5
1 Dɩ mɔ̃ Thãgba hɛl sarnɩ sor thakɛ dɩɩ do ha pɛrɛ dɔ nɔɔ, sɩ hananɛ ha ɩɩ na ɔr dɩɩ the Jeju Kirisiti asɩ Kɔ̃tɩna.
2 Ɔr dɔ nɔɔ dɩ sɩ ba yɩrɔ ha pɛrɛra lõ paar bɔ jɩ caarraakɛ sɩ jɩɩlɔnɩ gɩrɛ kɩbɩ, dɩ sa-n kãka nũ pɛrɛraakɛ sɩ hananɩ a na bul kha na Thãgbaa i dʋbɩ.
3 Dɩrakɛ wo sɩ-n kãkarɛ bɔ gaarɛra gɩdonɩ sɩ jɩrɛ dɩ bɔ gaarɛ n ɛna ha fʋrɛ,
4 dɩ ha fʋrɛɛle na cʋɛ sɩ dɩ sa for a na bɩ̃, dɩ bɩɩnɩle n 'laanɛ nũ pɛrɛ.
5 Dɩ nũ pɛrɛɛle na pɛ sar yicuruə', gɩdonɩ naʋʋkɛ Thãgba na sɩnɩ gɩ və̃viəne a hi asɩ hara, dɩ Thu Phuu pa gɩ the, kɛ Thãgba ha sɩnɩ.
6 Ɔbɔɔkɛ sa-n kɔɔ yɩrɔnɩ fɛfɛɛ paar kpɩɩa', gɛr Kirisiti khiro sɛr sopugodarara, bɔɔkɛ Thãgba pɛrnɩ danɩ.
7 Dɩ fa tee tɩɩ sarʋʋ khi a na khi gɩ khɩɩrɛ, sɩ anaa ʋkha na ture a na tee tɩɩ bʋɔɔ khi a na khi.
8 Sɩ yɛ gɩrɛ n nɛnanɩ mɔ̃ Thãgbaa naʋʋkɛ a na sɩnɩ hanɩ: Ɔbɔɔkɛ sɩ kɔɔ donɩ sopugodara 'lo gɛr Kirisiti ka khiro asɩ sora.
9 Dɩ mɔ̃ ga ka na ha gɩrɛ dɩphã ɔɔ tɔmɩ̃ hɛl sɩnɩ sor, gɩ do aa ka taa sɩ Thãgbaa nĩkhirə ga.
10 Gɩdonɩ ado ɔbɔɔkɛ sɩ kɔɔ donɩ lãlaardara na Thãgba, ɔɔ Bikuuni khi cʋʋ sɛr dɩ sɩ bir kũu kha na Thãgba; dɩ mɔ̃ ga ka na ha gɩrɛ dɩphã sɩ birni kũu kha na Thãgba gɩ do Kirisitii yi na taa sa'.
11 Sɩ ga do gele gɩ dɩbara ga, sɩ dakha sɩ-n kãkarɛ Thãgbara dɩɩ the asɩ Kɔ̃tɩ̃ Jeju Kirisitira ʋrɛɛkɛra sɩ 'lɛrnɩ bir kuune dɩphã.
12 Nɩ yɛ mɔ̃ gɩ hanɩ: Tibil bɩɛl dɔ nɔɔ dɩ sopugo ba lona thɩɩra, dɩ sopugorara khir the, dɩ khirrə mar tɩbɩla ɓibi, gɩdonɩ tɩbɩla ɓibi n cʋɛ sopugo.
13 Sopugo kɔɔ 'lire hakɛ thɩɩra sɩ dɩ jɔfʋ pɩɩrɔ 'laa, sɩ kãkɛ jɔfʋ na hana', sopugo therre na hala'.
14 Dɩ a fʋna Adãa bɔɔ a dana Mʋɩjɩɩ bɔɔ khir n punone tɩbɩla fɛʋ, narakɛ wɩrɛ na kɔɔ cʋɛnɩ sopugo Thãgbara dɩɩ ho Adãada ga; dɩ Adana hʋɔn ʋrɛ na ɩnanɩ.
15 Sɩ bʋɔraakɛ Thãgba n jɩnɩ tibil dɩɩ do khaardaa gɩ do, gɩ har kpɩɩ na sopugo. Gɩdonɩ tɩɩ bɩɛlɩ sopugo dor nɔɔ dɩ tɩɩ jɔjʋɔ khiir, sɩ bʋɔraakɛ Thãgba n jɩnɩ tibil na khaardaakɛ a-n 'laanɩ pɔɩ dɩɩ do tɩɩ bɩɛlɩkɛ dɔnɩ Jeju Kirisiti dɔ nɔɔ, gɩ kɔ̃tɩnɛ a jɔ gele fɩ̃i a ƴɛr a dã tɩbɩla fɛʋ.
16 Thãgbaa khaarda na gɩrɛ tibili sopugo cʋʋnɩ gɩ har dɩɩdɩɩ: Sopugo bɩɛl dɩbara gɛr ɩrɛna kɩɩlʋ dɩ sor heen tɩbɩla gɩrɛ, sɩ sopugo jɔjʋɔɔkɛ tɩbɩla cʋʋnɩ sor ka hɛl warɛ dɩɩ do bɔ jɩ khaardaa dɔ nɔɔ.
17 Ado tibil bɩɛlɩ sopugo do nɔɔ dɩ khir na-n puno tɩbɩla fɛʋ dɩɩ the tɩɩ bɩɛllaalera, mɔ̃ gɩrɛ tɩɩ bɩɛlɩkɛ dɔnɩ Jeju Kirisiti kɔɔ cʋʋnɩ na thʋ̃ na ha? Gɛr dʋɔn wɩrɛ fɛʋʋkɛ 'lɛnɩ Thãgbaa bɔ jɩ jɔɔ na khaardaakɛ dɔnɩ so hɛllɛ, na dor punodara awɩ yi hanana gɩ do Jeju Kirisiti dɔ nɔɔ.
18 Gɛr gɩ mɔ̃kɛ tɩɩ bɩɛlɩ sopugo donɩ nɔɔ dɩ so heene dã tɩbɩla fɛʋ, ɔmɛna tɩɩ bɩɛlɩ fɩl sar thɔ̃ na cuu tɩbɩla fɛu dɩ sor na hɛl war dɩ wa 'lɛ yire.
19 Mɔ̃kɛ tɩɩ bɩɛlɩ nũ nʋʋr cʋʋnɩ tɩbɩla jɔɔ dɩ wɩ do sopugodara, mɛ̃ tɩɩ bɩɛlɩ nũ nɩ na cʋʋ tɩbɩla jɔɔ dɩ sor na hɛl war.
20 Jɔfʋ 'lɔɔrɔrɛ gɩ cʋʋ sopugo gɩ jɔr, dɩ ka sopugo jɔrnɩ le Thãgbaa bɔ jɩ n jɩɩ jɔr.
21 Mɛ̃ gɩɩ, mɔna sopugo punoni tɩbɩla fɛʋ da-n 'laa khir, mɛ̃ Thãgbaa bɔ jɩ dakha hana punone dɩ ga-n hɛl tɩbɩlala sor gɩ kpa sɩ gɩ pɛ yire khorra, gɩ do Jeju Kirisiti asɩ Kɔ̃tɩ̃ɩ pa gɩ the.