ, dɔ sʋɔn n 'lii.
10 Dɩ nɛnɛ̃ tɩbɩla mɩ-n ƴaal wa-n khɩa mɩ yaa, Thãgba mɩ-n ƴaal a na-n khɩa mɩ? Agɩbo tibil mɩ-n ƴaal ɩ̃ da haar kã? A ma ƴaal 'lo ma-n da tɩbɩla haar ma do Kirisitii dea'.
11 Mɩ so narɛ gɩrɛ omɩna, dɩ tutugo bʋɔɔkɛ mɩ kɔɔ mɩɩnɩ, ga do tibildaa ga;
12 gɩdonɩ ga do tibili pa mɩ kɔɔ 'lɛ ga, dɩ tibil kɔɔ dɩrɛ mɩ woa', sɩ Jeju Kirisitii nɩrɔra mɩ kɔɔ 'lɛ gɩ.
13 Gɩdonɩ nɩ kɔɔ nɩrɛ mɔ̃kɛ ɩ̃ fɩl kɔɔ hanɩ mamara ɔbɔɔkɛ mɩ-n kɔɔ fʋɔrnɩ Juifi Thãgba fʋɔrɛ, dɩ ma-n kpoo gbõgolonena Thãgbaa we gbɛbɩdarara dɩɩ ho ma hərə wer,
14 na mɔ̃kɛ mɩ-n kɔɔ fʋɔrnɩ Juifi Thãgba fʋɔrɛ a jɔ tibil jɔjʋɔɔkɛ dɔnɩ ɩ̃ 'walãkhasɔɔkɛ sɩ donanɩ kha ca bɩɛl, na mɔ̃ mɩ kɔɔ hananɩ dakha gbɛ̃gbɛrɛnɛ ɩ̃ mama thɩ kɔ̃tɩ̃sɔɔ sora.
15 Sɩ Thãgbaakɛ kɔɔ thɩnɛ mɩnɩ kpɩɩ ɩ̃ nɩɩ kɔ̃lora a we mɩ dakha ɔɔ bɔ jɩra, dɩ ɔbɔɔkɛra gɩ kɔɔ daaraanɩ haar,
16 a gbaar ɔɔ Bikuun a nɩna mɩ ɩ̃ gbaanɛɛ na mɩa ca kpala, gɛr gɩrakɛ dapaara ma kɔɔ therna tibilə',
17 dɩ ma kɔɔ jal dakha Jerujalɛm a yɩ wɩrɛ kɔɔ kʋlɛ mɩnɩ ƴɩɛ a do thɔ̃thɔna ga, sɩ Arabɩ mɩ kɔɔ jal, agɩpɩ dɩ ɩ̃ kɛr bir Damasɩ wo.
18 A yɛna yẽther ka, gɛr mɩ kɔɔ jaal Jerujalɛm sɩ jɩ kha na Pɩɛr, dɩ mɩ kɔɔ cɔr le ɔɔ pa wire yʋɔr yemɔɩ;
19 sɩ tɩɩ kpɩɩsɔɔkɛ dɔnɩ thɔ̃thɔna ma yɩ bɩɛllakɛ saagado Jakɩ Kɔ̃tɩnɩ õkuun gaaga.
20 Gɩrɛ mɩ khere narnɩ gɩrɛ Thãgbaa ƴɛra gɩ, ma sõsoaa koe.
21 Sɩ a gɩ pɩrɔ, mɩ gbaar jal Siri dɩɩra na Silisi dɩɩra.
22 Sɩ Jude we gbɛbɩdaraakɛ hanɩ Kirisitira na kɔɔ to mar yirə';
23 dɩbarara wɩ nɩɛ ayɩ: Ʋrɛɛkɛ n kɔɔ kpoone sarnɩ mamara hale nɛnɛ̃ da-n mɩɩ ha pɛrɛɛkɛra a-n kɔɔ yɩrnanɩ kʋɛrɛ;
24 dɩ wɩ-n kɔɔ khɩɩrɛ Thãgba ɩ̃ sora.