3
1 Anye Juifi dʋʋr n hana? Dɩ anyee bɔ ca khʋ̃ kurre n taa?
2 Thɩ̃ɛ gɩ wer waa gel. Caca thɩ̃ɛ gɩdonɩ Juifisɔ Thãgba kɔɔ dʋ ɔɔ so nyɔ̃kɔɔ.
3 Dɩ mɔ̃, ado ɩkhasɔ wɛrra na kɔɔ pɛr haara', mɔna wa pɛrnɩ haara' na kʋɛrɛ Thãgbaa sobɔdaar do ya?
4 Kpɩɩraka'. Tɩbɩla fɛʋ donɩnakɛ sõsodara, sɩ Thãgba wer sobɔ sodaarra a do, dɩ gɩ har mɔ̃kɛ gɩ kherenɩ ɔɔ sɛbɛra ayɩ: «Wa yɩ fɛr dɩ fa telẽ afɩ thɩmɩɩra, fɛr na-n dɔ hʋ hanadaar kɩɩlɛlaakɛ wa-n kɩɩlna fɩnɩ.»
5 Dɩ ado asɩ fɩl gõgolõ na-n nɛna mɔ̃ Thãgba sarnɩ, anye sa so 'lo? Dɩ ado Thãgba gbana sɛr nĩkhii ga dor ɔɔda na saraa gaa? Tibiile mɩ mɩɩ gɩrɛ wer.
6 Ga ha thale kpɩɩraka'. A gɩ ha thale, mɔ̃ Thãgba na kɩɩlna tɩbɩla fɛʋ thɩɩra?
7 Gɩdonɩ ado ɩ̃ sõso dɔ nɔɔ dɩ Thãgbaa sobɔ jɩɩ yɩr, a cʋʋna dakha dɩ ɔɔ i dʋbɩrɔ, mɔ̃ na dɔ nɔɔ dɩ wa kɩɩlna mɩ sopugoda dʋʋrra?
8 Anye na tɔna sɩ dɩ sa so nayɩ, sa-n cʋɛ puure ga-n ɩna bɔa? Thale asɩ i kʋɛdara n mɩɩ aa, sɩ sor. Wɩrɛ n mɩanɩ thale, sor na heen wer a na teena wɩ.
9 Dɩ mɔ̃ gɩ ha? Sɛr Juifisɔ sɩ baar wɩ̃ tibil ya? Kpei. Sɩ kɔɔ 'lire yɩ gar dɩ Juifisɔ a gbana wɩrɛ na dɔnɩ Juifisɔa', fɛʋ sopugo n pɔtɔrɔnɛ wɩ.
10 Dɩ gɩ har mɔna gɩ kherenɩ Thãgbaa sɛbɛra ayɩ: «Tibilikɛ saranɩ na hala', bɩɛllakɛ na hala';
11 tibilikɛ jɛnɩ fɩlɛ na hala', tibil bɩɛl na hale dɩ ƴaal Thãgba ga.
12 Fɛʋ faarɛ hʋɛ sa debi do tɩɩ kʋɛsʋsɔ ɓibi; bɩɛl na halerakɛ dɩ cʋʋ thɩ̃ bʋɔa', bɩɛl 'lẽ'lenakɛ na hala'.
13 Awɩ nɔ hor mɔ̃ wɩ-n phuuni kaa, wɩ gbaar awɩ delẽbi dɩɩ do fɩɩldaa, thɩmɩɩrɩkɛ n thɛnɩ awɩ nɔfara sikor kpalʋ gɩ.
14 Tɩɩ nɩɩrɛ na thɩmɩɩ ƴʋ̃ɔ hi wer nɔɔ.
15 A wa ca vuu dɩɩ do tibil wɩ yɩ ɩnɩ-n kɔ;
16 awɩ ka pa fɛʋ, ʋʋnɛ na gaarɛ gɩ-n pɛ;
17 wa jɩ hʋɛɛkɛ n 'laanɛnɩ ha ɩɩ kpɩɩraka',
18 Thãgba maar na ha awɩ hara ga.»
19 Sɩ sɩ jɩrɛ dɩ gɩrɛɛkɛ jɔfʋ sonɩ wɩrɛ hanɩ jɔfʋra a so, dɩ tibil bɩɛllakɛ na yɩ nɔ ha paara', sɩ gɩ do tɩbɩla fɛʋ sor heen wer Thãgbaa ƴɛra.
