Thãgba na taarɛ Jerujalɛm dɩɩ
12
1 Thãgba Kɔ̃tɩn mɩɩrɛ ɔɔ thɩmɩɩ na nɔ kheu.Thãgba Kɔ̃tɩnɩ thɩmɩɩkɛ a mɩɩnɩ Ɩjɩrayɛl bɩsanaadara Ɩjɩrayɛlɩdara.
Mɛr Thãgba Kɔ̃tɩnɩkɛ cʋɛnɩ ƴũu a cʋʋna thɩɩ,
kɛ hananɩ tibil yiri, mɛr sɔ:
2 Hɩnɛ ma cʋʋrɛ
Jerujalɛm da do gborookɛ henəni
ɩ̃ nĩkhi dɩvɛ̃ khaa,
gɩ pɛ caar fɛʋraakɛ na diərəəni gbə̃gbəkhilə̃bi.
Juda dakha ɔmɛna a na ha
ɔbɔɔkɛ wa sɔbɩnɩ Jerujalɛm dɩɩ.
3 Ga bɔɔraalera, ma cʋʋrɛ Jerujalɛm
da ho boka dʋbɩ kɛ caar fɛw
na punoni na khəyə'.
Wɩrɛ fɛʋʋkɛ na ƴaalɛnɩ wɩ khəyi ɩ,
wa 'lɛrɔrɛ kho sɩɛ gɩ puuro.
Dɩ caar fɛw thɩɩra na kpalmanɛ wɩ kenaa.
4 Mɛr Thãgba Kɔ̃tɩn sor ayɩ:
Ga bɔɔraalera,
ma pɛr maar gãgonasɔra,
ɩ̃ pɛ gə̃gəle wɩrɛraakɛ jʋnɛ wɩnɩ.
Sɩ Judaa cɔdara wer, ma bɛr wɛr,
Sɩ̃ pɛ ɲaarɛ ca kpɩɩsɔ gãgosɔɔra fɛw.
5 Dɩ Juda Kɔ̃tɩna na n mɩɩrɛ awɩbara wɩ yɩ:
Jerujalɛmdara hananɛ fãga
dɩɩ the Thãgba Kɔ̃tɩn awɩ Thãgbaraakɛ
dɔnɩ kokenaa kɔ̃tɩ̃.
6 Ga bɔɔraalera ma cʋʋrɛ Juda kɔ̃tɩna
dɩ wa ho dɔɔkɛ,
wɩ tonɩ dɛɛraakɛ wɩ banɩ,
Wɩ ho wo hɔ̃ lireekɛ wɩ lɩnanɩ dɔɔ a to jʋ gbʋʋllɔ.
Dɩ wa bũburone caar fɛʋʋkɛ diə warnɩ bilə fɛw,
Sɩ Jerujalɛmdara na hale 'lo na too awɩ dʋɔ.
7 Judaa cɔ kasɔ mɛr Thãgba Kɔ̃tɩn na kɔɔ taa ɓo,
Gɩ do nɔɔ Davɩdɩɩ cɔdara
Na Jerujalɛmdara
Na n kpɩɛr waa dɩ ɩnɛr bãa Judaa cɔdara ga.
8 Ga bɔɔraalera, mɛr Thãgba Kɔ̃tɩn na bɛrɛ
Jerujalɛmdara;
wɩrɛ yɔɔnɩ jɔɔ awɩ thɩ̃thɩɩn ga bɔɔle,
na bire na hana fãga Davɩdɩɩ kha;
sɩ Davɩdɩɩ cɔdara na ho warɛ Thãgba,
wa hor Thãgba Kɔ̃tɩnɩ thɔ̃thɔ̃ thu
wa n kʋʋlna wɩ ƴɩɛ.
9 Ga bɔɔraale,
ma teerore
a na bũburõ ca kpɩɩsɔ fɛʋʋkɛ
na ɩnanɩ wɩ kena Jerujalɛm.
10 Dɩ ma pɛr Davɩdɩɩ cɔdarara
na Jerujalɛmdarara
bɔjɩ kpɩɛrɛ na ƴɛƴɛɛ kpɩɛrɛ,
dɩ wa kɛrɛ ƴɩɛ na pɛ mar,
gɩ do ʋrɛra wɩ gɔnɩ gɛlʋ dɔ nɔɔ.
Dɩ wa bɩɩrɛ
mɔ̃ wɩ n bɩnɩ bikuun bɩɛl 'lẽ'lẽekɛ kheni
Dɩ wa bɩɩrɛ jɔɔ
mɔ̃ wɩ n bɩnɩ caca bikuunɩkɛ n kheni.
11 Ga bɔɔraale,
benɩɛ na gbɔr Jerujalɛm
mɔ̃ gɩ n gbɔnɩ Hadadɩ-Rɩmɔ̃ bera,
Megido ɓɛlɛnɔ.
12 Thɩ kʋɔn wo thɩ kʋɔn le dɩɩra
na n bɩrɛ,
Thɩ kɔ̃ dɔɔ ɔɔ ƴɛra:
Davɩdɩɩ thɩ kɔna, kona awɩ ƴɛra kpɩɩ,
khɛra awɩ ƴɛra kpɩɩ.
Natãa thɩ kɔna, kona awɩ ƴɛra kpɩɩ,
Khɛra awɩ ƴɛra kpɩɩ.
13 Levɩɩ thɩ kɔna, kona awɩ ƴɛra kpɩɩ,
Khɛra awɩ ƴɛra kpɩɩ.
Simeyɩɩ thɩ kɔna, kona awɩ ƴɛra kpɩɩ,
Khɛra awɩ ƴɛra kpɩɩ.
14 Ɔmɛna gɩ na thɩ kɔ̃ wɩrɛ sɛnɩ,
wa n bɩrɛ thɩ kɔ̃ dɔɔ ɔɔ ƴɛra; kona awɩ ƴɛra kpɩɩ,
khɛra awɩ ƴɛra kpɩɩ.