4
1 Kɔ̃tɩna, nɩ telene a bʋɔnɔ anɩ deesɔra, na-n jɛna dɩ nɛrɛ dakha nɩ hananɛ bɩɛl dɩ do Kɔ̃tɩn a ha ƴũ.
2 Na-n yɩra Thãgba bɩɛlɛla, nɩ hanana gar pərre a na khɩa Thãgba.
3 Nɩ jɩɛ bɩɛlna dakha Thãgba na pɛ sar, Thãgba n khɛr sɩ loo Thãgbaa thɩmɩɩ mɩɩrɛraakɛ dɔnɩ Kirisitii thɩmɩɩkɛ dɔnɩ thɩ̃ gbul, kɛ dɔnɩ nɔɔ dɩ ɩ̃ ha gɩrɛ khaɩra,
4 ɩ̃ puno ma-n jɩɩ mɩɩ gɩ gɩ yɩr casɩ mɔ̃kɛ gɩ teenanɩ.
5 Na-n hana kpɛsɛrɛ wɩrɛraakɛ na dɔnɩ ha pɛdara ga. Ƴɩɛɛkɛ nɩ yɩnɩ na-n faa gɩ ka fɩɩʋraka'.
6 Wire fɛʋ nɩ dɔ anɩ thɩmɩɩ na-n do gɩrɛ bʋɔnɔnɩ, gɩ dɔ thɩmɩɩ daa, nɩ jɩ mɔ̃ na birseni tɩbɩla fɛʋ bɩɛlbɩɛl.
7 Tɩsɩkɩɩkɛ dɔnɩ omineekɛ mɩ-n nanɩ, kɛ dɔnɩ sobɔ tibilikɛ sɩ donanɩ kha thɔ̃ dona Kɔ̃tɩnɩ thɔna, ɔr na mɩɛnɛ nɩ mɔ̃ thɩ̃ɛ fɛʋ hanɩ ɩ̃ pa.
8 Gɩrɛ mɩ thʋɔnaanɩ anɩ pa dʋɔn nɩ jɛ mɔ̃ thɩ̃ɛ hanɩ asɩ pa, gɩ cʋʋ nɩ nɩ faa haar.
9 Mɩ thʋɔnɛ nakha Onejɩmɩkɛ dɔnɩ sobɔ tibil, a dona omineekɛ mɩ-n nanɩ, kɛ dɔnɩ dakha anɩ tibil. Wɛr na mɩɛnɛ nɩ mɔ̃ thɩ̃ɛ fɛʋ hanɩ kɛkɛ.
10 Arɩsɩtarkɩɩkɛ sɩ hananɩ kha khaɩra a fʋɔr nɛr, na dakha Markɩɩkɛ dɔnɩ Barnabasɩɩ omi, kɛ dɔnɩ ʋrɛɛkɛ mɩ kɔɔ so narnɩ ayɩ: Ado a pɔ anɩ pa nɩ teaa.
11 Jejuukɛ wɩ-n wenɩ Jusitusi a fʋɔr nɛr dakha. Khʋ̃ kurdaraa thɩ̃thɩɩn, wɛr yẽther dɩbara dɔ tɩbɩlaakɛ n dɔna mɩnɩ kha Thãgbaa fãgadaar do thɔma; wɛr dɔ wɩrɛ n kɔɔ ƴɔla mɩnɩ haar.
12 Epafɩrasɩɩkɛ dɔnɩ anɩ tibil a fʋɔr nɛr; Jeju Kirisitii thɔ̃daar a do; bɔɔ fɛʋ a-n kɛ̃kɛrɛ̃ Thãgba bɩɛlɛla da-n pɛ nar, gɩ dɔ nɔɔ nɩ jɩɩl kɩbɩ mɔ̃ nɩ donɩ ha pɛdaraakɛ bɩnanɩ, a hana tu jɩɩr dɩ na-n cʋʋ gɩrɛ fɛʋʋkɛ Thãgba tuni.
13 Mɩ punone so ɔɔdara ayɩ: Tibil gɩɩkɛ n gbɛ̃gbɛrɛnɛnɩ thɔmana anɩ sora, na wɩrɛraakɛ hanɩ Laʋdɩse na Yerapolɩsɩ.
14 Luki dɔtɔrɔ kuunikɛ sɩ-n nanɩ na dakha Demasɩ n fʋɔr nɛr.
15 Nɩ fʋɔrɛ omɩnaakɛ hanɩ Laʋdɩse na Nɛ̃fasɩ na we gbɛbɩdaraakɛ n gbɛbanɩ kha ɔɔ cɔ.
16 Ado sɛbɛɛkɛ hɩɩn anɩ pa pɩ, nɩ dɔ dakha wɩ hɩɩn gɩ Laʋdɩse we gbɛbɩdarara, nɛrɛ dakha n hɩɩn ʋrɛ na thɛnɩ Laʋdɩsedaraa pa.
17 Sɩ nɩ sɔ Arsɩpɩra ayɛwɔɔ, a na-n jɩɛ hɩɩn thɔmaakɛ a kɔɔ 'lɛnɩ Kɔ̃tɩnɩ pa, a cʋɛ gɩ ga-n dã bɔɔbɔɔ.
18 Mɛr Polɩ thɛthɛ khera fʋɔrɛɛkɛ na ɩ̃ nyɛ̃. Na-n jɛna mɔ̃ mɩ hanɩ khaɩra. Thãgba na-n jɩɛ nɩ bʋɔra.