1
1 Teofɩl, mɩ kɔɔ mɩɩrɛ ɩ̃ caca sɛbɛra gɩrɛ fɛʋʋkɛ Jeju kɔɔ fʋnɩ a cʋʋ, na a dɩɩrna
2 dɩɩ dana wireekɛ Thãgba kɔɔ tiini dɩ jʋʋn; sɩ jɔfʋ a kɔɔ pɛr ɓo dɩɩ the Thu Phuurə ɔɔ thɔ̃thɔnanaakɛ a kɔɔ phiirni.
3 Ɔbɔɔkɛ a gaarnɩ bʋɔ a khinə pɩ sa ɩɩr, a kɔɔ nɩna wɛr dakha dɩbara mɔ̃ a donɩ yidaar na thɩ̃ jɔjʋɔɔkɛ na hanɩ bana paara'. Wire kpalanyɔɔkɛ a cʋʋnɩ, a-n kɔɔ nɩna wɩ ɔɔbara da-n mɩɩna wɩ gɩrɛ dɔnɩ Thãgbaa fãgadaar dʋʋr.
4 Mɔ̃kɛ a kɔɔ hanɩ kha na wɛr a kpãkpãa warɛ dɩ wa-n hʋnɔna Jerujalɛm dɩa', sɩ wɩ tɔɔ na pɩɛrɛ gɩrɛɛkɛ Thɩrɛ kɔɔ ʋlfɛnɩ ɩna cʋʋrɛ mɔ̃kɛ wɩ kɔɔ nɩɛnɩ dɩ ɩnɛr Jeju so war.
5 Gɩdonɩ Jã nyʋɔnɔ a-n kɔɔ kpɛɛ, sɩ nɛrɛ, kɩɛr na wire gbe na 'lɛr Thu Phuu kpɛɛrɛ.
6 Dɩ mɔ̃ wɩ gbɛbɩnɩ kha wɩ buleele ayɩ: Kɔ̃tɩn, nɛnɛ̃ dɔ bɔɔra fa cʋʋnɩ Ɩjɩrayɛl dɩ ga bir na do fãga dɩɩ ya?
7 Dɩ birse wi: Ga ha anɩ pa dɩ na jɩ bɔɔ na wireekɛ Thɩrɛ kɔɔ dʋnɩ mɔ̃ ɔɔ thɛthɛɛ puno hana'.
8 Sɩ na ka na 'lɛr fãga ɔbɔɔkɛ Thu Phuu na ɩnɩ na lõ nar, dɩ na dor ɩ̃ sobɔ so jɩdara Jerujalɛm, na Judera fɛʋ, na Samarɩra phaphapha gɩ dana ka thɩɩ khuni.
9 Ɔbɔɔkɛ a mɩɩnɩ gelela pɩ, wa hɩɩnɛ dɩɩ do Thãgba khəsuure da-n jʋʋn, dɩ ndɔlɔ̃paar thiirəəre.
10 Dɩ mɔ̃ wɩ-n hɩɩnnɩ thãgbara ƴũ kirkirkir mɔ̃ a-n jʋʋnnɩ, hɩnɛ wɩ yɩrɛ kona yenyɔ dɩ wɩ to kẽkẽ bulona a jɩɩlna war sa so:
11 Nɛr Galiledara, anyera nɩ jɩɩl na-n hɩɩn thãgbara ƴũ? Jejuukɛra Thãgba tini anɩ thɩ̃thɩɩn da-n jʋʋn Thãgbaa dʋɔ, a na bire na ɩ̃ mɔ̃kɛra nɩ yɩɩnɩ gɩrɛ da-n jalna Thãgbaa dʋɔ.
