JAKARƖƖ SƐBƐ
Thãgba so Ɩjɩrayɛl bɩsanana wɩ faa awɩ cʋʋ pa puusɔ sa kɛra birə nar
1
1 Darɩyusɩ donɩ Pɛrsɩ jamana, ɔɔ balaɲɔ yɩɛrɩ sɩpora makõthera, Thãgba Kɔ̃tɩn mɩɩnanɛ ɔɔ mɩmɩɩ Jakarɩ, kɛ dɔnɩ Berekɩaa bikuun, sɩ ɔɔ thɩ kɔ̃tɩ̃ na n do Ɩdo ayɩ:2 Mɛr Thãgba Kɔ̃tɩn kɔɔ gbaar nĩkhi kɔ̃tɩ̃ɩ ka na anɩ thɩ kɔ̃tɩ̃sɔ. 3 Sɔ war aa: Mɛr Thãgba Kɔ̃tɩnɩkɛ dɔnɩ kokenaa kɔ̃tɩ̃ sor ayɩ: Nɩ kɛra ɩna mar, dɩ ma kɛrɛ na ɩ̃ nar. Mɛr Thãgba Kɔ̃tɩn kokenaa kɔ̃tɩ̃, mɛr sɔ. 4 Na n ho anɩ thɩ kɔ̃tɩ̃sɔa'. Wɛr, ɩ̃ caca mɩmɩɩsɔ n kɔɔ so warɛ dɩ wɩ yɩ: Thãgba Kɔ̃tɩn, kokenaa kɔ̃tɩ̃ sor ayɩ: Nɩ kɛra sa faa anɩ hʋ puusɔ na anɩ cʋʋ pa puusɔ. Sɩ wa pɛ nũə', wa nɩ mɩ nũuə'. Mɛr Thãgba Kɔ̃tɩn sɔ. 5 Dɩ kana anɩ thɩ kɔ̃tɩ̃sɔɔra ha nĩ? Dɩ ɩ̃ mɩmɩɩsɔ hale 'lo na yire ya? 6 Sɩ ɩ̃ thɩmɩɩsɔ na ɩ̃ jɔfʋsɔɔkɛra mɩ kɔɔ hanɩ ɩ̃ thɔ̃dara, kɛ dɔnɩ ɩ̃ mɩmɩɩsɔ, dɩ wɩ mɩɩ, kɔɔ 'lire anɩ thɩ kɔ̃tɩ̃sɔ oti. Dɩ wɩ kɛrɛ ɩ̃ mar a tu aa: Thãgba Kɔ̃tɩn, kokenaa kɔ̃tɩ̃ kɔɔ tire kpɩɛrɛ a cʋʋ sɩ mɔna asɩ fɩl na asɩ cʋʋ pasɔ hanɩ, dɩ mɛna a cʋʋ sɩ.
JAKARƖƖ THƖ YƖRƖKƐ A YƖNƖ
Caca thɩ̃ yɩr: gãgona
7 Darɩyusɩ donɩ jamana, ɔɔ balaɲɔ yɛra, yɩɛrɩ ɲẽbe yʋɔr bɩɛl sɩporɩkɛ wɩ n wenɩ sebatɩ, ɔɔ wire kpelẽ yenana, Thãgba Kɔ̃tɩn kɔɔ mɩɩnanɛ ɔɔ mɩmɩɩ Jakarɩɩkɛ dɔnɩ Berekɩaa bikuun, sɩ ɔɔ thɩ kɔ̃tɩ̃ na n do Ɩdo. Yɛkɛ gɩrɛ Jakarɩ sonɩ. 8 Ɔɔ dɩtɩnɔɔle, mɩ yɩrɛ thɩ̃ɛ thɩ̃ yɩrra, gɛr ha gɩrɛ: Mɩ yɩrɛ kuun dɩ jʋʋn gãgo sɩɛra a jɩɩlna ɓɛlɛnɔ mɩrtɩa thɩr luu. Dɩ gãgo sɛna na gãgo sɛna khala khala na gãgo bulona kɔɔ hale ɔɔ khiro. 9 Dɩ mɩ bulele mɩɩ: Kɔ̃tɩn, aɲe gãgonaalera n nɩna? Dɩ thɔ̃thɔ̃ thuiilera n mɩana mɩnɩ so mar aa: Ma mɩɛ fɛr gɩrɛ gãgonaale n nɩnanɩ. 10 Dɩ kuunɩle jɩɩlɛ le mɩrtɩ thɩr luurə sa so mar aa: Thɔ̃thɔna wɛɛkɛ Thãgba Kɔ̃tɩn thɔnɩ, wɩ kpaarɛ thɩɩ a hɩnɛ. 11 Dɩ wɩrɛ jʋnɛnɩ gãgonaalera sor Thãgba Kɔ̃tɩnɩ thɔ̃thɔ̃ thurəəle jɩlɛnɩ le mɩrtɩ thɩr luu ayɩ: Sɩ kpaarɛ thɩɩra a hɩɩn, ɲaɲanɛ na hala', ha ɩɩ gɩ paar fɛw. 12 Le Thãgba Kɔ̃tɩnɩ thɔ̃thɔ̃ thu bir so aa: Thãgba Kɔ̃tɩn, kɛ dɔnɩ kokenaa kɔ̃tɩ̃, hɩnɛ, yɛna kpalãther yʋɔr ha gɩrɛ fɩ gbananɩ Jerujalɛm nĩkhii na Judaa dɩ ɩkhasɔ. Ʋmɔ̃ bɔɔ ga dã sɩ fa jɩ wɩ bʋɔra? 13 Dɩ Thãgba Kɔ̃tɩn mɩɩrɛ thɩmɩɩ bɔy na ha ƴɔl thɩmɩa a ha thɔ̃thɔ̃ thuiilera n mɩana mɩnɩ.
14 Dɩ thɔ̃thɔ̃ thuilera n mɩana mɩnɩ so marɛ aa: Hulene ayɛ: Thãgba Kɔ̃tɩnɩkɛ dɔnɩ kokenaa kɔ̃tɩ̃ sor ayɩ: Mɩ hananɛ naʋʋkɛ hulonenɩ Jerujalɛmna kɛ n dɔnɩ dakha Sɩ̃ɔ. 15 Sɩ mɩ gbaar nĩkhi kɔ̃tɩ̃ɩ ka ca kpɩɩsɔɔkɛ hanɩ ha ɩɩra, gɩdonɩ nĩkhi buu gbe kɔɔ fʋ̃ɔ mɩ ɩ̃ toora, sɩ wɛr, dɩ wɩ bullo a tɔ awɩ bɔgaar a dɛɛnɔ. 16 Gɛr gɩ mɛr Thãgba Kɔ̃tɩn sor ayɩ: Ma bire na fi ƴɩɛ na pɛ Jerujalɛmna a na jɩɩ bʋɔra. Ɩ̃ fʋɔr cɔ na bire a na mɩ le, dɩ Jerujalɛm dɩɩ na bire a na mɩ; mɛr Thãgba Kɔ̃tɩn kokenaa kɔ̃tɩ̃ sɔ. 17 Dɩ thɔ̃thɔ̃ thuirə bire so mar aa: Sɔ wo ayɛ: Thãgba Kɔ̃tɩnɩkɛ dɔnɩ kokenaa kɔ̃tɩ̃ sor ayɩ: Ɩ̃ dɩsɔ na bire a na hinə thɩ̃ bɔy. Mɛr Thãgba Kɔ̃tɩn na bire a na ƴɔl Sɩ̃ɔ haar, ma bire a na phiir Jerujalɛm dɩɩ wo.