4
1 A mɛ̃ gɩ, mɔ̃ sa so Abɩrahamnaakɛ dɔnɩ asɩ mama thɩ kɔ̃tɩ̃? Anye a kɔɔ 'lɛ na ɔɔ thɛthɛɛ fãga?
2 Ado sor kɔɔ hɛllɛ Abɩrahamna dɩɩ the thɩ̃ cʋʋrɛra a hananɛ gɩrɛ a na məbironi, sɩ ga do Thãgbaa ƴɛra ga.
3 Gɩdonɩ anye Thãgbaa sɛbɛ so? Gɩ sor: «Abɩraham kɔɔ pɛr Thãgba haar dɩɩ do gɛr Thãgba hɩɩn sa wɩɩ tɩɩ sarʋ.»
4 Mee ʋrɛ dɔnɩ thɔma wɩ-n lɩmʋʋnɛ, ga do khaardaa wa hɩɩn gɩ gɩ dora', sɩ helu gɩ dɩ wɩ lɩmʋʋ.
5 Sɩ ʋrɛ na-n cʋɛnɩ thɩ̃a', sɩ dɩ pɛr haar ʋrɛraakɛ n hɛlanɩ sopugodaarra sor, Thãgba na thernanɛ ɔɔ ha pɛɛle dɩ sor na hɛllaa.
6 Mɛ̃ Davɩdɩ mɩɩ mɔ̃ ga danɩ tibilləəkɛ Thãgba n hɛllɔnɩ sor sɩ ga-n the thɔ̃ cʋʋrɛra ga, ayɩ:
7 «Gɩ-n dar wɩrɛraakɛ Thãgba faanɩ awɩ dakhaba do, kɛ dɔnɩ wɩrɛ dakha a hɛllɔnɩ sopugo.
8 Gɩ-n dar tibilləəkɛ Kɔ̃tɩn na-n thernɩ ɔɔ sopugo da-n ha ga.»
9 Dɩ ga kãka caakɛra khʋ̃ kurdaraada gɩ do dɩbara yaa, agɩbo wɩrɛ na kuroni khʋ̃aada gɩ do dakha? Gɩdonɩ sɩ kɔɔ sor ayɩ: «Abɩrahamɩ ha pɛ dɔ nɔɔ dɩ Thãgba wɩɩ tɩɩ sarʋ.»
10 Dɩ bɔ ʋmɔna gɩ? Ɔbɔɔkɛ a kɔɔ kurni khʋ̃ʋ gɩ yaa, agɩbo ɔbɔɔkɛ aa kɔɔ kurni khʋ̃ʋ paa gɩ? Ɔbɔɔkɛ aa kɔɔ kurni khʋ̃ʋ paa gɩ, dɩ a dor ʋrɛ na kɔɔ kuroni khʋ̃a'.
11 A kɔɔ 'lɛr jɩɩnɩkɛ dɔnɩ khʋ̃ kurdaa dɩɩ do gɛr n nɛna so hɛllɛɛkɛ a kɔɔ 'lɛnɩ ha pɛrɛra, ɔbɔɔkɛ aa kɔɔ kurni khʋ̃a'; dɩ mɛ̃ a do thɩrɛ wɩrɛ fɛʋraakɛ n pɩɛrnɩ haar, kɛ na kuroni khʋ̃a', dɩ mɛ̃ Thãgba n hɩɩn wɩ dɩ wɩ do fɩl sardara.
12 Abɩraham dor thɩrɛ dakha khʋ̃ kurdarara, sɩ ga do khʋ̃ kurdara ha wɩ dɩbara ga, sɩ wɛr dɔ wɩrɛɛkɛ n kpaannɩ asɩ mama thɩ kɔ̃tɩ̃ Abɩrahamɩ ha pɛraakɛ a kɔɔ hananɩ ɔbɔɔkɛ aa kɔɔ kurni khʋ̃ʋ pa'.
