2
1 Mɛrɛ dakha omɩna, ɔbɔɔkɛ mɩ kɔɔ pɔnɩ anɩ pa, ga do thɩmɩɩ cʋno agɩbo kpɛsɛ kʋkʋʋ mɩ pɔna, a mɩɩna nɩ Thãgbaa sobɔ so jɩ thɩmɩa';
2 gɩdonɩ ma kɔɔ ƴaal ɩ̃ jɛ thɩ̃ kpɩɩ anɩ thɩ̃thɩɩn, saagado Jeju Kirisiti gɩ, kɛra wɩ kɔɔ kpanɩ thɩrʋra gaaga.
3 Mɛrɛɛ thɛthɛrakɛ kɔɔ hanɩ anɩ pa, sʋmʋmʋ̃ mɩ kɔɔ ha, na maar na jẽu.
4 Dɩ ɩ̃ thɩmɩɩ na ɩ̃ Thãgba thɩmɩɩ mɩɩ, ga kɔɔ do kpɛsɛ thɩmɩaakɛ dɔnɩ ha fidaa ga, sɩ thɩ̃ cʋʋrɛɛkɛ thɛnɩ Thu Phuu fãgara gɩ kɔɔ do,
5 dɩ mɛ̃ ga do tibil kpɛsɛrɛra anɩ ha pɛ dɛ̃a', sɩ Thãgbaa fãgara ga dɛ̃ɛ.
6 Sɩrakɛ sɩ-n mɩɩrɛ kpɛsɛrɛ wɩrɛraakɛ leanɩ gbɩlgbɩlgbɩlɩ thɩ̃thɩɩn, sɩ ga do nɛnɛ̃ bɔɔkɛɛ kpɛsɛ ga, dɩ nɛnɛ̃ bɔɔkɛɛ kɔ̃tɩ̃sɔɔkɛ na bũburonenii kpɛsɛ gɩ woa'.
7 Sɩ Thãgbaa kpɛsɛ sɩ-n mɩɩ, kɛ dɔnɩ thɩ̃ gbul a dona thɩ̃ɛɛkɛ keranɩ, kɛ Thãgba kɔɔ maanɩ pɛrɛ sɩ aa kɔɔ ti yɩɛr pa' aa, sɩ bulo kha na ɔɔ i dʋbɩ.
8 Dɩ kpɛsɛrɛ gɩɩkɛ nɛnɛ̃ bɔɔkɛɛ kɔ̃tɩ̃sɔ na jɩna', gɩdonɩ adora wɩ kɔɔ jɩ gɛr, wa kɔɔ kpa Kɔ̃tɩnɩkɛ hɩnanɩ i dʋbɩrɛ kʋkʋ thɩrʋra ga;
9 sɩ gɩ har mɔna gɩ kherenɩ Thãgbaa sɛbɛra ayɩ: «Thɩ̃ɛɛkɛ yire na kɔɔ yɩna', kɛ nũu na kɔɔ nɩɛna', dɩ ga kɔɔ jaa tibillə dɩ kpɩɛrna ga, gɛr Thãgba gbɛbɩ thɩɩn wɩrɛraakɛ n naanɛɛnɩ.»
10 Sɩ sɛr Thãgba kɔɔ gba ɔɔ Thu a nɩnana, gɩdonɩ Thu Phuu n 'lor thɩ̃ɛ fɛʋ dɩ jɩ tue, narakɛ Thãgbaa thɩ̃ɩkɛ huloneni.
11 Gɩdonɩ, tibil ʋmɔ̃ na punone na jɩ tibildaa, saagado ntɛɛ thuukɛ hanɩ ɔɔ bɩnɔ ga? Mɛna gɩ, tibil na puno na jɩ Thãgbaada, saagado Thãgbaa Thu gaaga.
12 Sɩ se wer, gɩrɛ sɩ 'lɛnɩ ga do thɩdaa ga, sɩ Thueekɛ thɛnɩ Thãgbara sɩ 'lɛ, dɩ mɛ̃ sa jɩ gɩrɛ Thãgba kɔɔ ha sɩnɩ bɔ jɩɩrra.
13 Dɩ gɛrra sɩ-n mɩɩ dakha, sɩ ga do na thɩmɩɩ ca ƴɩrɛ kpɛsɛrɛɛkɛ dɔnɩ thɩdaa n gbanɩ da-n dɩɩrna ga, sɩ mɔ̃kɛ thɩmɩɩ ca ƴɩrɛ Thu Phuu n dɩɩrnanɩ hanɩ, dɩ sɩ gbana dɩɩrɛɛkɛ dɔnɩ thudaa dɩ sa-n mɩɛ Thu Phuudara.
14 Sɩ tibilikɛ na hananɩ Thãgbaa Thuə', aa-n tu Thãgbaa Thu thã', gɩdonɩ də̃bəəle gɩ-n dʋʋraa, dɩ a na puno na jɩ ga, gɩdonɩ Thãgbaa Thu n mɩɛnɛ gele.
15 Sɩ tibilikɛ hananɩ Thu Phuu, a-n jʋʋrɛ thɩ̃ɛ fɛʋ dɩ jɩ gɩ, sɩ ɔr thɛthɛ tibil na jʋʋrʋʋ na jɩa';
16 dɩ gɩ kherere Thãgbaa sɛbɛra ayɩ: «Amɛ kɔɔ jɛ Kɔ̃tɩnɩ kpɩɛr a punoo a dɩɩr thɩ̃ɛ?» Sɩ se wer sɩ hananɛ Kirisitii kpɩɛr.