1
1 Mɛr Polɩkɛ dɔnɩ Jeju Kirisitii thɔ̃daar thɔna sɛbɛɛkɛ; Thãgba kɔɔ wɛ mɩ dɩ ɩ̃ do thɔ̃thɔn, dɩ thɩɩn mɩ kpɩɩ ma-n mɩa tutugo bʋɔɔkɛ thɛnɩ Thãgbara.
2 Tutugo bʋɔɔkɛra dɔ gɩrɛ Thãgba kɔɔ maanɩ ʋlfɛrɛ dɩ ɩna thɔnanɛ, dɩ ɔɔ bobonasɔ kɔɔ gba a pɛr ɔɔ sɛbɛ phurə.
3 Dɩ ɔɔ Bikuunida gɩ mɩɩ; ado kʋɔnnaakɛ tibil kʋɔnɩ gɩ, gɛr a dʋʋr Davɩdɩɩ məl,
4 sɩ ado Thãgba dʋʋrra gɩ, na mɔ̃ a donɩ ʋrɛ phonɩ, khireraakɛ Thãgba kɔɔ ɩɩrʋʋnɩ na fãga gɛr nɛna dɩ Thãgbaa Bikuun a do.
5 Jeju Kirisitiilera dɔnɩ asɩ Kɔ̃tɩ̃, ɔr dɔ nɔɔ dɩ Thãgba jɩ sɩ bʋɔra dɩ sɩ doro gɩrɛ thɔ̃thɔna, gɩ do nɔɔ sɩ gba ɔɔ i sɩ kpana tibil caar fɛʋ sɩ ɩna wɩ pɛr haar wa-n nɩ nũu.
6 Dɩ nɛrɛɛ thɛthɛ harrɛ ner, nɛrɛɛkɛ Jeju Kirisiti kɔɔ wenɩ dɩ nɩ do ɔɔda.
7 Mɛr Pol thɔna sɛbɛɛkɛ wɩrɛ fɛʋraakɛ hanɩ Rɔm dɩɩra, kɛ dɔnɩ wɩrɛ Thãgba n nanɩ a we wɩ dɩ wɩ do tibil phuusɔ. Thãgba asɩ Thɩ na Jeju Kirisiti Kɔ̃tɩn n hana nɩ ha ɩɩ, a jɛ nɩ dakha bʋɔra.
8 Caca thɩ̃ɛ ɩ̃ Thãgba mɩ-n khɩɩ nɛrɛ fɛʋʋ sora dɩɩ do Jeju Kirisitii pa gɩ the, gɩrɛraakɛ wɩ-n mɩɩnɩ anɩ ha pɛda thɩɩraakɛ koo.
9 Thãgbaakɛ mɩ-n doronɩ thɔma na haar fɛʋ, ɔɔ Bikuuni tutugo bɔ thɩmɩɩra, torre yire mɔ̃ mɩ-n jɩna nɩnɩ
10 ɩ̃ Thãgba bɩɛlla wire fɛʋ, dɩ ma-n phʋʋrʋʋ ado a na ture na ha mɩ hʋɛ ɩ̃ pɔ dɩphãakɛ ɩ̃ yɩ nɩ.
11 Gɩdonɩ mɩ-n ƴaalɛ ka ɩ̃ yɩ nɩ, ɩ̃ ha nɩ dɩkhaa Thu Phuu khaarda nɩ 'lɛ fãga;
12 kɩrʋ dʋɔn gɩ do bul kha gɩ ɔbɔɔkɛ ma hanɩ anɩ pa, anɩ ha pɛ n ha mɩ 'lar, ɩ̃da n ha nɩ 'lar oti.
13 Omɩna, ma-n ƴaal na-n jɩ mɔ̃ gɩrɛ hanaa ga; nɩ jɛ dɩ mɩ kɔɔ ƴaalɛ ƴaalƴaal ɩ̃ pɔ anɩ pa, sɩ thɩ̃ɛ kɔɔ pɩɛr mɛr a dana nɛnɛ̃kɛ dɩ ma kɔɔ yɩ hʋɛa'. Gɩrɛ mɩ-n ƴaalnɩ dʋɔn ɩ̃ yɛ tɩbɩla wɩ pɛr Kirisiti haar anɩ pa, mɔ̃kɛ gɩ kɔɔ hanɩ ca kpɩɩsɔɔ pa.
14 Mɩ hananɛ wɩrɛ phuoni yire na wɩrɛ na phuoni yirə' helu, na wɩrɛ jɛnɩ sɛbɛ na wɩrɛ na jɛnɩ sɛba' dakha.
15 Gɛr gɩ mɩ-n ƴaalɛ na sobɔr ɩ̃ mɩɩ nɩ dakha tutugo bʋɔɔ thɩmɩɩ nɛrɛɛkɛ hanɩ Rɔm.
16 Gɩdonɩ yicuru na-n fʋ mɩ tutugo bʋɔɔ thɩmɩɩra ga, Thãgbaa fãga gɩ a do taadaa tibil wo tibilləəkɛ n pɩɛrnɩ haar, dɩ Juifisɔ wɛ cacaca agɩpɩ wɩrɛ na dɔnɩ Juifisɔa'.
17 Gɩdonɩ tutugo bʋɔɔ thɩmɩɩ n nɛna mɔ̃ Thãgba na cʋʋnɩ dɩ sor na hɛl tɩbɩlala ɔɔ ƴɛra, dɩ ha pɛrɛra gɩ the fʋ paar a dana pɩpɩɩ paar, a ha mɔ̃kɛ Thãgbaa sɛbɛ sonɩ ayɩ: «Ʋrɛ Thãgba hɛllɔnɩ sor dɩɩ do ha pɛrɛ dɔ nɔɔ, ɔr na hana yire.»
