9
1 Sobɔr mɩ-n so mɔ̃ mɩ donɩ Kirisitiida, ma-n sõsoa'. Ɩ̃ kpɩɛrnɔɔkɛ n pɛnɩ Thu Phuuda nũu yɩ gɛr dɩ sobɔr mɩ-n so,
2 dɩ gbobire jɔɔ na ha helle n har ɩ̃ hara wire fɛʋ.
3 Dɩ mɛrɛɛ thɛthɛ ka nar sʋɔn n 'le mɩ gɩ lee mɩ kpɩɩ nakha Kirisiti ɩ̃ omisɔɔ sora, kɛ dɔnɩ ɩ̃ ca bɩnɔ,
4 kɛ dɔnɩ Ɩjɩrayɛldara, kɛ Thãgba cʋʋnɩ dɩ wɩ do ɔɔ bikuunsɔ, a dona wɩrɛ a cʋʋnɩ dɩ wɩ jɩ mɔ̃ ɔɔ i dʋbɩ hanɩ, na wɩrɛ a kɔɔ ʋlfɛnanɩ nɔ bɩɛl ʋlfɛrɛ, na wɩrɛ a kɔɔ hanɩ jɔfʋ, na Thãgba fʋɔr bʋɔ, na wɩrɛ Thãgbaa ʋlfɛsɔ telenɩ,
5 kɛ dɔnɩ mama thɩ kɔ̃tɩnaa məlsɔ. Kirisitii tibil dora wɛrra a the, kɛ dɔnɩ ʋrɛ kəəneni thɩ̃ɛ fɛʋra gɩrɛ, Thãgba gɩ a hɩ̃ khɩɩrɛ waa khorr. Amɛn.
6 Sɩ ga do Thãgbaa thɩmɩɩ debire a do mɔlɔ thɩ̃a', gɩdonɩ ga do wɩrɛ fɛʋʋkɛ dɔnɩ Ɩjɩrayɛlɩ məl dʋɔn Ɩjɩrayɛldara ga.
7 Dɩ ga do wɩrɛ fɛʋʋkɛ dɔnɩ Abɩrahamɩ məl dʋɔn Thãgbaa bɩsãsɔa'. Sɩ Thãgba kɔɔ sor Abɩrahamna ayɩ: «Ɩjakɩɩ bɩsãsɔ wɛr na dɔ afɩ məl.»
8 Kɩrʋ dʋɔn, ga do bɩsanaakɛ wɩ-n kɔnɩ wɛɛ kha wɛr n dɔ Thãgbaa bɩsãsɔa'; sɩ ɔɔ məl dɔ bɩsanaakɛ wɩ kɔnɩ mɔ̃ Thãgba kɔɔ ʋlfɛnɩ ga har.
9 Hɩnɛ gɩrɛ dɔnɩ ʋlfɛ thɩmɩɩrra gɩ sor ayɩ: «Wa bɔ caraakɛra ma birni ma-n ɩ̃ Sara na kʋɔn kũubir.»
10 Sɩ ga do gɩrɛ dɩbara ga, sɩ Rebekaa bɩsãsɔ thɩ bɩɛlɩ bisɔ wɛ, kɛ dɔnɩ Ɩjakɩ asɩ mama thɩ kɔ̃tɩ̃.
11 Gɩdonɩ bɩsanaale na thenɩ dɩɩra pɩ a na eʋʋ bɔɔ dɩ puure ga,
12 Thãgba kɔɔ sor Rebekara ayɩ: «Diine na dɔ kɔ̃tɩn cacadaarra.» Dɩ thɩ̃ɛ thakɛ daan gɩ nɩna dɩ Thãgba n phire ʋrɛ a-n ƴaalnɩ dɩ wɩɩ, sɩ ga do tibili thɩ̃ cʋʋra gɩ tha'.
13 Dɩ gɩ har mɔ̃ gɩ kherenɩ Thãgbaa sɛbɛra ayɩ: «Jakɔbɩ mɩ na sa bo Ejayʋ.»
14 Dɩ mɔ̃ sa so gɩrɛ? Thãgba na-n cʋʋ gɩrɛɛkɛ telenenaa yaa? Kpɩɩraka'.
15 Gɩdonɩ a sor Mʋɩjɩra ayɩ: «Ʋrɛ mɩ-n ƴaalnɩ ɩ̃ jɩ bʋɔra, mɩ-n jɩɩrɛ bʋɔra, dɩ ʋrɛ mɩ-n ƴaalnɩ bʋɔ n fɔ mɩ ɔrra, bʋɔ n fʋ mɛr ɔrra.»
16 Dɩ gɛr gɩ ga do gele ther ʋrɛraakɛ n ƴaalɛnɩɩ pa, agɩbo ʋrɛraakɛ na cʋɛnɩ thɩ̃ɛɛ pa ga, sɩ gɩ ther Thãgbaraakɛ n jɩɛnnɩ tibil bʋɔra.
17 Gɩ sor Thãgbaa sɛbɛra aa, Thãgba sor Eaarɔna ayɩ: «Mɛr ɩrɛ fɩ mɛna fɩ do nɔɔ ɩ̃ nɩna ɩ̃ fãga, gɩ do nɔɔ dakha ɩ̃ i n kpaar thɩɩraakɛ koo.»
