10
1 Ɩ̃ omisɔ gɩrɛ mɩ-n ƴaalnɩ na haar fɛʋ na gɩrɛ mɩ-n bɩɛllɔnɩ Thãgba dʋɔn ɩ̃ ca n 'lɛ taarɛ.
2 Mɩ jɩrɛ tue awɩdara dɩ wɩ hananɛ gbɛ̃gbɛrɛnɛ wer Thãgbaadara, sɩ wa hana jɩɩrɩkɛ teanana'.
3 Wa jɩnɩ kɩrʋ mɔ̃ Thãgba n hɛlnɩ tɩbɩlala sora', wɩ-n ƴaalɛ gɩ dɔ awɩ thɛthɛɛ bɔ dora sor hɛl war, dɩɩ do mɛ̃ wɩ bo so hɛllɛɛkɛ n thɛnɩ Thãgbara.
4 Gɩdonɩ Kirisitii pa liir jɔfʋ khu, dɩ mɛ̃ wɩrɛ fɛʋʋkɛ na pɩɛrnɩ haar na 'lɛ so hɛllɛ.
5 Gɛr dɔ gɩrɛ Mʋɩjɩ kɔɔ kherenɩ mɔ̃kɛ sor na hɛlnɩ tibillə jɔfʋ hɩɩnɛna ayɩ: «Tibilikɛ n cʋɛnɩ gɩrɛ jɔfʋ sonɩ a na hana garɛ yire.»
6 Sɩ so hɛllɛɛkɛ n thɛnɩ ha pɛrɛra sor ayɩ: Fa-n so afɩ hara «amɛ na jʋnɛ Thãgbaa dʋɔa'«, a thɩɛna gaa gɩ cʋʋ Kirisiti a gbũ;
7 dɩ agɩbo «amɛ na gbuno tɩɛr dɩɩra ga», a thɩɛna gaa gɩ cʋʋ Kirisiti a ɩɩr a the khirera.
8 Dɩ mɔ̃ gɩ so? Gɩ sor: «Thɩmɩɩrra na hʋnɔna fa', nɔɔ gɩ ha fɩ na haarra», dɩ ha pɛ thɩmɩɩr gɩɩkɛ sɩ-n mɩɩnɩ.
9 Ado fɩ cã na afɩ nɔ ayɩ: Jeju dʋɔn Kɔ̃tɩn, dɩ ado fɩ pɛr haar na afɩ bɩ̃ dɩ Thãgba kɔɔ cʋgʋʋrɛ dɩ ɩɩr a the khirera, fa 'lɛr taarɛ.
10 Gɩdonɩ ha pɛrɛ Jejura na bɩnɛ tibil n 'lɛrɔ so hɛllɛ, sɩ caan na nʋɔ tibil n 'lɛrɔ taarɛ.
11 Gɩdonɩ gɩ kherere Thãgbaa sɛhɛra ayɩ: «Tibil wo tibilikɛ pɩɛrnɩ haar ɔrra, ga ɩ̃ kpɩɩrakɛ a na dʋʋraa yicuruə'.»
12 Dɩ Juifi na ha kpɩɩ, na wɩrɛ na dɔnɩ Juifisɔa ha kpɩa', wɛr fɛʋ Kɔ̃tɩ̃ bɩɛlla wɩ hana, kɛ ɔɔ bɔna jɔɔ n danɩ wɩrɛ fɛʋʋkɛ n wɩɛnɩ.
13 Gɩdonɩ Thãgbaa sɛbɛ sor ayɩ: «Tibil wo tibilikɛ na wɛnɩ Kɔ̃tɩnɩ i a na 'lɛr taarɛ.»
14 Dɩ mɔ̃ wa fʋ sɩ na wɩɩ agado haar wɩ kɔɔ pɛr ɔrra boa? Dɩ mɔ̃ wa fʋ sɩ na pɛr haar ʋrɛraakɛ wa kɔɔ nɩnɩ ɔɔ thɩmɩa? Dɩ mɔ̃ wa fʋ sɩ na nɩ ɔɔda ado mɩmɩɩ na hala?
15 Dɩ mɔ̃ mɩmɩa na fʋ sɩ na hale agado wɩ thɔ̃ wɛra? Gɩ kherere Thãgbaa sɛbɛra ayɩ: «Wɩrɛ n ɩnanɩ na tutugo bʋɔɔ thɩmɩɩ, awɩ ɩ̃ n daarɛ ka.»
16 Sɩ ga do fɛʋ kɔɔ tuon tutugo bʋɔɔ thɩmɩa'; Ejaɩɩ thɛthɛrakɛ kɔɔ mɩɩrɛ ayɩ: «Kɔ̃tɩn, amɛ pɩɛr haar gɩrɛraakɛ sɩ kɔɔ mɩɩnɩ?»
17 Mɛ̃ ha pɛrɛ n the gɩrɛraakɛ tibil n nɩnɩ, dɩ gɩrɛra tibil n nɩnɩ Kirisitii thɩmɩɩra gɩ the.
18 Dɩ mɩ-n bulele: Wa ba nɩa yaa? Ɔɔ, wɩ nɩɛrɛ kɛ, mee Thãgbaa sɛbɛ sor ayɩ: «Awɩ nɔ kpaarɛ thɩɩraakɛ fɛʋ, dɩ awɩ thɩmɩɩ jaal a dã thɩɩ khu pa.»
19 Mɩ bire ma-n bule wo: Ɩjɩrayɛldara na kɔɔ jaa yaa? Mʋɩjɩ dɔ cacadaarɩkɛ sɔnɩ ayɩ: «Ma cʋʋrɛ dɩ gbugi na fʋ nɩ caarraakɛ na dɔnɩ caara'; Caarɩkɛ na jɛnɩ thɩ̃a', ma cʋʋrɛ nĩkhii dɩ ga fʋ nɩ wɛrra.»
20 Dɩ Ejaɩ 'larrakɛ ɓoɓo a so: «Wɩrɛ na kɔɔ hana mɩnɩ ƴaala', wɩ yɩ mɛr; mɩ kɔɔ nɩnanɛ dɩbara wɩrɛɛkɛ na-n kɔɔ buleneni thɩ̃ɛ ɩ̃dara ga.»
21 Sɩ Ɩjɩrayɛldaraadara wer, a sor ayɩ: «Dɩwɩlʋ koo mɩ-n kɔɔ 'laa nyɛ̃ɛ caarraakɛ dɔnɩ nũ nʋra wa-n gba ɩ̃da ga.»