20 Gɩdonɩ sor na hɛl tibil bɩɛllalakɛ jɔfʋ thɔ̃ cʋʋrɛra ga, gɩdonɩ jɔfʋ n ka ɩna sopugo jɩɩr.
21 Sɩ nɛnɛ̃ mɔ̃ Thãgba na hɛlnɩ tɩbɩlala sor, sɩ ga do jɔfʋra gɩ tha', gɩ yɩrrɛ; jɔfʋra na Thãgbaa bobonasɔ kɔɔ mɩa gɩ,
22 dɩ Thãgbaa so hɛlla tɩbɩlaakɛ n pɩɛrnɩ Jeju Kirisiti haar sorra n hɛllɔ, sɩ wɩrɛ fɛʋʋkɛ n pɩɛrnɩ haar na 'lɛ, gɩdonɩ dɩɩdɩɩ hɩɩn paar na hala'.
23 Tɩbɩla ɓibi dʋɔn puu cʋʋdara a 'lee i dʋbɩrɛɛkɛ dɔnɩ Thãgbaada.
24 Sɩ khaar sor na hɛl war ɔɔ bɔ jɩra gɩ the birsereraakɛ Jeju Kirisiti birse wini.
25 Dɩ ɔr Thãgba gba a jinə bonɩɛ dɩ ɔɔ tɔmɩ̃ na do sopugo hɛldaa wɩrɛraakɛ n pɩɛrnɩ haar, gɩ nɩna ɔɔ fɩl sar, gɩdonɩ aa kɔɔ therna sopugookɛ tɩbɩla kɔɔ cʋʋnɩ mamara ɔɔ ha fʋ bɔra ga.
26 Sɩ a ƴaalɛ a nɩna ɔɔ fɩl sar nɛnɛ̃ bɔɔraakɛ, gɛr na nɛna dɩ ɔr dɔ ʋrɛ saranɩ da-n hɛl ʋrɛ n pɩɛrnɩ Jeju haar sor.
27 Dɩ kana gɩrɛ tibil na məbironi ha? Ga hala'. Anye dɔ nɔɔ? Jɔfʋ thɔ̃ cʋʋrɛ dɔ nɔɔ ya? Kpei. Ha pɛrɛra gɩ the.
28 Gɩdonɩ sɩ yɩ gɛr dɩ ha pɛrɛ dɔ nɔɔ dɩ tibil n 'lɛrɔ so hɛllɛ, ga do jɔfʋ thɔ̃ cʋʋrɛra ga.
29 Dɩ Thãgbara, Juifisɔɔ Thãgba a ba do dɩbara ya? Ga do ca kpalaa Thãgba a do dakha gaa? Ɔɔ, ca kpalaa Thãgba a do dakha.
30 Gɩdonɩ Thãgba bɩɛlla a do, dɩ cʋʋ sor dɩ ga-n hɛl khʋ̃ kurdarara dɩɩ the awɩ ha pɛra, dɩ cʋʋ sor dɩ ga-n hɛl wɩrɛraakɛ na kuroni khʋ̃a', dɩɩ do ha pɛrɛ dɔ nɔɔ.
31 Dɩ ha pɛrɛ ba dor nɔɔ dɩ sɩ cʋʋrɔ jɔfʋ dɩɩ debi a do mɔlɔ thɩ̃ɛ ya? Kpɩɩraka'. Jɔfʋ sɩ ka jɩɩ cʋʋ dɩɩ do jɔfʋ.