18 Gɛr gɩ a-n jɩrɛ ʋrɛ a-n ƴaalnɩ a jɩ bʋɔra, sɩ dɩ cʋʋ ʋrɛ a-n ƴaalnɩ dɩ ɔɔda n khɩɩr.
19 Dɩ anaa fa bule mer: Dɩ a thale gɩ, anye Thãgba hana na so tibilidara, gɩdonɩ ʋmɔ̃ hale na lã gɩrɛraakɛ a-n ƴaalnɩ?
20 Ɩ̃ kuun, amɛ fɛrkɛ do a na banana Thãgba thɩ̃ banaa? Bʋlaakɛ wɩ-n mɩnɩ na bulele ʋrɛ n mɩɛnɩ, anyera a-n cʋʋ nɩ thalera ya?
21 Ga do mɩmɩ n dɔ kɔ̃tɩn jaarra gaa? Ja bulo bɩɛlla a-n gba dɩ mɩna bʋlaa yenyɔ, bɩɛl n do bʋla ɓʋ̃ɔ, dɩ bɩɛl n do thɔ̃ pɔɩ cʋʋdaa.
22 Dɩ ga do gɩrɛ Thãgba cʋʋnɩ thalera gɩ ha gaa? A kɔɔ ƴaalɛ wer a nɩnana ɔɔ nĩkhi a cʋʋna tɩbɩla wɩ jɩ mɔ̃ ɔɔ fãga hanɩ, sɩɩ do a fʋrɛ haar jɔɔ bʋlaasɔraakɛ teananɩ a ɩrɛna gar ɔɔ nĩkhirə, kɛ dɔnɩ gɩrɛ dananɩ kʋɛrɛ.
23 A kɔɔ ƴaalɛ dakha a nɩna bʋlaasɔɔkɛ a jɩnɩ bʋɔra mɔ̃kɛ ɔɔ i dʋbɩrɔnɩ a thʋ̃ kãasɩ, kɛ dɔnɩ bʋlaasɔɔkɛ a kɔɔ maanɩ thɩɩnɛ gɩ 'lɛ ɔɔ i dʋbɩ;
24 dɩ sɛr wɛ, kɛ a kɔɔ wenɩ sɩ ga do Juifi caarra ɩkha the dɩbara ga, sɩ ca kpal ɩkha harrɛ.
25 Gɛr dʋɔn gɩrɛɛkɛ a kɔɔ sonɩ Ojee sɛbɛra ayɩ: «Wɩrɛɛkɛ na kɔɔ dɔnɩ ɩ̃ toa', ma we wer ɩ̃ too. Dɩ ʋrɛ na kɔɔ dɔnɩ ɩ̃ nadaara', ma wɩɩrɛ ʋrɛ mɩ nanɩ.
26 Dɩ pa dɔɔkɛ wɩ kɔɔ so warnɩ ayɩ: Na do ɩ̃ toa', liir wa we wɩ Thãgba yidaarɩ bikuunsɔ.»
27 Ejaɩ dakha hulene Ɩjɩrayɛldara ayɩ: «Adorakɛ Ɩjɩrayɛl bɩsana jɔr a ho lanyɔ̃ gbalãkothɩn, sɩ gbe dɩbara na 'lɛ taarɛ;
28 gɩdonɩ gɩrɛ Kɔ̃tɩn kɔɔ sonɩ, koo a na cʋʋ gɩ dɩ ga dã kɔrɔ thɩɩraakɛ.»
29 Dɩ mɔ̃kɛ Ejaɩ kɔɔ 'laanɩ yɩɛ a sor ayɩ: «Ado Kɔ̃tɩnɩkɛ dɔnɩ fãga koo hɩ̃daar na kɔɔ sɩ sar məl ɩkha gbə', sa kɔɔ honanɛna Sɔdɔm dɩɩ, sa kɔɔ horra Gɔmɔɔr dɩɩ.»
30 Dɩ mɔ̃ sa so gɩrɛ? Ca kpalaakɛ na-n kɔɔ dɔnɩ bʋɔ sor n hɛla war Thãgbaa ƴɛra ga, wɩ 'lɛr so hɛllɛ, sɩ so hɛllɛ gɩɩkɛ thɛnɩ ha pɛrɛra;
31 sɩ Ɩjɩrayɛldara wer kɛ n ƴaalɛnɩ so hɛl jɔfʋ, wa kɔɔ yɩ jɔfʋ thala'.
32 Mɔ̃ dɔ kɩrʋ? Gɩdonɩ ga do ha pɛrɛra wɩ kɔɔ ƴaal ga, sɩ awɩ thɔ̃ cʋʋra wɩ kɔɔ ƴaal gɩ. Nɛ bara bokaarra wɩ kɔɔ be nɔɔ,
33 dɩ gɩ har mɔ̃kɛra gɩ kherenɩ Thãgbaa sɛbɛra ayɩ: «Hɩnɛ mɩ thɩɩnɛ nɛ bara bokaar Sɩyɔna, nɛ bara gbãgbaan gɩ, dɩ ʋrɛ pɩɛrnɩ haar ɔrra, ga ɩ̃ kpɩɩrakɛ a na dʋʋraa yicuruə'.»