13 Thãgba kɔɔ ʋlfɛrɛ ayɩ, Abɩraham na ɔɔ məlsɔ na hɩna thɩɩkɛ; dɩ ga do jɔfʋ hɩɩnɛ dɔ nɔɔ dɩ Thãgba ʋlfɛnaa thala', sɩ ha pɛrɛɛkɛ a hananɩ a 'lɛrɔ so hɛllɛ dɔ nɔɔ.
14 Gɩdonɩ ado jɔfʋ hɩɩnɛ dɔ nɔɔ dɩ wɩ do thɩ̃ hɩna, ga dor ha pɛrɛ wer mɔlɔ thɩ̃ɛ gɩ, dɩ ʋlfɛrɛ dakha kʋkʋʋlɛ.
15 Gɩdonɩ jɔfʋ n ɩrɛna Thãgbaa nĩkhi, dɩ ka jɔfʋ na-n hana', jɔfʋ kʋɛrɛ na-n hale dakha ga.
16 Mɛ̃ thɩ̃ hɩ̃ 'lɛrɩle the ha pɛrɛra gɩ do bɔ jɩɩrra gɩ, dɩ mɛ̃ ʋlfɛrɛɛle na puno phubi a na do Abɩrahamɩ məl fɛʋʋda, sɩ ga do ɔɔ məlikɛ dɔnɩ jɔfʋdara dɩbara ga, sɩ gɩ do wɩrɛ fɛʋ hananɩ Abɩrahamɩ ha pɛɛda; gɩdonɩ Abɩraham dʋɔn sɛrɛ fɛʋʋ thɩ.
17 Dɩ gɩ har mɔ̃kɛ gɩ kherenɩ Thãgbaa sɛbɛra ayɩ: «Mɩ thɩɩn fɛr fɩ do ca jɔɔ thɩ.» A do sarɛ thɩrɛ Thãgbaa ƴɛra, kɛ dɔnɩ ʋrɛ a pɛrnɩ haar, kɛ dɔnɩ Thãgbaakɛ n cʋɛnɩ khe dɩ wɩ bir hana yire, dɩ gɩrɛ na hanɩle pa' sɩ a-n therna gɛr mɔ̃kɛ gɩ hanɩle.
18 Abɩraham hananɛ ha pɛrɛ Thãgbara gɛr gɩ dɩ hana nũ pɛrɛ gɩrɛraakɛ na dɔnɩ dacʋʋnaa ga, dɩ mɛ̃ a debi a do «ca jɔɔ thɩ», dɩ gɩ har mɔ̃kɛ Thãgba sonɩ ayɩ: «Thale afɩ məl na ha.»
19 Ɔɔ ha pɛɛkɛ a hananɩ ga wurə', sɩrakɛ yɛna tamaa a kɔɔ thɔɔ a dã khir, dɩ Saraa bi kɔ̃ bɔ dakha 'li kar.
20 Sɩ ha pɛrɛ na ɓɔrʋa', dɩ aa-n baal Thãgbaa ʋlfɛra woa', sɩ ha pɛrɛ cʋgʋʋrɛ dɩ 'lɛ fãga da-n khɩɩ Thãgba.
21 A hananɛ tu jɩɩr gel dɩ gɩrɛ Thãgba ʋlfɛnɩ ɩna cʋʋrɛ a na puno ger a na cʋʋ;
22 dɩ gɛrra dɔ nɔɔ dɩ «Thãgba wɩɩ tɩɩ sarʋ.»
23 Thɩmɩɩrɩkɛ kherenenɩ ayɩ, «Thãgba wɩɩrɛ tɩɩ sarʋ», ga do ɔr dɩbara gɩ soa'.
24 Sɩ sɩ harrɛ ser tɩɩ sar dʋʋrraale, sɛrkɛ pɩɛrnɩ haar ʋrɛraakɛ ɩrɛnɩ Jeju asɩ Kɔ̃tɩ̃ dɩ the khirera.
25 Ʋrɛɛkɛ wɩ kʋnɩ asɩ sopugora sɩ dɩ ɩɩr a the khirera sor n hɛl sar.