1
1 Mɛr Polɩkɛ Thãgba wenɩ dɩ ɩ̃ do Jeju Kirisitii thɔ̃thɔn mɔ̃ Thãgba tuni, na Sɔsɩtɛnɩkɛ dɔnɩ omine,
2 thɔna sɛbɛɛkɛ a ha Thãgbaa we gbɛbɩdaraakɛ hanɩ Korɛ̃tɩ, kɛ dɔnɩ wɩrɛ leanɩ kpɩɩ a ha Jeju Kirisitira, kɛ Thãgba wenɩ dɩ wɩ do tibil phuusɔ mɔ̃kɛ wɩrɛ fɛʋʋkɛ hanɩ paar wo paar, kɛ n fʋɔrɛnɩ Jeju Kirisiti asɩ Kɔ̃tɩ̃ hanɩ, kɛ dɔnɩ awɩ Kɔ̃tɩ̃ na asɩda.
3 Thãgba asɩ Thɩ na Jeju Kirisiti Kɔ̃tɩn n hana nɩ ha ɩɩ, a jɛ nɩ dakha bʋɔra.
4 Wire wo wire mɩ-n khɩɩ ɩ̃ Thãgba anɩ sora, mɔ̃kɛ Thãgba kɔɔ jɩ nɩnɩ bʋɔra dɩɩ do Jeju Kirisiti dɔ nɔɔ.
5 Gɩdonɩ ɔrra nɩ kɔɔ 'lɛ ler thɩɛna fɛʋ dɩɩdɩɩkɛ dʋɔnnɩ, thɩmɩɩ mɩɩrɛ fɛʋ na jɩɩr fɛʋ,
6 dɩɩ the gɩrɛraakɛ sobɔ so jɩɩr Kirisitira kɔɔ tɩnɩ kɩbɩ anɩ thɩ̃thɩɩn;
7 dɩ mɛ̃ Thãgbaa khaarda bɩɛllakɛ na ɓɔr nɩ mɔ̃kɛ nɩ toonɩ gɩrɛ dɩ na-n pɩɛr asɩ Kɔ̃tɩ̃ Jeju Kirisitii nɩrɔa'.
8 Ɔr na cʋɛ nɩ dakha dɩ na tɩ gɩ dana khu paar, dɩ mɛ̃ na hana so paar asɩ Kɔ̃tɩ̃ Jeju Kirisitii wirə ga.
9 Sobɔdaar Thãgba do, ɔrkɛ kɔɔ wɛ nɩnɩ nɩ dɔ kha kũu bɩnɔ na ɔɔ Bikuun Jeju Kirisiti asɩ Kɔ̃tɩ̃.
10 Omɩna, asɩ Kɔ̃tɩ̃ Jeju Kirisitii i mɩ gba dɩ ma-n phʋʋrna nɩ, dɔ na-n mɩɩ kha nɔ bɩɛl, na-n do leere n ha anɩ thɩ̃thɩɩna', sɩ nɩ fɔ kha bɔɔbɔɔ a hanana kpɩɛr bɩɛl na nɔ bɩɛl.
11 Gɩdonɩ ɩ̃ omisɔ mɩ nɩrɛ thɩ̃ɛ anɩ pa dɩ Kʋloee too mɩɩ mɩ ayɩ, kɩla n har anɩ thɩ̃thɩɩn.
12 A thɩɛna gaa nɛrɛ bɩɛlbɩɛlɩ pa ʋ n yɩ, ine wer Polɩda ɩnɩ do; ʋ n yɩ, ine wer Apolɔsɩɩda ɩnɩ do; ʋ n yɩ, ine wer Sefasɩɩda ɩnɩ do; ʋ n yɩ, ine wer Kirisitiida ɩnɩ do.
13 Tɩnɛ paar kɔɔ har Kirisitira kã? Wɩ kɔɔ kpar Pol kʋkʋ thɩrʋra anɩ sora kã? Dɩ agɩbo Polɩ i dɔ gɩrɛ wɩ gbanɩ a kpɛɛna nɩ nyʋɔnɔ yaa?
14 Mɩ-n khɩɩrɛ Thãgba gɩrɛraakɛ ma kɔɔ kpɛɛnɩ tibil nɛrɛra nyʋɔnɔ saagado Kirisipusi na Gayʋsɩ gaaga;
15 dɩ mɛ̃ tibil na puno na so nayɩ ɩ̃ i wɩ kɔɔ gba a kpɛɛna nɩ nyʋɔnɔa'.
