AJEE SƐBƐ
Thãgba fʋɔr cɔ bir mɩ thɩmɩɩr
1
1 Ɔbɔɔkɛ Darɩyusɩɩkɛ donɩ Pɛrsɩ jamana ɔɔ balaɲɔ yɩɛrɩ ɲɛ̃be maadõ sɩporɩ caca wirə, gɛr Thãgba Kɔ̃tɩn mɩɩna ɔɔ mɩmɩɩ Aje, a sɔ Jorobabɛllaakɛ dɔnɩ Seasɩɛlɩ bikuun, kɛ dɔnɩ gobanɛr Judaa məlsɔɔra, na Jojueraakɛ dɔnɩ Yosadakɩɩ bikuun, kɛ dɔnɩ gbõdaar ayɛ: 2 «Mɛr Thãgba Kɔ̃tɩn, kokenaa kɔ̃tɩ̃ sor ayɩ: Tɩbɩlaakɛ n sor aa, bɔɔ na dã pɩ dɩ ɩna bir na mɩ mɛr Thãgba Kɔ̃tɩnɩ cɔa'!» 3 Dɩ gɛr dɔ nɔɔ Thãgba Kɔ̃tɩn mɩɩnanɩ Thãgbaa mɩmɩɩ Aje, a sɔ war wɔɔ:4 «Bɔɔ daan nɛrɛra wer dɩ nɩ mɩ cɔ ɓɔna na n cɔrɔ,
sɩ ɩ̃ cɔ wer kpolo a too bɛɛ?»
5 Nɛnɛ̃ɛkɛ, mɛr Thãgba Kɔ̃tɩn, kokenaa kɔ̃tɩ̃ sor:
«Nɩ kpɩɛrɛna gɩrɛ n dana nɩnɩ a hɩnɛ.
6 Nɩ n diire thɩ̃ɛ bərəəm,
sɩ dɩ nɩ kha fɩɩʋ,
Nɩ n khor dikor wer sɩ na n hiə', dɩ nɩ ɲɔ ɲʋɔn sɩ ƴɔlkhaar na n pa',
Nɩ hananɛ kẽkena wer, sɩ ga n pɩ nɩ ɩɩra',
A thɔ̃daar gba ɔɔ lɩmɩ, dɩɩ ho loka cuurə a to gɩ.
7 Gɛr gɩ, dɩ mɛr Thãgba Kɔ̃tɩn, kokenaa kɔ̃tɩ̃ so ayɩ: «Nɩ kpɩɛrɛna gɩrɛ n dana nɩnɩ a hɩnɛ.
8 Nɩ jʋnɛ gɔ̃gɔnana,
A kuure thɩra ɛna a mɛna mɛr Thãgbaa cɔ,
Dɩ ma hana garɛ daw, ɩ̃ i na n dʋbɩrɔ,
Mɛr Thãgba Kɔ̃tɩn sɔ.
9 «Nɩ n kɔɔ kpɩɛrɛ mɔ̃ na 'lɛnɩ kokol thɩ̃ɛ jɔɔ,
Sɩ dɩɩ do gbe fɩɩʋ nɩ 'lɛ dɩbara.
Dɩ nɩ kɔnanɛ gbeelera cʋɔrɔ wer,
sɩ mɩ phʋbɩ gɛr dɩɩ jalna jɩɛ fɛw.
Aɲe dɔ nɔɔ?
Mɛr Thãgba Kɔ̃tɩn, kokenaa kɔ̃tɩ̃, mɛr bulene nɩ.
Ɩ̃ cɔɔkɛ kpolonenɩ gɛr dɔ nɔɔ,
Sɩ dɩ nɛrɛ fɛw bɩɛlbɩɛl, ntɛ na n yɩrna ɔɔ thɛthɛɛ cɔ.
10 Gɛr gɩ dɩ ƴũu tɔ̃ nɩ ɲʋɔn,
Dɩ thɩɩ dakha tɔ̃ nɩ ɔɔ dɩko.
11 Mɛr te thɩ̃ khɩ yɩɛr a pɛ dɩɩra, na gɔ̃gɔnana,
Na bilesɔɔra na dɩvɛ̃ thɩraraakɛ n 'laanɛnɩ dɩvɛ̃ phaa, na olɩvɩ thɩraraakɛ n 'laanɛnɩ niin na thɩ̃ phulolesɔɔra fɛw.
Dɩ tɩbɩla na nʋma na n gaar.
Dɩ anɩ ɲɛ̃ thɔ̃sɔɔ fɛw dɩɩdɩɩ do mɔlɔ vɔɔrɛ.»
12 Dɩ Jorobabɛlɩkɛ dɔnɩ Seasɩɛlɩ bikuun, na Yosadakɩɩ bikuun Jojueekɛ dɔnɩ gbõdaar, na tibil wɩrɛ fɛʋkɛ sɛnɩ nɩrɛ nũu Thãgba Kɔ̃tɩn, awɩ Thãgbaa thɩmɩɩra mɔna Thãgbaa mɩmɩɩ Aje kɔɔ mɩɩnɩ. Dɩ gɩ har mɔ̃kɛra Thãgba Kɔ̃tɩn, awɩ Thãgba kɔɔ thʋɔnɩ. Dɩ tɩbɩla kɔɔ hananɛ maar Thãgba Kɔ̃tɩnna. 13 Dɩ Ajeekɛ dɔnɩ Thãgba Kɔ̃tɩnɩ thɔ̃thɔn mɩɩrɛ tɩbɩla gɩrɛ Thãgba Kɔ̃tɩn sonɩ aa: «Mɩ har kha na nɛrɛ, mɛr Thãgba Kɔ̃tɩn sɔ.» 14 Dɩ Thãgba Kɔ̃tɩn har Jorobabɛl, Seasɩɛlɩ bikuun, kɛ dɔnɩ Judaa məlsɔɔ gobanɛr 'lar, na Jojue, Yosadakɩɩ bikuun, kɛ dɔnɩ gbõdaar, na tɩbɩla fɛʋkɛ sɛnɩ. Dɩ wɩ jaal Thãgba Kɔ̃tɩn, kɛ dɔnɩ kokenaa kɔ̃tɩ̃ awɩ Thãgbaa cɔ, a bir fʋ cɔ mɩ thɔma dɩ wa n do. 15 Darɩyusɩ donɩ jamana, ɔɔ balaɲɔ yɩɛrɩ ɲɛ̃be maadõ sɩporɩ wire kpelẽ yenana gɩ.