11
1 Dɩ gɛr gɩ mɩ-n bulele ayɩ: Thãgba bor ɔɔ too yaa? Kpɩɩraka', gɩdonɩ mɛrɛ dakha Ɩjɩrayɛldaar ha mɩ, Abɩrahamɩ məl mɩ do, a do Bɛ̃jamɛ̃ɛ ca.
2 Thãgba na bo ɔɔ tookɛ a kɔɔ maanɩ jɩɩra'. Na jɩ thɩmɩɩ gɩrɛ kherenenɩ Thãgbaa sɛbɛra, ka Elɩ mɩɩnanɩ Thãgba da-n pɛ Ɩjɩrayɛldara soraa, ayɩ:
3 «Kɔ̃tɩn wɩ kʋʋrɛ afɩ bobonasɔ a tʋɔrna afɩ bonɩ ji pasɔ a kpɛɛ, sɩɩ do mɛr bɩɛl sɛ gɩrɛ 'lẽ'lẽ'lẽ dɩ wɩ-n ƴaalɛ dakha ɩ̃ yʋ.»
4 Sɩ anye Thãgba sʋʋraa? «Mɩ tire kona gbɩlanɩ makonyɔ wɩ dɔ ɩ̃da, kɛ na gulẽganɛnɩ a fʋɔr Baala'.»
5 Mɛna gɩ ha dakha nɛnɛ̃ bɔɔkɛ, wɛ hale sɛnɩ gbe kɛ Thãgba phiirni ɔɔ bɔ jɩra.
6 Dɩ ado bɔ jɩɩrra gɩ, ga the thɔ̃ cʋʋrɛra bã; ado thɔ̃ cʋʋrɛra gɩ the, ga dor bɔ jɩɩr na do bɔ jɩɩr bã.
7 Dɩ mɔ̃ ga ha dɩphã? Gɩrɛ Ɩjɩrayɛldara n ƴaalnɩ wa kɔɔ 'lɛ ga, sɩ wɩrɛ Thãgba phiirni wer kɔɔ 'lɛ gɛr; sɩ wɩrɛ sɛnɩ awɩ ha dibire.
8 Dɩ gɩ har mɔ̃kɛ gɩ kherenɩ Thãgbaa sɛbɛra ayɩ: «Thãgba kɔɔ hana wɩ haar thirfirii, na yinəəkɛ na dɔnɩ ga yɩra', na nũukɛ na dɔnɩ ga nɩra', a dana nĩkɛ.»
9 Dɩ Davɩdɩ sor ayɩ: «Awɩ dɩko kho pa n dɔ war waya na pheru, na ji paar, na so heeneekɛ na teana wɩnɩ.
10 Awɩ yi n hana thũu wa ya', dɩ cʋɛ wɩ wa-n gũguun wire koo.»
11 Dɩ gɛr gɩ dɩ ɩ̃ bule ayɩ: Nɔɔra Juifisɔ benɩ a ji, khorr wɩ ba ji yaa? Kpɩɩa'. Awɩ jirə dɔ nɔɔ dɩ ca kpala 'lɛ taarɛ gɩ cʋʋ gbugi gɩ fʋ wɛr Juifisɔ awɩdara.
12 Dɩ ado awɩ ji dor tɩbɩla fɛʋ thɩɩraa bɔna 'lɛ pa, dɩ ado awɩ dɩ pa dor ca kpalaa bɔna 'lɛ pa, mɔ̃ awɩ nɔ dã na thʋ̃ na ha?
13 Sɩ nɛr ca kpala mɩ-n so gɩrɛ: Gɩdonɩ mɩ dor thɔ̃thɔn ca kpalala, mɩ-n gbɛ̃gbɛrɛnɛ ɩ̃ thɔna,
14 anaa ma yɩrɔrɛ fʋ paar ɩ̃ cʋʋ ɩ̃ ca gbugi n fʋ wɩ, ɩkhasɔ wɛrra n puno wɩ 'lɛ taarɛ.
15 Gɩdonɩ ado borɩkɛ Thãgba bo wɩnɩ dor tɩbɩla fɛʋʋ bir kũu kha na Thãgba, mɔ̃ awɩ bir gba na cʋʋ thɩ̃ɛ na pɔna, ga dor khe birə a 'lɛ yirəə?
16 A wɩ ha Thãgba caca mɩ̃ bolookɛ wɩ khenɩ, koo dɔ daphuu, dɩ a thɩr nɛɛ do daphuu mɛ̃ jɛ̃ɛ na ha dakha.
17 Sɩ ado Thãgba kɔɔ kurre ɩkhaa olɩvɩ thɩr jɛ̃sɔ a faa sɩɩ do fɛrkɛ dɔnɩ hɔ̃ olɩvɩ thɩrʋ a gba fɛr a cooro, dɩɩ do ɔɔ nɛ na ɔɔ ƴɔ̃ fɩ bullo,
18 fa-n məbi jɛɛnaala'; sɩ ado fa məbi jɛ gɩ do ga do fɛr fʋɔn nɛa', sɩ nɛɛ fɔ fɩ jɩɩlna.