16 Wo Sɩtefanasɩɩ cɔdara mɩ kɔɔ kpɛɛ nyʋɔnɔ, sɩ ado ntɛ halerakɛ dɩ ɩ̃ kɔɔ kpɛgʋʋ nyʋɔnɔ ma ja'.
17 Gɩdonɩ Kirisiti na kɔɔ thɔ̃ mɩ ma-n kpɛa tɩbɩla nyʋɔnɔa', sɩ ma-n mɩa tutugo bʋɔɔ thɩmɩɩ, sɩ ma-n gba thɩmɩɩrɩkɛ thɛnɩ tibil kpɛsɛra a na mɩɩna gɩ ho ga ba cʋʋrɛ Kirisitii kʋkʋ thɩr gɩ debi gɩ do mɔlɔa'.
18 Gɩdonɩ Kirisitii khi kʋkʋ thɩrʋra, ga thɩmɩɩ dor də̃bəəle wɩrɛraakɛ n buureni, sɩ ado sɛrra wɛ, kɛ 'lɛnɩ taarɛ, Thãgbaa fãga gɩ do sar.
19 Gɩdonɩ gɩ kherere Thãgbaa sɛbɛra ayɩ: «Ma wɩɛlɛ kpɛsɛdaraa kpɛsɛ, ma bũburone thɩ̃ jɩnaa jɩ.»
20 Ka tɩɩ kpɛsɛ ha? Ka sɛbɛ kheredaar ha? Ka nɛnɛ̃ bɔɔkɛɛ thɩ̃ banadaar ha? Thãgba na kɔɔ cʋʋ kpɛsɛrɛɛkɛ dɔnɩ thɩdaa dɩɩ do də̃bəələə?
21 Gɩdonɩ mɔ̃ Thãgbaa kpɛsɛ hanɩ, tibil na kɔɔ puno na ɔɔ thɛthɛɛ kpɛsɛ a jɩ Thãgba ga, mɛ̃ gɩ kɔɔ da Thãgba haar dɩ gba Thãgbaa thɩmɩɩ mɩɩrɛɛkɛ dɔnɩ də̃bəəlela a taana wɩrɛ pɩɛrnɩ haar;
22 Juifisɔ jɩɩn wɩ-n ƴaal, dɩ Gɩrɛkɩsɔ na-n yɩrna kpɛsɛ ƴaalɛ,
23 sɩ se wer, Kirisitiikɛ wɩ kɔɔ kpanɩ kʋkʋ thɩrʋra, ɔɔda sɩ-n mɩɩ, dɩ nɛ baradaa gɩ do Juifisɔra, a dona də̃bəəle wɩrɛraakɛ na dɔnɩ Juifisɔa';
24 dɩ Kirisitira dɔ Thãgbaa fãga, na Thãgbaa kpɛsɛ, wɩrɛraakɛ Thãgba wenɩ, ado Juifisɔ wɛ, ado Juifisɔ wa'.
25 Gɩdonɩ gɩrɛ hɔnɩ Thãgbaa də̃bəəl tibil yinəna, gɩ hananɛ kpɛsɛrɛ a jɔ tibilida, dɩ gɩrɛ hɔnɩ Thãgbaa yɔɔ hana fãga a jɔ tibili fãga.
26 Nɩ hɩnɛ omɩna, mɔ̃kɛ werɩkɛ Thãgba kɔɔ we nɩnɩ hanɩ: Anɩ thɩ̃thɩɩn, wɩrɛɛkɛ dɔnɩ tɩɩ kpɛsɛsɔ tibil yinənaakɛ wa kpɛra', dɩ wɩrɛ dɔnɩ fãgadara wa kpɛra', dɩ wɩrɛ dɔnɩ dakha nũfe wa kpɛra';
27 sɩ Thãgba phiire gɩrɛ tibil n wenɩ də̃bəəle ga-n pɛ kpɛsɛdarara yicuru. Thãgba phɩire gɩrɛ tibil na-n thernana', ga-n pɛ fãgadarara yicuru;
28 Thãgba phiire gɩrɛɛkɛ na hananɩ irə', na gɩrɛɛkɛ wɩ-n beesini, kɛ na dɔnɩ thɩ̃a', gɩ cʋʋ gɩrɛɛkɛ dɔnɩ thɩ̃ɛ gɩ debi gɩ do mɔlɔ thɩ̃ɛ,
29 dɩ mɛ̃ tibil bɩɛllakɛ na puno na məbi Thãgbaa ƴɛra ga.
30 Dɩ ɔɔ thɛthɛra dɔ nɔɔ dɩ nɩ ha gɩrɛ Jeju Kirisitira, kɛ dɔnɩ ʋrɛ Thãgba cʋʋnɩ dɩ do sar kpɛsɛrɛ, na fɩl sarʋ, na kpɩɩ leere, na birsere;
31 dɩ mɛ̃ gɩ ha mɔna gɩ kherenɩ Thãgbaa sɛbɛra ayɩ: «Dɔ ʋrɛɛkɛ n məbəni, a na-n məbi gɩrɛraakɛ Kɔ̃tɩn cʋʋnɩ.»