12 Dɩ le wɩ the olɩvɩ thɩr gɔ̃gʋɔna a kɛr bir Jerujalɛm, hʋnɔnɛ thɔɔrɛ kilə bɩɛl.
13 Ɔbɔɔkɛ wɩ kɔɔ danɩ, wɩ jʋʋnɛ a lõ lɩ̃gana ka wɩ-n kɔɔ gbɛbɩnɩ kha; Pɩɛr, Jã, Jakɩ na Ãdire kɔɔ gɩ, Filipi na Tomasɩ, Bartelemɩ na Matiə, Jakɩ Alfee bikuun, Sɩmɔ̃ɔkɛ dʋɔnnɩ gbɛ̃gbɛrɛ̃ tibil, na Juudi Jakɩɩ bikuun.
14 Wɛr fɛʋ kɔɔ gʋʋrɛ kha a do nɔ bɩɛl, sɩ dɩ wa-n yɩr Thãgba bɩɛlɛla na khɛrasɔ, nakha Marɩ Jejuu nɩ, na Jejuu õkona.
15 Ga bɔɔlera Pɩɛr kɔɔ ɩɩr omɩnaa thɩ̃thɩɩn, tɩbɩla wɛɛkɛ gbɛbanɩ kha a thɔɔ tamaa na kpelẽ, dɩ a so warɛ ayɩ:
16 Omɩna, dɔ gɩrɛɛkɛ Thãgbaa sɛbɛ sonɩ dɩɩ kɔɔ mãa ther Davɩdɩɩ nɔra Thu Phuurə n dã oti, Judasɩɩkɛ kɔɔ thɔɔnɩ tɩbɩla dɩ wɩ fʋ Jejuuda gɩ mɩɩ.
17 Gɩdonɩ asɩ pa bɩɛldaar a kɔɔ do, dɩ a kɔɔ 'lɛr ɔɔda ga thɔ̃ bɩɛllaakɛra.
18 Warɩkɛ wɩ lɩmɩnɩ kuunile ɔɔ sopugora, gɛr a gba a thena lɩɛ, dɩ le a ji na ƴɩɛ a phã dɩ ɔɔ pɛ deer fɛʋ.
19 Dɩ Jerujalɛmdara fɛʋ kɔɔ nɩ gɛr, dɩ mɛ̃ wɩ-n we lɩɛɛle na awɩ thɩmɩɩ Akɛldama, kɩrʋ dʋɔn: Tɔmɩ̃ lɩɛ.
20 Sɩ gɩ kherere Khɩkhɩɩ nɩ sɛbɛra ayɩ: «Dɔ ɔɔ cɔ n do cɔ kpoloo, dɩ tibil na cɔrɔa'.» Wo: «Dɔ tɩɩ kpɩɩ n gba ɔɔ thɔ̃.»
21 Mɛ̃ gɩ, dɔ konaakɛ n kɔɔ thɔɔ sɩnɩ bɔɔ fɛʋraakɛ sɩ-n kɔɔ kpaarnanɩ kha Jeju Kɔ̃tɩn,
22 dɩɩ fʋna Jãa yɔ kpɛɛ bɔ a dana wireekɛ Thãgba kɔɔ tiini jʋʋnna, dɔ wa tibil ca n do sobɔ so jɩdaar nakha sɛrɛ ɔɔ khi ɩɩrra.
23 Dɩ wɩ kɔɔ tire tɩbɩla yenyɔ, Jojɛfɩɩkɛ wɩ-n wenɩ Barsabasɩ da-n dona Jusitusi, na Matɩasɩ.
24 Dɩ wɩ kɔɔ bɩɛlɛ Thãgba thakɛ ayɩ: Kɔ̃tɩn, fɛrkɛ n jɛnɩ tɩbɩla fɛʋʋ ha, nɛrɔ tɩbɩla yenyɔraakɛ ʋrɛ fɩ phiirni,
25 dɩ mɛ̃ a na gba thɔ̃thɔn thɔmaakɛ Judasɩ kɔɔ ɩɩrnɩ cʋʋ sopugo a faa sa jal ka teanaanɩ.
26 Dɩ wɩ kɔɔ lɩrɛ lɩɩ, dɩ lɩɩ fʋ Matɩasɩ dɩ wɩ gbaa a ɓã thɔ̃thɔna yʋɔr bɩɛlla.