19 Sɩ fa sor nayɩ: Mee, jɛ̃ɛle kurre a faa sɩ ɩ̃ fi ɩ̃ cooro.
20 Sobɔr gɩ wer, gɩ kɔɔ kuurre a faa gɩdonɩ ga hana ha pɛra', sɩ fɛrɛ ha pɛrɛɛkɛ fɩ hananɩ gɛr dʋɔn afɩ too. Fa-n ti gunə', sɩ dɔ maar n ka fʋ fɩ.
21 Gɩdonɩ ado Thãgba na kɔɔ sɩ thɩr thernaa jɛna ga, a na sɩ far dakha ga.
22 Yɛ mɔ̃ Thãgba bɔrnɩ na wo mɔ̃ ɔɔda na-n wurnə': Wɩrɛraakɛ jenɩ a-n nɩna wɛr mɔ̃ ɔɔda na-n wurnə', sɩ fɛrɛra wer a-n nɩna fɛr mɔ̃ a bɔrnɩ adora fɩ jɩɛ too bɔɔbɔɔ ga bɔ caraalera, agado mɛ̃ ga fɛrɛ dakha a na kur fer na faa.
23 Wɛr Juifisɔ dakha wer, ado wa bo too awɩ baalla ga, Thãgba na coor wer kãkɛ wɩ kɔɔ hanɩ, gɩdonɩ Thãgba hananɛ punone a na cʋʋna thɩ̃ɛ thale.
24 Ado nɛr ca kpalaakɛ dɔnɩ hɔ̃ olɩvɩ thɩr jɛ̃ɛ, kɛ Thãgba kɔɔ kurni a coor olɩvɩ thɩr thernanɛna sɩɩ dorakɛ ga teena gɩ hana mã', mɔ̃ ga fʋ sɩɩ do Juifisɔɔkɛ gbonɩ do olɩvɩ thɩr thernanɛ Thãgba na coor wɩ awɩ thɛthɛɛ olɩvɩ thɩrra ga?
25 Gɩdonɩ ma-n ƴaal nɩ omɩna na-n jɩ thɩ̃ gbulikaa ga, gɩ do nɔɔ na-n kpɩɛr waa gɩ ho thɩ̃ jɩna hana'; a thɩɛna gaa ga do Ɩjɩrayɛldaraa yaarra ƴɛrr ga jala', sɩ bɔɔkɛ ca kpala fɛʋ lonɩ na pɩ, dɩ nʋɔ dã, gɛr ga khuro;
26 mɛ̃ Ɩjɩrayɛl ɓibi na 'lɛ taarɛ, gɩ ha mɔ̃kɛ gɩ kherenɩ Thãgbaa sɛbɛra ayɩ: «Sɩyɔna Taadaar na the, a na tire Jakɔbɩɩ thɩ̃thɩɩn thɩ̃ gõgolõ;
27 gɛr na dɔ ɩ̃ nɔ bɩɛl ʋlfɛ na wɛr, ɔbɔɔkɛ ma faanɩ awɩ sopugosɔ.»
28 Ado tutugo bʋɔɔ thɩmɩɩra gɩ, sobɔr gɩ wer, Juifisɔ dor lãlara na Thãgba, sɩ dɩ nɩ fi a ka yɩrɔ bɔɔ; sɩ ado phiirera gɩ, Thãgba na wɛr dɩɩ do awɩ mama thɩ kɔ̃tɩ̃sɔ dɔ nɔɔ.
29 Gɩdonɩ Thãgba na do dadebinaa ɔɔ khaarda 'laara na ɔɔ wera ga.
30 Mamara nɩ kɔɔ nʋʋrɛ nũu Thãgbara, sɩ nɛnɛ̃ Thãgba jɩ nɛr bʋɔra dɩɩ do Juifisɔɔ nũ nʋʋr dɔ nɔɔ.
31 Mɛna dakha Juifisɔ nʋʋr nũu nɛnɛ̃ gɩ do nɔɔ bʋɔraakɛ Thãgba jɩ nɩnɩ wɩ 'lɛrɔ dakha bɔ jɩɩr wer.
32 Gɩdonɩ Thãgba tor tɩbɩla fɛʋ nũ nʋʋrɛra gɩ do nɔɔ a jɩ wɩ fɛʋ bʋɔra.
33 Nɩ hɩnɛ mɔ̃ Thãgbaa dakpɛ do hanɩ, na mɔ̃ ɔɔ kpɛsɛ na ɔɔ jɩ huloni ɓoɓo. Ɔɔ kpɩɛr na ha 'lʋʋrra ga; ɔɔ fɩlɩkɛ a-n cʋʋnanɩ thɩ̃ɛ na ha jɩɩrra ga, mɔ̃kɛ gɩ kherenɩ Thãgbaa sɛbɛra ayɩ:
34 «Amɛ hale a jɩ Kɔ̃tɩnɩ kpɩɛr? Dɩ amɛ dɔ ɔɔ fɩl dɩɩrdaar?
35 Amɛ dɔ cacadaar a kɔɔ ha Thãgba thɩ̃ɛ, dɩ na 'lar sɩ na bir na lɩmʋʋ?»
36 Gɩdonɩ ɔr kɔɔ te thɩ̃ɛ fɛʋ, ɔr fʋɔn thɩ̃ɛ fɛʋ jɩɩlna, dɩ ɔr dɔ nɔɔ dɩ thɩ̃ɛ fɛʋ hale gɩrɛ. Ɔɔ i n dʋbarɔ na jala waa khorr. Amɛn.