18 Thãgba n nɩnanɛ mɔ̃ a ɩɩrnanɩ nĩkhii le ƴũ dɩɩ gbũ a heen Thagba so beesire, na puu cʋʋrɛɛkɛ tɩbɩla hananɩ a pɩɛrna sobɔr ga-n yɩra'.
19 Gɩdonɩ gɩrɛ tibil na jɩnanɩ Thãgba gɩ yɩr warɛ casɩ; Thãgba kɔɔ cʋɛ wɩ wɩ jɛ gɩ.
20 A fʋna bɔɔkɛ Thãgba tini thɩ̃ɛ, ɔɔ khorr fãga na ɔɔ Thãgba dookɛ na dɔnɩ dayɩnana', gɩ yɩrrɛ casɩ dɩ tibil na puno na yɩ gɩ, dɩ gɩ ther thɩɛnaakɛ a tini, dɩ ga hana tibil n puno a yɩrɔ phʋɔl paara'.
21 Mɔ̃ wɩ jɩnɩnakɛ Thãgba sɩ wa-n dʋbʋʋ mɔ̃ a donɩ Thãgba ga, dɩ wo wa-n fʋɔrʋa', sɩ awɩ kpɩɛrnɔ debire a do mɔlɔ kpɩɛrɛ, dɩ awɩ haakɛ dɔnɩ də̃bəəl haar gɩ birə warɛ.
22 Sɩ wɩ-n mɩɩrɛ mɔ̃ wa donɩ fɩl jɩna kpãkpalã ga, sɩɩ do də̃bəəl yire wɩ debi do.
23 Thãgbaakɛ hɩnanɩ i dʋbɩrɛ, kɛ na dɔnɩ dakhinənəə fʋɔr wɩ ka bo, sɩ wa-n fʋɔr thɩlaakɛ wɩ cʋʋnɩ dɩɩ ho tibilikɛ dɔnɩ dakhinəne, dɩ wa-n fʋɔrna thɩlaakɛ wɩ-n cʋʋnɩ dɩɩ ho 'lominə, na nɛɛ yenã thɩ̃ɛ, na thɩ̃ ƴɩrɛ n puuloneni.
24 Gɛrra dɔ kɩrʋ dɩ Thãgba sɩ war le awɩ thɩ̃ bise cʋʋraakɛ n kɔ wɩnɩ thue, dɩ mɛ̃ wɩ-n ƴɔ̃ƴɔ̃ɔ awɩ thɛthɛɛ tomɩ dɩbara ʋ na ʋ.
25 Wɛr dɔ wɩrɛ fenɩ Thãgbaa sobɔ dɩɩ do sõsor, sɩ dɩ wɩ fʋɔr a na cʋʋna thɩ̃ɛ thɩ̃ tinənena sa ka faa thɩ̃ Tidaar, kɛ teananɩ khɩɩrɛ waa khorr. Amɛn.
26 Gɛrra dɔ kɩrʋ dɩ Thãgba sɩ war le yicur thɩ̃ cʋʋ thueraakɛra n danɩ awɩ tomɩra ka, dɩ awɩ khɛrsɔrakɛ thʋ̃ fi dɩ wa-n phɩ̃ kha khɛ haar, sɩ ga do thalee ti Thãgba kɔɔ ti khɛra'.
27 Mɛna gɩ ha dakha na kona, wɩ faarɛ mɔ̃ Thãgba tini kuun da cʋʋna khɛr, sɩ thue n fʋ ʋ̃ kuun na ʋ dɩɩ ho ga hərə wer; dɩ wɛr kũu haar n bir gbãga na cʋʋ kha yicur thɩ̃ɛ, dɩ wɩ-n 'lɛr lɩmɩnɛɛkɛ teananɩ awɩ puu cʋʋra.
28 Dɩ mɔ̃ wa yɩɛnɩ dɩɩ teena dɩ wa hana Thãgba jɩɩra', Thãgba sɩ warɛ na awɩ kpɩɛr sɔna dɩ wa-n cʋʋ thɩ̃ɛɛkɛ na teananɩ cʋʋra'.
29 Puu cʋʋ caar fɛʋ hi wer haarra, na kpallɛ, na ha pɩɛrɛ, na puu cʋʋrɛ; wɩ jɔrɛ gbugi ka, na tɩɩ kʋr, na kɩla, na fɩɩlɛ, na dakhaba cʋʋrɛ; wɩ dor lĩlirə,
30 na tɩɩ phiiledara, wɩ dor Thãgbaa lãlaardara, na tɩɩ nɩɩrdara, na i ƴaaldara, na nɔfa mɩɩdara, na sopugo pha cʋʋdara, na thɛ na nɛɛ nũ nʋʋrdara;
31 wa hana bɩ̃ kuurə', awɩ thɩmɩɩ na ha gbaarra ga, wa hana pərre dɩ wɩ jɩ tibil bʋɔra ga.
32 Sɩrakɛ wɩ jɩɛ jɩ dɩ Thãgba na kɩɩlnanɛ wɩrɛ n cʋɛnɩ ga thɩ̃sɔɔle, a jɩna dakha dɩ wɩrɛ n cʋɛnɩ ga thɩ̃sɔɔlera khir wɩ teena, sɩ ga do gɩdonɩ wɩ-n cʋʋ gɛr dɩbara ga, sɩ wo wɩ n khɩɩrɛ wɩrɛ n cʋɛnɩ ga thɩ̃sɔɔlera.